Diario Judío México - Keridos,

No se komo la gente pueden reaksyonar sovre lo ke vos kero eskrivir oy… Lo bueno o lo negro es ke siempre digo lo ke penso, i no se porke, puedeser porke do muncha importansya a este sujeto, me dyo la gana de dizir lo ke penso de manera subjektiva unikamente.

La muerte… Tan yelada, tan leshos i tan serka, el destino del ombre seya ken seya, markado del momente del nasimiento i ke se pasa  (ke triste !) a muestros ijos, a los mas keridos de muestra vida !  Unos me kritikaron de negra manera kuando mos salyo de konversar sovre esto…. Me puedyeron konvenser ?  No, ma  azerme pensar a otros argumentos… por seguro !   Ke vale ? La verdad keda la verdad seya lo ke seya…  Le pueden dar kolores… De preta se aze griza, se aze maron, bolta a la kolor de la berendjena ets.   Egziste gente ke la pintan en korolada en roz i en blanko !   Ma ke es ?  Sin importansya de kuala kolor es keda la mizma i la yamamos muerte… la fin o el empesijo ke Di-o solo save kualo ! No egziste ser umano o haya ke no se espanta de murir. Solo los ke no son konsiyentes i puedeser ke esto es un regalo de los Sielos para no darse kuento de los terrivles momentos de alkavo !

Kuando le dishe lo ke pensava a mi ijo, me abraso i me disho ke no kaliya ke tuvyera remorsos… Me disho ke estava kontente de bivir, kon todo lo bueno i lo duro de la vida  i ke vale la pena de bivir mizmo si se muere sin tener vidas largas (el Di-o ke no de !). Ansina lo pensan tambien munchas personas kon ken diskuti, gente de varios kondisyones i edad, hazinos o kon salud buena.  Muy pokas personas me dieron razon i me disheron ke pensavan komo mi..   Ize attensyon, eran gente ke izyeron estudyos altos, no muy rikos, no miembros de poderozas famiyas… no relijiozos (la fe kon ojos tapados siempre ensita a tener munchas kreaturas) gente de alta intelijensya i lojika. Yo aksepto i do razon, en este sujeto, a todos las personas ke tienen una idea sovre esto, i no importa lo ke pensan !

Agora….Penso ke la muerte es parte de la vida i simetaryos son lugares para los bivos mas ke para los muertos i para la primera i la segunda genersyon lo maksimum NO MAS, dunke para  un tiempo manko de un siglo por seguro. (dospues de la segunda jenerasyon simetaryos son buenos para estudiar historya, sosyolojia, antropolojiya ets.)

No kreyo ke es tan importante de ir a los simetryos i vijitar (!) los muertos, yorar al lado de sus tombas, avlarles porke NO ESTAN aya.  No mos oyen, no tienen dinguna fakultad de reaksyonar a muestra boz i muestras orasyones, Di-o las oye de todo modo de lugar mizmo si rogamos sin boz…

Dar importansya a los ke “saven mijor” i dizen, “se aze, se dize, se eskrive, se kanta o se melda..” siempre kon un  “SE….”  al empesijo para eskabuyirse de la responsabilitad, no se fina ke punto suona lojiko..  kuanto se puede kreyer la persona i se puede fiyar a ansina de lesyones, sin bazarse sovre faktos konkretos?

Yo yego a la konkluzyon ke el verdadero motivo de akeyos ke “saven mijor” es salir a delantre, ganar importansya i respekto porke estos “unos kuantos”  no tienen puedeser nada mas para sostener sus ego.  Mis biervos no son para los ke son grandes eruditos i terminaron sus estudyos en enstitusyones rekonosidas.

El bekchi  (la persona ke kontrolava las kayes de noche para ver si aviya ladrones, i lo mas para ver ken entrava ande, para kualo i por kuanto tiempo (!) i ke no saviya ni meldar ni eskrivir a vezes, ma teniya un baston i el derito de aharvar mizmo matar ken le paresiya (!!!)  era rey en akeyos tiempos…Todos se muriyan del sar de el i le davan  “bakshish” generozo para tener paz, ser “en buenas manos”, sin espanto de ser atakado o arrovado etc. Los ke veniyan a vijitar a akeyas personas ke  davan bakshish no eran persekutados, se les mostrava kavod etc. Los tiempos buenos ehhh !

Porke konti esto ?  Hehe… para dizir ke kuando se da “pueder” a una persona, esta va  “uzar” de su “pueder” fina el limito de alkavo !  I es a mozotros ke mos kaye de “sintir”  “ver” i  “azer atensyon” a estos limitos.  El Di-o, en Su Buendad i en Su “Hohma” sin fin dyo el pueder de juzgar, meldar Su Ley, kudyar el entorno i la natura,  a todos los seres humanos de la MIZMA manera.  Somos todos IGUALES para El.

Dunke… Kon korason limpyo si arrogamos en ke lingua ke seya, en ke lugar ke seya i kon ke biervos ke seya mos oye…. I si no kere oyirmos Bendicho es El, no mos oye !

Lo ke se eskrive en la laja es lo ke mozotros keremos dizir i meldar, dospues kuando vamos a “vijitar”.  Metemos nombres i alkunyas i datas para  saver ken esta i ande !  Muestros ojos serrados son tornados a Yerushalaim, la sivdad bendicha… En nada de tiempo kedaran solo los gueysos… Si el mundo egzistara en otros 2 000 anyos, vana estudyar puedeser estos gueysos para entender  x, y, z… Komo lo azemos agora kon las mumyas  ! Ensima de los simetaryos (kadosh !)  va aver puedeser lugares para divertirse… eskolas o moradas…  Ken save komo va ser el mundo alora….No… De vedra…. Ke me digan…. En miles i miles, sien miles, milyones de anyos, kualo es la importansya del simitaryo entero… Ande kedo la importansya de lo ke esta eskrito ensima de la laja !….  Ke laja tienen los ke se muryeron en la mer i se izyeron komida para los pishkados o se kemaron i se izyeron siniza en los grandes fuegos ke “komyeron”  sivdades !  Los milyones de muestro puevlo ke tienen una sola laja para dezinyar komunidades enteras ets.. ets…

No se si puide “dar” aki ke manera de “polviko” somos…. I kon todo esto do muncha valor a una fraza en fransez ke dize  ”  Dans la nuit obscure, une toute petite fourmie qui avance sur le marbre noir….Dieu la voit ! ”  ” El Di-o ve en lo eskuro de la noche la ormigika ke kamina ensima del marbol preto ! ”

Vidas largas kon alegria i salud para todos

Amen

sharope,[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorComité Central: a 25 años del atentado contra la AMIA
Artículo siguientePresident Of American Academy Of Pediatrics Calls Trump Border Policy ‘Child Abuse’
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.