Diario Judío México - Primero de todo kero reingrasyar mis keridos amigos, ke no me manken, de las varias sivdades de los …. Mis amigos de otros payizes tambien ke me azen saltar de plazer en envitandome a azer viajes maraviyozos…. Me gusta i a mi resivir mis amigos en mi kaza i los aresivo a brasos avyertos.

Esta vez me invito una amigita de New York. New York ke no konosko i nunka tuve la oportunitad de vijitar. New York de mis suenyos….. La mas grande del mundo… Ma no…Malorozamente no vo pueder realizar este suenyo ! Me viene muy difisil mizmo de irme ande mi ijiko regalado ke bive en Londres. No suporto las horas muy largas en el avion i todo esta kanserya del viaje. No… No va pueder irme, ke pekado. De toda manera preferiya viajar sola, ir ande kero, por el tiempo ke kero i konoser el lugar komo una ke paso su vida en akel kanton de la planeta ! Por esto me gusta pasear en las kampanyas, en los lugares mas arekojidos de las grandes metropoles ande se puede konoser mas gente, avlar la lingua del payis i azer parte del puevlo. Gosti este keyf en munchos payizes de Europa, en i en Turkia por seguro. Me rendi kuento de este plazer kuando eramos studentes i pasavamos de diversas maneras de la Suissa a Italia para lavorar en las fermas en arekojyendo frutas i verdura i mizmo durmyendo en las granges kon los animales ! I no es por esto ke no ivamos a baylar i pasar un buen tiempo las noches de Shabat i el Alhad. Eran tiempos maraviyozos de aventura i de divertirse siempre, riyendo, kansandomos ma felises fina el sielo !

New York seriya para mi gigantesko, sin empesijo i sin fin para mis piernizikas kansadas i mis bolsitas no tantas aunfladas ! Porke; ke plazer ay de ir a este metropol tan leshos sin vijitar las otras sivdades del payis, los miles lugares de interes, i lo mas importante el Disneyland i otros biervos majikos ke vide al sinema, meldi en los livros, todos avlan ! De toda manera so aedada i serri mis maletas por siempre… Solo lugares serkas ande no va tener la tentasyon de ver mas i mas !…Para no dizir “NO” a mi ijo i a mi ija ke adoran las vakansas kon mi a sus lado ! Komo refuzarles mizmo si es un dezrepozo para mi ?

Si era manseva, me iva ir i iva kontar las ormigas ke salyeron a pasear en el Central Park ! Ver el Metroplitan, entrar en los grandes Malls para merkar un jeans (mizmo si fue importada de la Turkiya porke es ansina ke azen !), kon un tishort amerikano ! Me iva asuvir a la damma de la Liberty, fina ande tiene su korona i no mas ariva!! I lo mas, iva entrar en un restaurante ande se kome un steak de medyo kilo kon patatas fritas !

New York, New York ! Fuites el mirakulo del Muevo Mundo. Todos kijyeron yegar a ti en fuyendo una Europa en flamas…. Una sivdad ande todos eran iguales i no eran persekutados por ser pretos, amariyos, judyos, hindus.. En un payis de miles de oportunitades ke ofresyo sus rikezas a todos ke lavoraron fina dar sus almas para reushir, dar a sus desendensya lo ke eyos no tuvyeron, el dinero, el repozo, la paz…. I Di-o lo kijo! Les dyo rikezas, son los leaderes del mundo kon todo bueno en sus tierras….

Kon karinyo
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorACOM insta al Gobierno de España a suspender fondos transferidos a UNRWA
Artículo siguiente“Main Veg” (My Way), una joya desde Italia
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.