Diario Judío México - Diario Judío México

 

SON GIGANTESKOS PORMODO DE TANTO MONEDA KE ENTERRARON EN SUS PAREDES.   SON MAS ALTOS DE LAS NUVLAS EN VEZES  !

 

Las sivdades de los payizes en los kualos ay muncha gente kon sus kashas yennos de oro i Dolares, Euros ets.  se transformaron en sivdadas fantomas ke asemejan de mas en mas a estas sivdades ke mostravan en los filmos de siensya fiksyon i ke nunka pensavamos ke puedriyan ser realitad un diya o por seguro no en muestra egzistensya !  Kualo kedo ?  Hombres kon kuernos, ojos redondos, orejas puntudas barminnam i otomobiles bolando… I esto va vinir en serka… Avlo por los  otomobiles i no estos seres de planetas ajenas !  Unos kreyen ke egzisten i ke ay vida en otras planetas….   No lo savemos dayinda por sierto i para la imajinasyon tambien no ay limitos komo por la ambisyon….  Me akodro de los tiempos ke estava en el kolejyo dayinda i ke le aviya demandando a mi amiguito avlando por telefon  “Pensas ke un diya la gente puedran avlar por telefon en viendosen ?  Un vizifon ?  ”

Dayinda no saviyamos nada de la Televizyon!  La radyo egzistiya en su muy vieja versyon.  Pensar solo a esto paresiya ser trololo !  Viniyamos solo de arresivir el telefon a kaza…. Se asperava unos diez anyos i mas para ke venga el torno.  Oy me parese komo tiempos prehistorikos….

RAZGA-SIELOS MAJESTUOZOS EN EL MUNDO MODERNO se estan fraguando sin kedar….  I savesh ande se topan estos batimientos de miliuna formas ekstraordinaryas lo mas ?   En los payizes del Gulfo Arabo !  Son en estos ke apegan sus Petro-Dolares… En los lagos i las izlas artifisyales ke entontesen la miente !  Un lukso kon la imajinasyon solo por limito.  Malhorozamente, no les interesa investir el benefisyo  de lo ke la TIERRA  les regala en el bien-estar de las personas, dar a komer a los ambiertos, fraguar eskolas i hospitales, adelantar la siensya i azer estudyos…. No !  Son projektos de los muy rikos para los mas rikos del mundo !

Mi mamita, en Ganeden agora, diziya  SOLO LA TIERRA PUEDE ARTAR EL OJO DE LA PERSONA. NO AY LIMITO A LOS DEZEOS I  A LA  AMBISYON.

Yo digo ke es unikamente la Buendad i el Amor  ke son las yaves de la egzistensya.. Son estos ke avren las puertas de la felisitad en Este Mundo i el Otro ! Dingun lukso, dingun dinero i dingun poder puede dar satisfaksyon al humano… Ma solo dezeyos a los ke no lo tienen i ke figuran ke es la sola koza ke les manka !   Ke yerro !  Si solo lo saviyan….. OTRO GAYO LES KANTARIYA !

Di-o no kave a las Sinagogas, a las Eglisyas, a los Templos i a las Mezkitas….  MORA EN EL FIRMAMENTO, EN EL MUNDO ENTERO I EN LA ETERNITAD, DE SIEMPRE FINA SIEMPRE, EN TODOS LOS LUGARES EN

MIZMO TIEMPO…. No ay dinguna diferensya, para rogar i alavar el Todo Poderozo, entre la guerta de una kazika i la mas grande katedrala o la chikichikitika  meskita del mas chiko puevlo a la mas grande Sinagoga del mundo, mizmo si esta

es entera de oro i los mas savyos saserdotes azen los servisyos aya…..  No son “los objetos de ritual”  la kandela, los livros, los vistidos, los chapeyos, la kolor “preta”, o resitar miles de vezes las mizmas kozas (mizmo sin nada entender !)  ke kontan por el Sinyor de este Mundo i el Otro !  Es el KORASON LIMPYO, la ALMA, el HESED,  el AMOR, la JUSTISYA, la DERECHURA,  la VERDAD, la SINSERITAD, el ESFUERSO i la DEDIKASYON DE LA PERSONA AL

BIEN-ESTAR DE LOS OTROS  ke kontan !  Nada mas…. el resto es una PROPRIA SATISFAKSYON, tener el sentimiento de plazer a Di-o  (I mas al Rabino de la Kehila ke se siente mas importante kuando la gente azen lo ke les dize

de azer !)

Las tradisyones Judiyas son para aunar la Kaza de Israel, guadrarlos endjuntos para ke se multiplikan  entre eyos, no seyan dispersidos entre los “goyim”  (OTRAS NASYONES) asigun las Leyes ordonadas  por DI-O   i lo mas por los leaderes, profetas, saserdotes,  rabinos, hombres de profesyon relijyoza en akordo kon las nesesitades de los tiempos antiguos, los vizinos idolatros de Bnei Israel, las hazinuras en esta rejyon kaynte sin muncha agua a proximitad, el entendimiento de un puevlo intelijente ma sin kultura i edukasyon del todo (komo los otros puevlos tambien..) , mizmo el fakto de no ser un puevlo de guerreros i sus espanto de guerreyar i kombatir el enimigo, sus multiplas peryitas en las batalyas kon los ke los

attakavan…. ( Di-o mo los va entregar entre muestras manos i se van a render en viendo el Tabernaklo !)   I…. No es ke no afito mirakolos tambien komo la fuyida delantre de  PHARAON  i el passaje de la Mar Kolorada o la viktorya de JERICHO  ets…

 

Mas de ser un Livro de Relijyon,  LA BIBLIA es un Livro (Santo) de  Historya de un Puevlo ke deviya bivir asigun los Mandamientos, i no siempre  ser un Puevlo de Rebeldes, indo kontra la voluntad de Di-o, resivir SUS kastigos i kavzar SU Ravya..

 

La Historya sanglante de un Puevlo Eskojido ma ke no supo bivir asigun esta alta pozisyon a SUS ojos.. Un Puevlo ke malgrado todas las katastrofas puido lograr su proprio mizmo payis atras dospues de 2000 anyos de dezgrasyas en la Diaspora !  Parese ser un otro mirakolo… Un mirakolo ke devriyamos saver komo prezervar sovre TODO !   AM ISRAEL HAY VE KAYAM AD HA NETSAH !

 

[email protected]