Mi Madre Kerida

Por:
- - Visto 224 veces

Diario Judío México
.
UNA MADRE ES TODO….

Mi madre kerida, me muero por eya
Kale kudyarla, abrasarla kada diya
Es muy presyoza i siempre a mi lado apegada….
En pilotando, indomos kon jeep i en guerra !

– Ima ….. Mamaaaaaaaa ! Ouffff……Tengo dolor de kavesa.
– Es porke salites a la kaye kon los kaveyos mojados !


– Tengo mareyos….
– Komo no ? Estas ambyerto ! No estas komyendo nada…
Ven te dare a komer…

Mi madre aviya eskapado solo la eskola
primera ma es doktora, es farmasista….

– Arresivi un punyo en el ojo !
– Guay de mi ! Kual mallogrado te izo esto ? Te estamos embiyando a las kayes… No a tu echo ! Agora te frego patata i te kedas kon esto un poko de tiempo. Atyo !

– Mama mira hal de kaveyos sekos sekos ! Tengo pelikulas i me da araskinas…
– No es nada mi ijiko…. Te vo azer un buen masaj kon azeyte de oliva… Asentate !

– Me salyo sevada (sty, orgelet, arpacik) en mi parparo… Me duele !
– Agora le vo fregar ajo i va pasar

Es infirmiera…

– Esto entero sudado ! Ke kalor !
– Es porke korrites ! Aspera te vo metar una tovaja en la espalda.

– EUh ho ho ho Euh !
– Tosyendo eh ? Basta de entosegarte kon esta adiksyon tuya ! I bastaaaaa !
Era anestezista para kreaturas kuando era bebe.
– Noumi nou mi mi bebiko, durme i engradesete
Azete el rey de tu echo…. Eh eh eh eh mi bebiko !

Urologista !
– Hmmm porke tienes la urina amariya ?

Fizyoterapista !
– Mis piernas me duelen
– I yo tengo dolor de espalda… No es nada.. Pasa !

Dietisyana !
– Ize una komida de verduras alavada ! Muy muy sano. Mira ke no komas hamburgeres, patatas fritas, bevas Koka kola i mil dezgrasyas ke venden en la kaye ! Te vo asperar i vamos a komer enjuntos !

Dermatologa !
– Me salyo un grano en la espalda mama…..
– Vere esto….No komas chokolata i no vaygas metyendo la mano ensima… Deshalo. Dospues ke se vazya, lo alimpyaremos kon kolonya. Me oyites ?

Laboranta
– Aferri una abashada…. Me esto amokando sin kedar ! Es gripa parese…..
– Agora te traygo un buen chay de yervas… Anis, miel, limon, kinamon i jengimbre (ginger- zencefil), i una kupa de naranjas eksprimidas… Es kura por mi vida ! Dospues te vo fregar la espalda kon raki i aspirina. Te vas a durmir… A la demanyana te vas a alevantar muevo, cedid ! Mi ijiko presyado… Lo bueno de su madre !

Psikyatrista !
– Ke tienes ijiko miyo ?
– No tengo nada.
– Tienes koza. Lo veygo, lo se !
– Deshame trankilo ! Esto bien !
– NO ! Yo lo se ! Me estas guadrando koza !
– Ima ! Madre ! No me kites loko…
– Na ! Vites ?
– Vide kualo ?
– Tienes inyervos….

Genetisyena :
– Asemejates a tu padre ! El es inyervozo tambien… Todo lo negro te paso de el ! Te lo digo yo !

Veterinarya :
– Mamita…. Por el Diya de las Madres esto pensando de regalarle Viagra a mi padre. I no te olvides de esta buendad miya !
– Perro ! Lonso ! Azno entikeyado ! Afueraaaaaaaaaaaa. I ke mis ojos no te veygan ! Agora te vo espedasarrrrrrrrrrrr….De ande salitesssss dime!

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: