Diario Judío México - Diario Judío México

Antes muncho tiempo me akodri ke arresivi unas kuantas bromas de mi kerido tiyo Moshon kon el baston Z’l ke no era mi tiyo ma ke le gustava ke lo yamen ansina…. Oy las kero kompartir kon vozotros dospues ke las traduizi del Fransez al Judeo Espanyol…. Teniya un grande serklo de amigos ke le embiyavan todo modo de eskritos i yo tuve el mazal i el plazer de ser inkluida en su lista.

Son eksplikasyones de biervos ke me izyeron soriyir de todo korason. De ande las toparon ! Ay unas kuantas ke normalmente no me iva atrever a prezentar ma son tan kreativas ke me ezvachi de borrarlas…. (a mi edad i en el siglo 21 dayinda me siento trokar de kolor i no se si esto afita de verguensa o me da verguensa porke afita !!….)

I mos estamos indoooooooooooo…. Wohouuuuuuu !
UNA STAR : La persona ke lavora toda su vida para ser konosida i ke dospues se mete antojos pretos para ke no la rekonoskan !

SNOBISMO : Es merkarse kozas karas kon el dinero ke no se tiene, para empresyonar las personas ke no aman !

SINONIMO : Biervo ke se eskrive al lugar del otro por no estar siguro de la ortografiya !

LAVORO DE EKIPO : Es la posibilitad de kargar los otros kon las erores ke se kometen.

LA MIGRENA : El kontraseptivo el mas utilizado por las mujeres.

EL KAZAMIENTO : Es la union de dos personas ke suportan los problemes ke no ivan a egzistir si aviyan kedado solteros .

NIMFOMANYA : Termo utilizado por siertos hombres para klasifiar una mujer ke tiyene mas ganas de azer el amor ke
eyos mizmos.

DENTISTO : Es un majisyano ke save metervos en la boka, una parte de lo ke vos kita de vuestra aldikera !

PARLEMENTO : Un nombre raro ke es formado de dos verbos : Parlar/avlar i mentir !
( parler et mentir = Parlement )

PESIMISTO : Optimisto kon eksperyensya

UN PROGRAMADOR : La persona ke solusyona de manerake no se puede entender los problemes ke no se saviya ke egzistiyan !

EL PROGRESO : La doktrina ke komplika todo lo ke es simple.

FASIL : Se dize de una mujer ke tyene la moralitad de un hombre.

GINEKOLOGO : El ke lavora ande los otros toman plazer

HARDWARE : Partida del ordinador ke resive los
golpes kuando el software no kamina mas !

INTELEKTUAL : Se dize de una persona ke tyene la
fakultad de pensar a otra koza ke del sex. durante dos horas.

UN SWEATER : Vistido ke la kreatura deve vistir
kuando tiyene friyo la madre.

UN KONSULTANTE : Es el ke konsulta su hora, te dize la
hora ke es i te aze pagar lo ke mereses !

EL BAYLE : La frustrasyon vertikala de un dezeyo
horizontal

UN EKONOMISTO : Es un eksperto ke savera amanyana
lo ke disho ayer.

AUTOBUS : Un vehikulo ke va dos vezes mas presto kuando se korye detras ke kuando se topa arriento.

BABY-SITTER : Manseva ke deve komportarse komo madura para ke los maduros puedan komportarsen komo mansevos.

BOY-SCOUT : Kreatura vestido komo un idiota i ke toma ordenes de un idiota vestido komo una kreatura.

KAPITALISTO : Persona ke se va de su echo a su klub
klimatizado kon su koche klimatizado para entrar en la sauna !

PSIKOLOGO : Es el ke observa a los otros kuando una ermoza mujer entra en el salon…

EL DESPERTADOR : Enstrumento ke se invento para espertar las personas ke no tiyenen kreaturas chikas

SARDINAAS : Pishkadiko chiko i sin kavesa ke bive en el azeyte

SEKRETO : Informasyon ke se komunika a no mas de una persona kada vez !

I agora…. El kuentiziko el mas konosido de Nasreddin Hodja, para los ke no lo tienen oyido dayinda….

Un dia el hoja tenia menester de una kaldera para kosinar. Se fue al vesino i le demando si puede emprestarle uno.

Despues de unos kuantos dias el hoja le trusho atras a su vizino la kaldera kon una mas chika aryento. El vizino se sorprendyo i le demanda komo puede ser ke le de atras 2 kalderas al lugar de la una sola ke tomo. El hoja le soriye i le disho ” Mazal tov ! Te vino al mundo una inyetizika. Tu kaldera estava prinyada i vos paryo una ermoza kalderika ”

El vizino se disho de si para si ke el hoja lo bolo ! Lo ringrasyo i dospues de serrar la puerta koryo ande su mujer para ke riygan enjuntos de la lokura del hoja !

Pasaron unos kuantos diyas el hodja fue otra ves ande el mizmo vizino para demandarle la grande kaldera para azer halva ! El hombre no estava. La mujer empeso de reir de si para si i le dyo la grande kaldera de kovre ke teniyan i ke uzavan solo en las fiestas, pensando ke esta pareriya por seguro buchukas !
El hoja le disho “mersi” i se yevo la kaldera.

Unos kuantos diyas pasaron..El hoja no trusho atras la kaldera de kovre. Esperaron unos kuantos diyas otros… Nada… A la fin el vizino no puido mas detenerse i chafteyo a la puerta del hoja

– Hoja te akodras la kaldera de kovre de mi mujer ke uza solo en las fiestas ?
– Si !
– La tenemos de menester.. Me la puedes dar atras si esta sana i rezya ?
– Lo siento ma esta muy okupada agora no puede vinir !
– Ah bueno ! I kuando la va pueder tomar ?
– No se ! Ven en unos kuantos diyas !

El vizino kuando torno a su mujer le disho ke esta vez por seguro ke la kaldera se esta kazando i ke va tornar a kaza kon su marido i mizmo kon los esuegros i las kunyadas !!!

Paso un mez. El vizino entero sorizas viyene a la kaza del hoja kon un grande buketo de rozas.

El hoja se kita el sarik/chapeyo ke se ata a la kavesa, lo traye a su pecho, kara de tishabeav !

– Siyempre de alegriyas hoca ! Ke syempre ayga bodas i fiestas en tu kaza, sos bendicho ombre ! La mizva de kazar mi kalderika i de guadrar todo este tiempo la famiya del novyo en tu kaza es grande koza i te se va kontar en los sielos !

– Ah sos tu ! Ahhhhhh mi povre amigo ! Komo te va pueder dizir lo malo, la dezgrasya ke mos afito a todos ! ESto dayinda bivyendo el shok ! Ke ermoza ke era ! Ke presyoza i ke briyo ! Mansevaaaaaa ! Ay ay guay guay !

– Oyyyyyy ! Lo syento tanto ! Ke buena mujerika ke teniyas..Ke henoza ! Mansevaaaaaa por seguro ! Deke no mos dates haber ? Kuando fueron los funerayes ?

– Mi mujer ? Kualo mi mujer ?
– Na… Lo ke me estas dizyendo de la dezgrasya i del shok ke estas dayinda bivyendo mi povre amigo !
– Mi mujer no tyene nada ! Me aze la vida preta !
– Buen asemejado !!!! Ken alora ?
– Ohhhh… Komo te lo digo ! Es tu kalderika ! Ganeden bueno tenga ! Se bolo kom’un pashariko !
– Ande se bolo !!! Hoja vente en ti ! Lo bolates tu !
– Komo me tratas ! No tyenes verguensa ?
– Es tu el sin verguensa ! Me rovas mi kaldera de boda i de fiestas, la de kovre ke tenemos, lo bueno de mi mujer i me kontas kuentos de durmir en pies. Kalderas no tyenen alma, no pueden murirsen !
– No pueden murir ma pueden naser ?

Diyas buenos i kon alegriya siempre…

[email protected]

SIN COMENTARIOS

Leave a Reply

Artículo anteriorEli Cohen, Director Ejecutivo de la Organización Sionista Mundial, presentó su renuncia
Artículo siguienteArranca la 16 edición del Festival Internacional de Cine Judío en Tijuana
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.