אָכן שוידערלעכן אַטאַק אין דזשערזי־סיטי דינסטיק איז נעכטן בײַנאַכט פֿאָרגעקומען צוויי האַרץ־רײַסנדיקע לוויות פֿון די ייִדישע קרבנות, משה הערש דויטש ז׳׳ל און לאה מינדל פֿערענץ ז׳׳ל.

טויזנטער מענטשן זענען אַרויסגעקומען אויסדריקן זייער צער אין וויליאַמסבורג, וווּ מע האָט געהאַלטן הספּדים פֿאַר משה הערש דויטש ז׳׳ל און באַגלייט דעם אורן דורך די גאַסן.

אין דזשערזי־סיטי איז דער גאַנצער חסידישער ציבור אַרויסגעקומען באַוויינען דעם מאָרד פֿון לאה מינדל פֿערענץ הי׳׳ד, אַן אייגנטימערין פֿון דער אָרטיקער כּשרער שפּײַזקראָם, וואָס דינט ווי דער סאַמע־צענטער פֿונעם אָרטיקן ייִדישן לעבן. איר אַלמן, משה פֿערענץ, האָט זיך צעוויינט אין מיטן פֿון זײַן הספּד ווען ער האָט דערמאָנט, ווי זײַן טעכטערל דבֿורהלע האָט בײַ אים לעצטנס געפֿרעגט, „וווּ איז מאַמי, ווען קענען מיר זען מאַמי?‟

„דו האָסט אַ שמייכל געגעבן פֿאַר יעדן‟, האָט ער ווײַטער געזאָגט, נאָכן דערקלערן, אַז דאָס פּאָרפֿאָלק האָט זיך באַזעצט אין דזשערזי־סיטי, כּדי צו בויען אַ בעסער לעבן פֿאַר זייערע קינדער. „מײַנע טײַערע קינדער, מײַנע אוצרות. ביז אַהער האָט דער רבונו־של־עולם געזאָגט, אַז מאַמע זאָל העלפֿן, מאַמע זאָל אַלעס טון. אָבער איצט האָט דער רבונו־של־עולם געזאָגט ׳ניין, קינדערלעך, טאַטע גייט פֿון אײַך קעיר נעמען (אַכטונג געבן)׳.

https://forward.com/yiddish/436388/videos-funerals-of-jersey-city-victims-moshe-deutsch-and-leah-mindel/

דזשערזי סיטי האָט געגעבן חסידים האָפֿענונג אויף אַ בעסער לעבן

דער ייִדישער ייִשובֿ אין דזשערזי סיטי, ניו־דזשערזי, וווּ ס׳איז דינסטיק פֿאָרגעקומען די מוראדיקע שיסערײַ, איז במשך פֿון די לעצטע פֿינעף יאָר פֿאַררעכנט געוואָרן ווי אַ מקום־מיקלט פֿאַר וואַקסנדיקע חסידישע משפּחות וואָס קענען נישט אויספֿירן דאָס הויכע דירה־געלט פֿון די ברוקלינער וווינונגען.

דאָ האָבן עלטערן, סוף־כּל־סוף, געקענט קויפֿן אַ הויז אַנשטאָט דינגען דירות דאָס גאַנצע לעבן. דאָ האָבן קינדער געקענט שלאָפֿן אין אַן אייגענעם שלאָפֿצימער אַנשטאָט זיך טיילן דעם צימער מיט אַנדערע שוועסטער און ברידער.

די חסידים וואָס האָבן זיך דאָ אַרײַנגעצויגן אַרבעטן בײַ אָרטיקע פֿאַבריקן ווי די פֿון דער כּשרער שפּײַזפֿירמע „קדם‟ אינעם שכנותדיקן שטעטל בעיאָן. אַנדערע קענען יעדן טאָג פֿאָרן צו זייערע שטעלעס אין וויליאַמסבורג מיט אַ חסידישן אויטאָבוס. קליינע קינדער קענען זיך לערנען אין אַן אָרטיקן חדר בעת די עלטערע קינדער פֿאָרן מיטן חסידישן אויטאָבוס קיין ברוקלין.

Leer más: https://forward.com/yiddish/436385/jersey-city-gave-hasidic-families-hope-for-a-better-life/