El proseso de ulvido i eskayimiento por el kual esta pasando la kultura djudeo-espanyola, rende ekstremamente urjente el menester de arekojer lo mas ke podamos de testimonios tales ke dokumentos, livros, kantes, kuentos i mas en los kualos se reflekta esta kultura.
Un esforso muy importante ya es echo desde unas kuantas diezenas para arekojer, enrejistrar i publikar los kantes, kuentos i refranes ke son uno de los aspektos mas importantes de muestra erensia kulturala. Tambien son arekojidos livros, letras i toda klase de dokumentos ke tienen muncha valor para la investigasion de la istoria i la kultura de las komunidades sefaradis.
Fotografia familiala tipika -el novio i la novia i a sus deredor los miembros de la famiya, amigos i konosidos.
Un aspekto al kual fue dado menos importansia asta agora es el de las fotografias, konsideradas jeneralmente komo algo ke tiene importansia del punto vista familiar solamente. En efekto, munchos son los ke tienen en sus kazas diezenas o sienes i a vezes mas de fotografias familiales, komo la ke vemos aki, ke estan guadradas en albumes, o en kashones o kutis de kalsados, de onde son kitadas en raras okaziones i en la mayoria de los kavzos son ulvidadas durante largos anyos. Es ultimamente solo ke se empeso a realizar la importansia de estas fotografias para la dokumentasion de algunos aspektos de muestra istoria ke avian sido inyorados o no eran konosidos segun lo meresen. Es ansi ke se empeso a krear koleksiones de fotografias, algunas de las kualas ya yegaron a tener unos kuantos miles de fotos.
El problema es ke para poder aprovechar estas koleksiones, no solo para el plazer del ke las arekojo sino tambien para la investigasion de muestra istoria, estas fotografias deve ser klasadas i ordenadas de manera ke puedan ser konsultadas de una manera fasil i efikas. Asta pokos anyos atras esto paresia ser una tarea de las mas difisiles, tomando en konsiderasion ke para kada foto kale notar tambien el nombre de los ke estan fotografiados ayi, la data i las sirkonstanasias en las kualas fue tomada ansi ke otros detalios mas ke pueden ser importantes. Por enshemplo una fotografia tomada en la boda de amigos o parientes, de kuarenta o sinkuenta anyos atras, puede dar detalios sovre la vistimienta uzada entonses, la parientez ke era entonses muncha mas numeroza ke en muestros dias, o mizmo sovre la teknolojia fotografika ke esta dezvelopandose kontinualmente. Ainda mas importante es la informasion ke pueden dar fotografias de kales, eskolas, ospitales i otras institusiones komunitarias; de kuartieres tipikos onde moravan una gran parte de los djudios de una sierta komunidad, etc.
Admetiendo mizmo ke uno tiene la pasensia de notar en fichas o kartas toda la informasion relativa a estas fotografias, asta ultimamente era una tarea muy difisil de bushkar en estas koleksiones unas informasion espesifika ke mos interesa i ke bushkamos para un artikolo, o un livro ke keremos eskrivir, o un estudio ke estamos aziendo sovre un sierto tema. Ma oy, grasias a la mueva teknolojia i a los komputadores esto ya no es una mision imposible: tenemos numerozos programas dijitales ke permeten de azer este lavoro muncho mas fasilmente, aun ke klaramente, aki tambien las kozas no se azen de suyo i kale dedikar dias, mezes i a vezes anyos asta ke se pueda tener una koleksion dinya de su nombre.
Uno de los ke izieron esto es Enrico Isacco, un sefaradi de Fransia ke lavoro largos anyos komo fotografo i produktor de filmos, konose muy bien las teknikas de fotografia i se dedika agora a dokumentar la kultura djudeo-espanyola por medio de entrevistas ke enrejistra en video i tambien kon fotografias ke toma el mizmo o arekoje de las personas ke entrevista.
Es ansi ke el reusho a krear una koleksion de mas de 3000 fotografias ke ya fueron todas skaneadas i integradas en un programa informatiko espesial ke permete de konsultarlas muy fasilmente.
En una entrevista ke mos akordo, el ekspliko ke empeso a arekojer estas fotografias, bushkando a aprovechar sus konosensias en este kampo para la dokumentasion de muestra kultura ke el ya estava viendo komo desparesia i se pedria poko a poko.
Artículos Relacionados: