Todo empeso kon el peleyo a manos de dos hombres de Syria, refugiados ke moravan en Yuregir – Kiremithane Mahallesi, un kazal de la sivdad de Adana en el sur de Turkiya. El uno se ezmayo de los punyos ke arresivyo. La polisiya dyo alerta al Departamento de los Krimenes Organizados en relasyon kon las Ovras Antikas signalando ke una ovra historika se topava en el lugar ! Se tratava de una kasha Judiya de madera de 50 santimetros de alto ke se avriya kon dos silindros de arriva i dos kashones, arriva i abasho i toparon una mano de Fatma, la Hamsa i la estreya de David en estos. De los silindros salyo objetos de bronza detenyendo los kueros de gazelas sovre loskualos aviyan eskrituras en Hebreo. Aviya una figura de hombre i una figura de mujer en la kasha.
La kasha estava dekorada kon rubies i esmeraldas i si esta ovra era otentika, tendriya una valor inestimavle. Se embiyo la kasha a la Ofisina de los Muzeos para investigar la otentisitad del objeto relijyozo i historiko.
Se tiene la konviksyon ke kon la guerra sivil en Suriya, la kasha fui rovado de un muzeo. La polisiya investiga tambien komo esta kasha entro en Turkiya
El hombre Halil El Hadj fue somettido a un interrogatorio i disho ke merko la kasha por 4000 Dolares de un Syriano porke le plaze objetos antiguos ma ke pensa, el, ke no se trata de una ovra otentika !… El hombre se esta juzgando sin meterlo en prezo ma debasho del kontrol de las fuersas de sekuritad.
Kon karinyo
Artículos Relacionados: