La Tradisyon Del Kurshun

Por:
- - Visto 296 veces

Diario Judío México

No kreyo ke ayga una persona ke bivyo en Istanbul en los anyos 50 o en el Emperyo Otomano, munchos anyos antes i fina muestros diyas mizmo, i ke no sepa o no se akodre de la tradisyon del “kurshun” . Kursun en Turko es el plomo.

Avlo de una tradisyon ke va atras al tiempo de los pharaones en Egypto.. Para eyos era un modo de tratamiento medikal alora ke yo vos konto de una tradisyon para “burakar” el ojo malo, salvarse de los espantos, eskapar kon los males ets. No se si esta “majiya” proviene del fakto ke kuando el plomo pasa del estado likido al estado solido tiene la proprietad de kanselar los poderes elektromanyetikas en el espasyo de un globo de 1 m3….


Majiya, siensya okulta, tradisyon sin kavesa ni kola…. lo ke es…. lo azen i la gente se sienten mijor !!! Ansina lo dizen ! Yo por seguro ke no me kreyo a talas kreensyas i superstisyones de durmir en pies !

Las famiyas judiyas no eran una eksepsyon i me akodro ke la “kurshundjiya”, (la mujer ke saviya “meldar” los pedasos likidos de metal ke pasavan al estado solido al kontakto de la agua friya en un resipiente) viniya a kaza kada kuando mi mamita la yamava. Era muy okupada i raramente teniya tiempo para los ke no le davan un buen bakshish a su aldikera !…. Alora viniyan tambien las vizinas i amigas ke la keriyan a sus kazas para esta seremoniya, se ofresiya kafe i biskochos, dulses i sharopes. Las mujeres se tapavan los kaveyos ma no las ke no eran kazadas…. Los hombres se ivan a las kazas de los hombres de esta profession i hombres i mujeres no puediyan estar en la mizma kamareta durante la seremoniya.

La ke se iva “echizar” se asentava en basho. Se traiya una savana o una grande tovaja (ke se guadrava para el kurshun solo). Deviya ser limpya, sin mancha i no ser arazgada…. Le kuvijavan la kavesa i los ombros i la kurshundjiya empesava a murmureyar lo ke deviya de resitar. De otra parte se metiya a buyir el plomo en una chika kacharola. Una mujer mas aedada traiya una chika payla de agua friya i la deteniya ensima del “korban !” La kurshundjiya vazyava el metal buyendo a la agua yelada i empesava a aprekantar !

Dospues, todos sin reflo (!) se metiyan a oyir las interpretasyones ! Profesiyas, burakar los ojos malos, el destino, el sukseso en la eskola o en los echos del hombre de kaza, bebes, kazamientos, (nunka defuntos), fiestas…. Todo pasava…. I lo mas importante todos estavan kontentos ! Mas kontentos estavan i mas godro era el bakshish ! Yo pensava siempre ke las figuras ke saliyan aryento de la agua asemejavan a grandes eskaravajos ke “komiyan” el mal de la persona o el ojo malo ! Lo mas me plaziya el bruido “djissss” ke el plomo aziya kuando entrava en la agua !

La kaza se alegrava, se dava un pranso la noche, el haham viniya al segundo diya para “meldar” la kaza. Se le ofresiya raki kon borekitas, kezos i azeytunas, gueyvo haminado i frutas. Aziya la beraha i se iva kontente. Me akodro ke nunka se le dava manko de lo ke se dava a la kurshundjiya….

Todo esto me divertiya muncho porke era un trokamiento de la monotoniya de kada diya.. Ademas estava segura ke “agora todo esta en regla i los ojos malos se burakaron..”

Otra koza era ke las amigas de mi mamita viniyan kon sus chikos ke eran mis amigos i jugavamos en las eskaleras, en la tarasa ariva, en mi kamareta kon Fatma. Era absolutamente defendido de salir afuera del apartamento ! Aresiviyamos “tartines” ke son revanadas de pan kon manteka i dulse ensima kon chay o leche kon kafe. Me gustava lamber el dulse ensima de la tartine ! El pan…. No !

Ahhhhhhhh ke diyas…..

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: