El Sentro Naime i Yeoshua Salti kumple 10 anyos de aktividad

Por:
- - Visto 736 veces

En komparasion kon los otros lugares del mundo, Israel es el paiz onde bive el mas grande numero de sefaradis. Este es tambien el paiz onde el ladino i su kultura son lo mas estudiados i investigados en universidades i institutos diversos.

Aun kon esto, los ke se dedikan a la konservasion i promosion de esta kultura konsentian, asta a penas 10 anyos atras, la falta de sentros akademikos kon resurses bastante grandes para poder finansar los numerozos proyektos i aktividades de los kualos ay menester afin de poder reushir en sus tarea.
No es ke no avia, asta entonses, ninguna aktividad en este kampo. En las prinsipales universidades del paiz ya avia kursos de ladino i literatura djudeo-espanyola, ma sus aktividad era limitada por la falta de apoyo de sentros i institutos ke tienen a koro la konservasion i promosion de la kultura sefaradi, i ke pueden ayudar a esta aktividad del punto de vista finansiario.

Esta situasion se troko radikalmente, 10 anyos atras, grasias a la jenerozidad de la Fondasion Salti, de Israel, ke permetio de krear serka la Universidad Bar Ilan, un Sentro akademiko – el Sentro Naime i Yeoshua Salti para Estudios del Ladino – dedikado unika i ekskluzivamente al ladino i a su kultura.
Grasias al apoyo de este sentro, el Departamento de Ladino en la Universidad Bar Ilan, dirijido por el Prof. Shmuel Refael, pudo lograr en este periodo una seria de alkanses impresionantes en los kampos de la edukasion, investigasion, organizasion de enkontros i kongresos i enfin, publikasion de livros i artikolos sovre aspektos diversos de la kultura sefaradi.


En el kampo de la edukasion, por empesar, fueron ancheados konsiderablemente los temas estudiados ke inkluyen aktualmente lengua, literatura, folklor, istoria, muzika, etnografia i bibliografia del Djudaizmo Sefaradi. Paralelamente a esto pujo tambien el numero de los estudiantes, en los diversos niveles de la formasion akademika. Asta agora ya fueron diplomados de este sentro 12 estudiantes kon grado de M.A. i 8 kon grado de Ph.D. En el anyo koriente ay 7 doktorantes i 8 estudiantes para grados de estudios avansados, lo ke mete a la Universidad Bar Ilan en el primer rango de los ke estan formando una mueva jenerasion de luchadores i aktivistas para la kontinuidad de la kultura djudeo-espanyola.

En desparte de los kongresos i enkontros akademikos internasionales a los kualos partisipan los investigadores, ensenyantes i estudiantes del sentro, el organiza semejantes enkontros en Israel tambien, komo la 17ena Konferensia de Estudios Djudeo-espanyoles, ke tuvo lugar el anyo pasado, en la Universidad Bar Ilan; los muy populares Maratones de Ladino ke son organizados kada anyo, kursos dirijidos a la komunidad de ladinoavantes en el paiz, komo la seria “La Biblia en Ladino” etc.

En el kampo de la publikasion se puede sitar la revista “Ladinar”, ke su sieten numero sera publikado serkamente, ansi ke la partisipasion en la publikasion de los livros: “Sidur para mujeres en ladino” de Ora (Rodrigue) Schwarzwald; “Estudios sefardies dedicados a la memoria de Jacob M. Hassan” de Elena Romero; “Ven te kontare” de Michal Held; i “Un grito en el silencio” de Shmuel Refael.

Todo esto fue posible grasias al ayudo finansiario del “Sentro Naime i Yeoshua Salti para Estudios del Ladino” ke ya dio a la Universidad Bar Ilan, en los 10 anyos de su aktividad, la suma de 600.000 dolares i prometio de dar, asta el anyo 2023, otrun milion.

La inisiativa de krear este Sentro es muy importante en primer lugar por este ayudo a una universidad onde es echo un lavoro de grande valor para la konservasion i promosion del ladino i su kultura; ma no menos importante es tambien el exemplo ke fue dado a los filantropos sefaradis, para ke ayuden en una mas grande mizura a la fondasion de semejantes institusiones ke pueden kontribuir i ayudar a los esforsos afin de salvar del ulvido a sus kultura ansestral, mantenerla ainda biva i transmeterla a muestras sigientes jenerasiones.

En apresiasion a esto, al 21 de Mayo sera akordado al fundador del Sentro, el Sr Yeoshua (Selim) Salti, el titolo de Dr. Honoris Causa de la Universidad Bar Ilan, distinksion ke el merese i es altamente djustifikada i por la kuala adjuntamos aki muestras mas kalorozas felisitasiones.

Foto: De siedra a derecha: El Sr. Yeoshua Selim Salti, el Prof. Moshe Kaveh, prezidente de la Universidad Bar Ilan, i el Prof. Shmuel Refael, Shefe del Sentro Yeoshua i Naime Salti.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: