La istorya trajika de los sefaradis de los balkanes

Por:
- - Visto 450 veces

Durante la Shoa los sefaradís de orijin otomana peryeron en total mas de la mita de su povlasyon en los kampos de masakro nazisto. De Belgrade en el norte de los Balkanes fin a Aleksandriya en el sud, en Ayifto, se estima ke serka 220 mil djudyos sefaradís bivian al impesijo del siglo 20 en el Imperio Otomano. A la eksepsyon de los djudyos biviendo en la Republika Turka ke eran en 1941 serka 80 mil el resto de los sefaradís de los Balkanes disparesyeron al 92 por sien entre 1941 i 1944. Grande peryita ke decho unos pokos guarfanos biviendo oy en dia en Israel. Trajediya ke se rekonosyo muy tadre en el mundo, onde djustisya dainda se demanda.

Los djudyos otomanos bivieron siglos enteros en armonía kon la otoridad turka dezvelopando sus karakteres relijiyos, komunitaryos, sosiales i politikos sovre sus tradisyones iberikas. La mayoriya de esta povlasyon siendo de orijin españyola asimilo las komunidades antikas komo los djudyos de la Makedonya, de la Anatolya i mas tadre djudyos ke imigraron de la Polonya, de la Hongariya i de la Bavyera, los kualos se establisieron por lo mas en la Bulgariya i en la Gresya.

EL destino politiko kijo ke los payizes de los Balkanes obtengan sus endependensyas en los siglos 19 i 20, kon el establesimiento de la Bulgaria, de la Yugoslaviya, de la Gresya i de la Albanya. Dunke un muevo statuto se prezento a estos sefaradís en sus relasyones kon los otoktones en siendo forsados a olvidarsen de los privilejios ke tenían en el Imperyo Otomano. Eyos se izieron sivdadinos de estas nasyones, koza ke los forso a tener lealdad envreso el payis al kual apartenian. Ez verdad ke en los primeros tiempos las kozas no avian trokado supito i ansi los sefaradís kontinuaron a azer sus komersyos tradisyonales entre los payizes de los balkanes i del Mediteraneo.


En estos payizes la situasyon sosyo ekonomika trokando, la minorita djudia benefisyo de las muevas tendesyas kreando ansi una vida spirituala i intelektuala rika, anchamente predominada por la tradisyon sefaradíta. El folklor en ladino kreyo una savor spesial en estas komunidades balkanas ke las aze diferentes de las de otros payizes evropeos i ke fue konservado de jenerasyon en jenerasyon. Malgrado todo en el 19 siglo el nasyonalizmo djudyo se dezvelopo en estas komunidades i 3 delegados búlgaros fueron prezentes en 1897 en el Kongresso sionisto. Munchas federasyones i movementos de juventud espuntaron en los Balkanes los kualos fueron muy aktivos.

Malgrado los arreboltamientos politikos los djudyos resivieron sus derechos siviles, komo por echemplo en Bulgariya, despues del kongresso de Berlin, el governo fue apresurado a darlos sin falta. El antisemitizmo no fue nunka una fuerza politika ke metyo en perikolo la vida durante munchos anyos, malgrado ke en Salonik en el anyo 1923, despues de la gerra entre los gregos i los turkos, la vinida de los gregos de Anatolya kavzo graves entrompesos ekonomikos entre los djudyos i estos imigrantes. Entre las dos Gerras Mondialas la diskriminasyon de los djudyos era de lechos poka sinyifikativa enverso las de la Evropa oksidentala i ortientala.

Komo en general en Evropa i en los payizes balkanos achakes de la Sigunda Gerra Mondiala la istorya de las komunidades djudiyas se esparte en dos, una antes i otra despues. El jenosido nazisto dyo un golpo inegualado a las komunidades balkanas, destruyo esensyalmente el djudaizmo yugoslavo i grego, ma grasyas al rejimen búlgaro i a su puevlo los de este payis se salvaron malgrado ke 11 mil djudyos de Makedonya i de Trakya fueron embarkados a los kampos de la muerte. Además los rejimes komunistos de Yugoslaviya i de Bulgariya todo en rekonosiendo las sufriensas de los djudyos no mankaron de likidar la otonomiya kulturala de las komunidades djudias.

Dezde el prensipyo del anyo 1950 la mayoriya de los djudyos de Yugoslaviya i la mayoriya de los de Bulgariya izyeron la aliya. Los ke kedaron no mas de serka de 8000 almas en los payizes balkanos kontinuaron a mentenir un poko de la vida spirituala del djudaizmo, koza ke solo interesso a los mayores. Enfin despues de un silensyo largo de munchos anyos los djudyos de Albanya, no mas de 500 personas dechizyeron de azer la aliya en 1991, dechando detrás tristeza i dezolasyon.

*

Vos do aki siertas datas ke me paresen importantes de punto de vista istorika, a saver:

1821- Anyo de la revolta grega kontra los otomanos. Los djudyos fueron akuzados de mentenir relasyones kordialas kon los turkos, sovre esto en el masakro de Pelopones 5000 djudyos fueron matados. Una otra partida de eyos se eskabuyeron en fuyendose a la isla de Korfu.

1876- Los djudyos otomanos resiven los derechos de igualitad. Primera ves ke deputados djudyos fueron elijidos.

1884- La aparesyon del primer jurnal en ladino “La Alborada” en Bulgariya.

1912-1913- Kaji 100 mil djudyos ampesaron a bivir en Gresya despues de las gerras Balkanas

1918- Kreasyon del estado Yugoslavo onde se toparon 70 mil djudyos.

1941-Envazyon de la Yugoslaviya i de la Gresya por los almanes. Empesijo del jenosid ke mato 46 mil djudyos de Saloniko i ansi la disparesyon del mas grande sentro del djudaizmo sefaradí de Evropa. En totalidad serka 65 mil djudyos gregos fueron matados lo ke reprezento el 85 por sien de esta povlasyon. Ademas 11 mil djudyos de la Trakya i de la Makedonya fueron deportados a Auschwitz. 2200 de entre eyos kedaron bivos. Serka 60 mil djudyos yugoslavos fueron matados, 2 mil de entre eyos kombatieron en la armada de Tito donde Mosa Pijade ke fue a la liberasyon uno de los 4 vice-prezidentes del estado.

1949-1952- Aliya de los djudyos yugoslavos (8000) i búlgaros (44300)

1991- Aliya de la chika komunidad albaneza.

Selim Salti

Fuente: BÜLTEN de los turkanos de Israel – turkisrael.org.il

2 comentarios en «La istorya trajika de los sefaradis de los balkanes»
  1. MUNCHAS GRASIAS DR SALTI
    EL MALEDICHO HITLER, MATO DJUDIOS DE TODA LA EUROPA…. ME DEMANDO PORKE ESE ODIO………
    I AGORA, LOS NEONAZIS MORAN EN TODO EL MUNDO
    YO MELDI UN LIVRO IMPRESINDIBLE ¨AMNESIKOS ¨
    MIS PALAVRAS SON: NO OLVIDO NI PERDON….. EL DIO PERDONA YO NO

    Responder
  2. MUNCHAS GRASIAS DR SALTI
    EL MALEDICHO HITLER, MATO DJUDIOS DE TODA LA EUROPA…. ME DEMANDO PORKE ESE ODIO………
    I AGORA, LOS NEONAZIS MORAN EN TODO EL MUNDO
    YO MELDI UN LIVRO IMPRESINDIBLE ¨AMNESIKOS ¨
    MIS PALAVRAS SON: NO OLVIDO NI PERDON….. EL DIO PERDONA YO NO .
    este es el único comentario que hice

    Responder

Responder a MARGARITA SAUBIDET . CHACO ARGENTINA Cancelar Respuesta

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: