Diario Judío México - Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, el djueves a las 4 h 06 despues de mediudiya, ora de Fransya, sea kuando se kyere, kale klikar en el sityo de Radio J, i irse sovre las emisyones de despues de medyudiya.

http://www.radioj.fr/node/55

De otra parte, vos akodro ke el proksimo atelye de konversasyon de Vidas Largas se va tener el martes ke vyene 20 de novyembre 2018, en el Centre Communautaire, a las dos i medya (asta las kuatro i medya – sinko).

Kale tambyen ke sepash ke muestro amigo Carlos Yebra Lopez asistyo al atelye del 6 de novyembre i mos tomo en video al momento ande yo, porke vino en el lakerdi, estava kontando la istorya de Sabi Soulam, ke ya konti en mi emisyon intitolada Los rekodros de Sabi Soulam, del 20 de janvier 2011.

Esta video se puede topar sovre youtube Ladino 21

La istorya de este manseviko tenyendo la buelta de meoyo de fuirse al momento ande la polisiya estava aferrandolos kon su madre, i de fuir no el solo, ama tomando kon el su ermana ke yo pensava ser su ermana chika, halbuki era mas grande (16 anyos), de aboltar despues para avrir la puerta del apartamento serrada por la polisiya, i liberar a una musafira ke se teniya eskondido de basho la kama i despues se topava sin pueder salir, i tomar tambyen a su ermana ke se teniya eskondido en el numero de las eskaleras, esta istorya, la konti de kavesa, i azyendo esto, ize unos kuantos yerros. Dishe ke su padre aviya sido yamado al karakol i tomado aya, ama en vedra fue tomado en el aferramyento de masa del onzen arrondissement en los 20 i 21 agosto 1941. Dishe ke Sabi teniya 13 anyos, en vedra teniya 15, porke el aferramyento de su madre se tuvo en 1944.

Esta buelta de meoyo de un manseviko de 15 anyos me dyo a akodrarme de la istorya de Michel Stilisky, el kual, en Bordeaux, teniya 17 anyos kuando la polisiya de Maurice Papon vino aferrarlo kon su famiya. El, para fuir, dyo un shamar kon un uti sovre la kavesa del pulis, i despues bushko vida entera kyen eran los responsavles. Después de la gerra topo los polizes i sus kapo, ama la djustisya los desho sin mismo djusgarlos (non lieu). El kontinuo yene de bushkar i el es ke reusho de topar ke el kapo de arriva, el ke komandava todos los aferramyentos, era Maurice Papon, ke entremyentres aviya sido kapo de la polisiya de Paris en 1961 i ministro en el governo mas despues. Embiyo las prevas eskritas a la gazeta Le Canard Enchainé, i esto fue el empesijo del echo Papon, protejado, kale syempre akodrarlo, por François Mitterrand, prezidente de la Republika. La prezidensya de Mitterrand se eskapo en 1995 i despues de el vino Jacques Chirac, ke, el, rekonosyo publikamente la kulpa de la Fransya (50 anyos despues…) i Papon pudo enfin ser djusgado en 1997 i el djusgamyento va turar 6 mezes, asta ke sea kondenado en avril 1998 a 10 anyos de prezo. Vyendo esto, Papon ke aviya sido deshado en libertad se fuyo en Suisa, ma fue aferrado, aboltado en Fransya i enfin echado en prezo. Ama tres anyos despues, en 2002, fue liberado porke sozde muy hazino, lo ke era falso i salyo en pye del prezo , i bivyo kyeto en su kaza, ande se muryo sinko anyos despues, en 2007. No era tan hazino…

Esto dicho, aboltaremos al sujeto de mi emisyon de oy, ke va ser la kontinuasyon i el kavo de la istorya de los djudyos de Polonya, akodrandovos ke vos deshi la semana pasada el primo de septyembre 1939, diya ande los Almanes atakaron a la Polonya, empesando lo ke va ser la sigunda gerra mundyala.

Komo para mis emisyones presedentes, lavori sovre todo sovre Wikipedia, ke rengrasyo a esta okazyon.

Avlar de los djudyos de Polonya entre los anyos 1939 a 1945 es avlar de la shoah, ke izo dezapareser kaji a todos. Kijo dizir unos tres milyones i medyo de ombres, mujeres i kriaturas, sea matados de un kurshum en la kavesa, sea aogados al gaz, sea muertos de ambre, de kanserya i de hazinura en djuntos.

Al empesijo, no deviya ser ansina, porke, entre el primo de septyembre 1939 i el 22 de djunyo 1941, kuando los Almanes entraron en Unyon Sovyetika, una parte este de la Polonya era okupada por la Unyon sovyetika., kon unos 40% de la povlasyon djudiya de la Polonya, mas los djudyos ke reusheron a pasar de la zona okupada por los Almanes a la zona okupada por los Rusos.

Ama en vedra, afillu antes del 22 de djunyo 1941, los djudyos sufriyeron muy muncho en esta parte de la Polonya okupada por los Rusos, agora amigos de los Almanes, ke organizaron kuatro olas de deportasyon en Siberia, i sovre estas kuatro, dos, sin dizirlo, lo fueron kontra los djudyos. La primera fue kontra la intelligentsia i los empyegados del governo, la sigunda kontra sus famiyas i los polonezes en jeneral, la tresera, entre djunyo i djulyo 1940, kontra los refujyados venidos de la zona de okupasyon almana, sovre todo djudyos, i los sozde « spekuladores », kijo dizir djudyos. I fue la misma koza en Lituaniya okupada por los Sovyetikos. Munchos djudyos fueron deportados en Siberia. Yo me digo : kyen save ? Afillu si esto no era del todo el eskopo de los Rusos, puede ser ke esta deportasyon salvo despues de la muerte estos djudyos kuando vinyeron los almanes i sus einsatzgrupen.

A propozito de la venida de los Almanes, kale saver ke los Rusos travaron de los kampos, en 1941, 6.000 djudyos entre los kuales un syerto Menahem Begin, militante syonisto del Betar ke aviya sido aferrado komo « ajente del imperyalismo britaniko » i embiyado en un gulag de Siberiya. Begin i sus amigos se van a topar en la armada de los Polonezes del jeneral Anders, ma su batayon es embiyado en Palestina, lo ke Begin aprovecha para deshar la armada Anders i, kon 2.600 otros djudyos, entrar en el Irgun.

Esto dicho sovre la parte sovyetika de la Polonya i de la Lituaniya, kale agora avlar de la parte de Polonya atakada el primo de septyembre 1939 por la armada almana. Vos akodro ke si los fransezes i los inglezes deklararon la gerra a los Almanes el 3 de septyembre, el ayudo aliyado a los Polonezes se kedo en esto. Los Fransezes se kedaron sin menearse myentres ke los Almanes entravan en el djiger de la Polonya. Entre septyembre 1939 i mais 1940, fue entre Fransya i Almanya la « drôle de gerre » komo se yamo en franses, lo ke se puede trasladar por « la kuryoza gerra » o « la gerra shaka ».

Solos kontra la armada almana, los Polonezes no puediyan rezistir, malgrado los 120.000 djudyos ke kombatyeron en la armada poloneza, i pedryeron unos 32.000 askeres i zabites djudyos ke fueron matados en kombatyendo. 61.000 militares djudyos fueron echos prezoneros, entre los kuales, malgrado las leyes internasyonalas, poko sovrebivyeron.

En kuanto a los siviles, los Almanes empesan a enserrarlos en ghettos en las sivdades. Los mas grandes ghettos son los de Varsovia i de Lodz. Ama ay tambyen ghettos en Bialystok, Czestochowa, Kielce, Cracovie, Lublin, Lwow, Radom. En los ghettos, sovre todo los grandes, los djudyos se topan aleshados por paredes de toda otra djente, i deshados kaji sin komer. Se mueren de ambre i de hazinuras.

Despues del 22 de djunyo 1941, kuando los Almanes entran en Unyon Sovyetika, Hans Frank, governador alman de la Polonya, empesa la matansina de los djudyos, i por esto demanda el ayudo de los Polonezes.

En el kazal de Jedwabne, los moradores polonezes katolikos del kazal , o una parte solo, torturan i matan – uno se englorese de tener kortado a el solo 18 garones – a syenes de djudyos (toda la povlasyon del kazal, inkluyendo el haham de 90 anyos, salvo un grupo de 7 djudyos eskondidos por un par de Djustos) i los ke kedan son enserrados en una shuna (une grange) i kemados bivos.

Los Almanes, por sus parte, empesan por matar los djudyos kon tufenkes, ma muy presto se organizan para meterlos en djuntos pata matarlos en d’una. Van a ser en primero los kamyones de gaz i despues las kamaras de gaz. El primer sentro de eksterminasyon va ser en Chelmno ke empesa de kaminar en desyembre 1941. Vos akodro ke la konferensa de Wannsee se tyene despues,en janvier 1942, lo ke amostra ke los Almanes no asperaron esta konferensa para empesar la eksterminasyon de los djudyos. Aya, en Chelmno, seran matados unos 200.000 djudyos. Despues Belzec, de marso a desyembre 1942, ande 400.000 djudyos van a ser matados. En fevrero 1942, empesa la fragua del kampo de Sobibor, ke empesa de kaminar en mais 1942. Aya seran matados unos 250.000 djudyos. Treblinka empesa en djulyo 1942, ande seran matados 900.000 djudyos. Los djudyos del kampo de lavoro de Maïdanek son matados tambyen. En 1944, los Almanes kalkulan ke solo deven kedar 200.000djudyos de Polonya dainda bivos. I Auschwitz ? No vos avli de Auschwitz porke este kampo serviya para matar a los djudyos venidos de afuera de la Polonya, komo poe egzemplo los de Fransya, de Selanik o de Ungariya. Auschwitz, ande muryeron un milyon i medyo de djente, va yene servir para matar a 300.000 djudyos de Polonya, una vez los otros kampos serrados.

Los djudyos, komo ya lo savesh, no fueron matados solo por el gaz. Uvo tambyen la shoah por kurshumes, o los ke muryeron de ambre en los ghettos.

Por lo ke es de los ghettos, dinguno de mozotros se olvidara la rebuelta del ghetto de Varsovia, ke ya konti aki dos vezes, i a esta okazyon dishe ke esta rebuelta es una de las pajinas las mas eroikas no solo de la istorya djudiya, ma mismo de la istorya de la umanidad. Kaji todos muryeron aya, ma entre los muy pokos ke sovrebivyeron kale saludar la memorya de un kombatante del Bund, Marek Edelman, ke kedo en Polonya asta su muerte en 2009.

Los giborim de Varsovia no fueron los solos. Uvo tambyen rebueltas en los ghettos de Mazowiecki i de Bialystok, komo uvo tambyen rebueltas de sonderkomandos en Treblinka i Auschwitz, i la rebuelta de Sobibor, ke konti aki tambyen.

Se puede dizir ke los djudyos kaji dezaparesyeron de la Polonya, kedaron solo unos 40.000 o un poko mas ke reusheron a eskonderse, grasyas a Djustos o en entrando en la rezistansya. Los solos ke sovrebivyeron son los ke estavan afuera de la Polonya. Por lo ke es de mis suegros, ke biviyan en Fransya durante la gerra i reusheron a pasar en Suisa, i ke agora no son mas de este mundo, no tuvyeron mas dinguna paryenté en Polonya. Mi suegra teniya padre, madrasta, ocho ermanos i ermanas, i tambyen sovrinos i sovrinas, primos i primas. No le kedo dinguno. Lo mismo kon mi suegro. A el le kedo famiya porke no biviyan en Polonya. I lo ke konti de mis suegros vale tambyen para todos los otros.

Esto dicho, kon los djudyos aboltados de Unyon Sovyetika o de Almanya, o de otros paizes, los djudyos vinyeron a ser unos 200.000 en Polonya despues de la gerra.

Ama kuando vyeron ke los antisemites no aviyan trokado, kuando vyeron ke en 1946, un muevo pogrom se paso en Kielce, kon el ayudo de la polisiya, ande 42 djudyos fueron matados i 40 feridos, entre 100.000 i 120.000 djudyos, ke dainda lo puediyan, se fueron de Polonya entre 1945 i 1948, lo mas para ir en Palestina ke se izo Israel. Otrunos 50.000 aprovecharon ke era posivle, entre 1957 i 1959, para fuirse tambyen.

En los ke kedaron aviya halizes komunistos, komo por egzemplo Jakub Berman, ke tuvyeron poderes importantes.

Despues de la gerra de los sesh diyas, ande los 40.000 djudyos se amostraron amistozos verso Israel, el poder komunisto se dyo kontra los « syonistos », kale entender los djudyos, prezentados komo traidores verso la nasyon poloneza. Entre 1968 i 1970, unos 25.000 djudyos van a fuir.

A la kaida del komunismo en 1989, solo kedavan unos 5.000 a 10.000 djudyos (kontra tres milyones i medyo en 1939, sinkuenta anyos antes).

Kon la kaida del komunismo, las kozas se enderecharon para los djudyos, i permityo tambyen ke la vedra sea dicha. En 2005, una enkuesta amostro ke 45% de los Polonezes teniyan una negra opinyon sovre los djudyos, 18% simpatiya, 29% indiferensya, i 8% no se pronunsyeron.

Esto dicho, la Polonya tyene relasyones diplomatikas kon Israel, i aze komemorasyones de la shoah.

En 2000, aviya entre 8.000 i 12.000 djudyos en Polonya.

Wikipedia se keda sovre esto, ma no avla de la ley sovre la shoa adoptada por el Parlamento de Varsovia el 26 de janvier de este anyo 2018. Esta ley kastiga de tres anyos de prezo « la atribusyon a la nasyon o a el estado polones, malgrado los faktos, krimenes kontra la umanidad ». Por siguro, esta ley, ke tyene por eskopo de azer ke kualkyer istoryano de la shoah se espante de avlar del ayudo dado a los Almanes por los Polonezes, solevanto al governo de Israel.

El 27 de djunyo, Netanyahu obtuvo ke estos tres anyos de prezo sean anulados por una mueva ley, i izo una deklarasyon komuna kon el primo ministro polonez Mateusz Morawiecki, dizyendo a la vez ke no son todos los polonezes ke kometyeron krimenes, ama uvo yene syertos ke amostraron su lado lo mas preto en este tyempo.

Netanyahu pensava tener obtenido lo ke kaliya, ama en vedra los Israelyanos se disheron muy arravyados kon esta deklarasyon, ke asigun los istoryanos djudyos i Yad Vashem, da una falsa idea del rolo de los antisemites polonezes durante la gerra.

No se komo las kozas van a ser en el futuro, ma una koza es sigura, es ke agora, malgrado syertos esfuersos, no ay mas haliz vida djudiya en Polonya. Los djudyos ke se van en Polonya agora, van aya para vijitar a Auschwitz o otros lugares ansina. Para los djudyos la Polonya, ke sea su kulpa o no, es agora un semeteryo – un semeteryo sin tombas.

Para ver agora djudyos de Polonya, mijor es ir en Amerika, en Fransya, en Israel.

Kon esto vos desho i vos digo al djueves ke vyene, si kyere el Dyo !

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anterior¿Es incapaz ‘El Washington Post’ de entender todo lo referente a la Hermandad Musulmana?
Artículo siguienteTemas Curiosos # 100