Perdonar I Esperar

Por:
- - Visto 239 veces

Diario Judío México

EL PERDON

Di-o mio
Dame fe para siguir adelantre
Enfuersa mi alma para ke pueda perdonar
Dame pasensya para komprender i esperar
Dame serenitad para akseptar las kozas ke no puedo trokar
AMEN


Perdonar NO es OLVIDAR
Dar razon o minimizar, ni mizmo rekonsiliarse
Perdonar es un proseso personal sin asperar nada del otro.
Perdonamos para mozotros para no kedarmos apegados al pasado !
Perdonar es avansar i no deshar ke lo ke tanto mos firyo en el pasado
MOS MOLESTE, MOS DETRUIZGA EL PREZENTE…
EL PERDON ES LA MAS GRANDE VENGANSA….. Ma….

No se kuantas personas son sinseras kuando avlan del pardon a los ke mos firyen, keren muestro mal, kavzaron desgrasyas en muestras vidas… Mos izyeron yorar, pierder valores morales, fizikas i materyal.. Todo modo de personas sin korason i sin sentimientos humanos, sin piadad… Negros por el plazer de ser negros !

Konosko personas, si se puede dizir ke son personas, de este kalibro !.. I ke pekado ke NO SON raros… A empesar de muestros vizinos keridos, primos ke se mensyonan en la Biblia ! Los Filistinikos de mas en mas simpatikos kon el maraviyozo HAMAS en sus kavesa !… (Los vere mallogrados por la negregura ke mos azen i todos los dolyos ke kavzan ! Sus mintiras i sus krueltad mizmo para si mizmos !)

No kreyo, en el fondo de mi korason ke koza asemejante puede sinseramente okurir i pardonar a este modo de gente ! Es kontra la natura ! I todo lo ke es kontra la natura no es normal… Yo so entera azukar, miel, perdono todo, no guadro renkor, olvido la pena ke me dan…. Ma ay kozas graves ke uno no puede olvidarse i dizir “Bueno.. Ya paso.. Me izo esto ? No embarassa !” ets. Avlo de las miles de madres ke peyeron sus ijos de la mano de estos mallogrados ! Kreaturas sin padre, mujeres sin maridos, ermanos muertos ! Tantos i tantos kavzos asemejantes i mizmo sin ir a las frontieras, aryento de siertas famiyas ! Avlo de la Shoa ke mos korto las alas i se englutyo el tierso de muestro puevlo…. I ke pensan los Japonezos de las bombas atomikas echadas a Nagazaki i Hiroshima ? Kuando dos grandes sivdades Japonezas se izyeron sal i siniza i las konsekuensyas se ven dayinda.. Firyen….. Keman….
Digo yo, Sharopika, ke ay kozas ke se pueden i se deven de pardonar i otras ke NO ES posivle de pardonar mizmo si se kere !

Alora todos los sermones ke deskriven el perdon komo koza imperativa en muestra egzistensya deven pensar doz vezes kuando avlan del perdon…. Es fasil de impozar el perdon a las personas firyidas de la parte de akeyos ke no konosyeron ansina de dezgrasya… La vida no es solo teoriyas… Ay i la pratika ! Si la persona grita de dolor es ke no puede suportar mas ansina de dolor…. Mi manera de sintir las kozas unikamente…..

NADA ESPERAR, EN ASPERANDO SOLO KE VENGA LO BUENO…..

Solo ke ay diferensya entre “KERER” i “AZER”. I es una grande kontradiksyon ! Ser optimisto en pensando kon pesimizmo para ser agradavlamente sorprendido kuando todo sale mijor de lo ke se penso, o no konoser el amargo DESAPUNTAMIENTO kuando, en vezes, las kozas rezultan diferente de lo ke dezeyavamos….

Kuentizikos i historyikas de muestra chikes mos ambezan a konoser la alma humana, la vida, lo bueno i el mal… Tener fantaziyas i ambezarmos a ser felis kon lo ke mos puedemos imajinar….

Yo so una de las raras personas ke puede ser felis kon “Sharope blanco”, no enfasyarme si no ay dingunos en mi entorno, no tener menester de salir afuera o bushkar divertimientos… Mos riyimos siempre kon mi ijo ke me demanda “Kualo estas azyendo mamita?” i da la repuesta el mizmo a su kestyon : “You are staying !” (Te estas kedando !)

No me gusta kerer remeter a mas tadre lo ke tengo de azer… Portanto es lo ke me afita… Sin kererlo ! Grasyas al Di-o es un dezrepozo ke no tiene konsekuensyas gravas i max. tiene restriksyones sosyales o paresidos… Es mi Amigo en los Sielos ke me aze koshkiyas de vezes en kuando dizyendome “Sos humana i te esto arregalando demasyado. Kale ke tengas i tu parte de inkomodasyon en la vida… Ambezate a tener limitos i restriksyones komo todos ! No se bive ansina komo un Mustang salvaje, azyendo todo a su kavesa…. O komo tus gatikos ke no les importa nada porke no tienen ni friyo ni kalor, ni ambre ni ser…” Bendicho seya EL i Su Nombre Santo…. Es todo para muestro bien…. Ni me akodro para kualo eskrivi todo esto! Deviya de tener una koza en mi kavesa ma…. me se bolo ! Si me akodro vos dire kualo era… Ke konoskash siempre, siempre el Bien i nunka el amargo.

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: