LOS IJOS DEL OSEANO
KEN SON ? Son los indigenos de la Oceania – Australia, Mueva Zellanda, Tasmania ets. – ke egzisten en sus tierras mas de 80.000 anyos en unos 500 varios klanes, son de kolor kuaji preta i bastante primitivos.
Son gente orguyozos de sus rasa, guadran sus linguas sus kultura i sus tradisyones, malgrado ke sus tierras fueran konkistadas por el emperyo Britaniko en los d’alkavos anyos del siglo 18. La mayoriya de eyos fueron matados, muertos de hazinuras ke los Europeos les aviyan apegado o egziliados a los deziertos i al norte de Australia.
Antes ke los Europeos yegen a sus tierras biviyan en kazando animales, pasando sus kultura kon kantos i muy munchas historyas, pintando i baylando. Eran medyo nomados i muy ekspertos para kultivar sus tierras. Boltavan a sus kaza kada fin de sezon para tomar la rekolta de lo ke aviyan sembrado.
El rasizmo fue abolisado en Australia en el anyo 1976 ma esto no ayudo muncho a los indijenos ke kontinuaron a sufrir de las hazinuras, del manko de empleyos i de edukasyon… Munchos se topan trapados en krimenes i en ekstrema provedad…. I los ke mas sufren son naturalmente las kreaturas.
Es vedra ke egziste muncha deskriminasyon i los nativos se revoltan i azen todo para ke las kozas troken… Kada 26 de Enero Australia fiesta su independensya alora ke es un diya de dolyo para los aboriginos dospues de 150 anyos de kolonizasyon.
Un rezume de las memoryas de viajes de David Pots
……..
WILLIE es hoy uno de los Ansianos del klan NUGAL de la Tribu GUUGU YIMITHIRR. Ay 23 klanes aparteniendo a este tribu. Teniya de yevarmos a un tour de medio dia para ver las sesh rokas kon el arte GUURRBI. Es un boske de luvia kon la savana arriva.
Tuvimos ke tomar permiso para ir porke es un lugar santo para eyos. El tour es un enkanto ! Willie nos mostro el sitio de nasimiento i era aya ke las mujeres traian al mundo sus kriaturas. Su padre i su papu nasieron aya. Los hombres no pueden entrar.
No muy leshos de ayi, al fin de “circulo de la vida” se enterran los muertos. Willie tomo un palo en su mano i desino en las arenas. Era su nono ke izo estos desenes ke mostran el kamino de la vida. Esto les dava fuerza i les ayudava a renovar el lien historiko i espiritual kon la tierra.
Willie mos mostro mas plantas ke se komiyan i los ke eran medisinas. Las hormigas vedres eran para el frio. Unos kristales eran buenos kontra la dolor.
Dospues del Tour tomimos el kamino de CookTown, Port Douglas i Cairns. Asuvimos al vapor para tornar al LODGE hotel perdido en la natura para una trankilitad total… Aviyan 17 kabinas al stilo Kolonial echas de madera. Se puedia ver el CORAL SEA i el GREAT BARRIER REEF.
…………
La orasyon de los ABORIGINOS
…..KE TENGAS DE TODO BASTANTE !
Te auguro ke bivas una vida yenna de ermozuras
i bastante para detenerte en pies.
Ke tengas bastante sol para ver kon klaritad las kozas
I bastante luvyas ke kavzaran ke ames el sol mas…
Te auguro bastante felisitad para dar reflo a tu alma
I bastante amarguras i penas para persivir
Las mas chikas alegriyas de la vida
Komo si fueran immensas i imposivle de deskrivir…
Ke tengas bastante ganansyas para lograr lo ke nesesitas
I bastante peryita para puder apresyar lo ke tienes
Te digo “Shalom, Amor, Salud i Diyas Alegres”
Para amahar muestra d’alkavo espartida, dizyendomos “Adios”
Traduizida por Sharope blanco
Artículos Relacionados: