Diario Judío México - EL FUEGO DEL AMOR…

No, no kale aboltar la oja dayinda…. Aspera ! Pensa por un momento ke todo okurre por kavzo de un fenomeno chimiko, unos hormones ke salen lokos i empesan a vazyar a la sangre unos ingrediantes ke mos azen ver nuvlas roz, solevantan lagrimas de krokodil, mos tapan la gana de komer i mos vemos supito kon un disko bozeyado en muestro meoyo ke kanta otra otra i otra vez, i mas, la mizma mizma mizma kantika, nombre, biervos i mareyozzzzzzz !!!! Lo yaman amor ma es una hazinura ke no se kura kon el Aspirin !

Pensates un momento a la persona ke mos asemeja, unika en el mundo,
el mas….. la mas….. no es mas ke un mizmo kadavro vistido de karne i ke munchos otros no topan en el/eya nada de ezmayar ?

Ayyyyyyyyyyy… Yo so tambien una trololo no muy diferente de estos grandes romantikos del siglo 19 ! Me mankan las fustas largas largas kon las dantelas i los volanes i estos chapeyos ke dainda se ven en los kursos de kavayos de ASCOT !!!! – Trololo los Inglezes tambien !-

Lo ke me plaze es un mirakolo ke se produize en mi ! De tan loka bolada i maraviyada i hipnotizada ke me siento kuando todo va bien (kije dizir ke esto enamorada) me veygo amnezika, ke no se akodra de nada kuando el amor se va, mizmo sin tornar su kavesa !

Ayyyyyyyy ke me adoro yo por la personika ke so ! Regalo de los sielos vo lo digo ! Ni yoros, ni mauyos, ni dolor de korason ni araskinas en la espalda ! Eskapo ? A la hamaya ke se vayga ! Reingrasyar el destino por esto porke kuando una puerta se serra sien otros se avren !
(Kuando los keres avrir !!!! Yo barminam vo serrando puertas i ventanas ande veygo ke ay un poko de avyertura o de ayre ke entra ! )

Ma el amor lo adoro ! De leshos !!!! No para kemarse i tornar en una persona dezmeyoyuda ke no save kuando es el Martes i el Mierkoles !

Al lugar de pensar komo aflakar la gente i mil otra bua, ke maraviya
iva ser si los scientistos bushkavan una kurika para amahar los fuegos
del amor… Ay lokos ke van fina el suisidyo por esto ! (El Di-o ke les de meoyo bueno…) De vedra ke los mansevikos estan munchas vezes en pena intolerable porke una Rozika o un Nisimko keren separarsen, toparon otro amor o no les kedo mas amor !

Ah si jeunesse savait et vieillesse pouvait ! No solo en esto, por seguro, ma para todo ! Olam afuh ! Yalanci dunya ! It s indeed not a garden of roses…. Ma ay un sekreto ! Todos pueden trokar sus vidas i bivir en ganeden si lo keren… En este mundo ! No por sedaka en el otro , a la hora buena…

Todo empesa i eskapa en la miente ! No ay fuersa komparavle a la miente del benadam/persona. Kale saver azerlo fonksyonar i por esto, vale la pena de un poko de esfuerso…. (o unas batterias o vitaminas.!..)

Di-o ayuda muy muncho i mos da un graniko de SU fuersa sin limitos
kuando tentamos de lograrlo ! SI !

A vous de jouer ! Your turn !
Kadima ! Haydiiiiiiiii !

Kon karinyo

Sharope blanco

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.