LAG BA OMER –
HAG SAMEAH ISRAEL
El 33 er diya de OMER – Lamed 30 i GIMEL 3 asigun las valores numerikas de las letras hebreas – es un diya muy imporante para los judyos. Es el diya ke uno de los mas grandes savyos del Judaizmo =i del puevlo judyo Rabbi Shim’on bar Yohay, el tsadik ke eskrivyo EL ZOHAR – La Splendor – mos desho la vida buena…..
Miles i miles de judyos relijyozos van a vijitar su tomba en el monte Meron – Har Miron- en Galile/Israel. Kantan i baylan, komen i beven al deredor de ande esta enterrado el tsadik, noche entera. Es el tsadik mizmo ke demando ke su muerte seya una fiesta i no la razon de un dolyo . Savyos dizen ke es pormodo de la alma del tsadik ke asuvyo a los Sielos i se auno de manera mistika a los mundos del Alto. Esta union es paresida a una boda, hiloula en Arameo, i es por esta razon ke se alegran.
De otra parte se azen grandes “medurot” , – fuegos kon flamas muy altas- en Lag ba Omer para akodrarse de las flamas al deredor de la kaza de Shimon Bar Yohay. No se trata de flamas verdaderas ke kemariyan la kaza ma de un fuego celesto ke no kema, paresido al arbusto ardiente ke aparesyo a Moshe Rabenu.
Un’otra razon ke justifika igualmente el statu partikular del 33 er diya de Omar es la fin de la epidemiya fatal ke mato a 24.000 elevos de Rabbi Akiva. Akeyos ke se aviyan dedikado al estudyo de la Tora i eran laskolonas del Judaizmo en akeya epoka. Sus muerte fue una verdadera katastrofa por el puevlo de Israel.
En akel diya, el Rabbi tomo kamino verso el sud de Eretz Israel i 5 muevos elevos se aunaron a el para estudyar la Tora. Entre eyos estava Shimon Bar Yohay. Ansina fue ke mos dyo un ermozo egzemplo de koraje i de optimizmo….
Fue muy muy duro para el de peryer 24.000 de sus studentes en 32 diyas… En memorya de eyos, muestros savyos mos impozaron el dolyo durante el kual no se aze dinguna boda, no se arapa los kaveyos i la barba.
Dunke, fue Rabbi Akiva ke asseguro la transmission de la Tora a las muevas generasyones i sus elevos nunka fueron en kompetisyon los unos kon los otros komo lo estavan los 24.000 – i ke se dize ke muryeron por esta razon…- Los muevos se dedikaron de un Amor total al Todo Poderozo i guadraron sus voluntad de transmeter la Tora kon todo sus fuersas.
LAG BA OMER es una grande fiesta kon muncha alegriya para el puevlo judyo. Se selebra la kontinuasyon del estudyo de la Tora ke puediya kuaji dezapareser !
Artículos Relacionados: