Estimado sinyor Yitshak Navon sinken Prezidente del estado i prezidente de la Autoridad Nasionala del Ladino, su ekselensia Fernando Carderera embasador de Espanya, onoravle asistensia, amigos keridos ladino avlantes, buenos dias, iyi gunler, bon jorno, kalimera, bonjour,dobro yutro, good morning, bon di ve boker tov.
En esta dia solemno, emosionante , me faltan los biervos justos para eksprimar mi alegria, mi felisidad en esta selebrasyon primera del dia del Ladino mondial. Idea maraviyoza propozada por mi amiga Zelda Ovadia, i sostenida en Israel por el sinyor Moshe Shaul viche prezidente de la Autoridad del Ladino, por la Autoridad del Ladino i por mozotros todos. Un grande ‘toda’ a Linda i Yitshak Sagol por ser los sponsores del dia.
Esta manifestasyon es la mijor repuesta a los ke pensan ke muestra lengua tanta ermoza i antigua esta agonizando. Eya esta biva i mozotros prezentes aki somos los testigos en Israel, onde biven los mas de sefaradis ladino avlantes del mundo. El idioma i su kultura biveran, si mozotros todos las praktikamos i miramos de transmitirlas a la jenerasyon siguente. Ainda baten en muestro korason sintimientos de amor por esta lengua, su literatura,sus kantes, kuentos i refranes i estamos siempre prontos para luchar para su futuro. Grasias a la La Otoridad del Ladino, enstitusion del Estado, onde se aze un manyifiko lavoro de enkorajiamento a la kreasyon de ovras litererias i artistikas i a los 2 Sentros Universitaryos ke investigan akademikamente la istoria, la kultura, la musika, la arte vizual i mas.., penso ke vino el tiempo de dezvelopar mas anchamente proyektos para mentener muestra identidad por siempre. En esta okazion me permeto de mensionar el Sentro Salti para los estudios de Ladino, ke fondimos ay 10 anios mi mujer i yo en esta Universidad, la kuala es enkavesada por el renomado profesor Shmuel Refael, por sus grandes lavoros kumplidos durante este periodo. Sienes de estudiantes se ambezan el idioma en mizmo tiempo ke se forman muevos maestros, doktores. Se publikan livros i se organizan al nivel nasyonal komo enternasyonal kolokios. I este anyo engrandesimos la kapachita del profesorato, para pueder abasteser a la demanda de muevos estudiantes desidados de ambezarse i konoser el sefaradazimo en jeneral. Imajinavos ke mizmo estudiantes ashkenazis i arabos vienen i se ambezan muestro idioma. Ademas penso kon mi modesta opinion ke debasho del tejado de La Otoridad, se deve lavorar kon urjensya a pujar el nombre de sentos akademikos en seno de Israel. Todas las grandes Universidades deven de tener sentros de estudios sefaradis. Ovraremos para ke el Ladino sea ambezado mizmo fakoltativamente en las eskolas segondarias. De otro lado miraremos a profundizar las relasiones entre las komunidades sefaradis a traverso el mundo. Devemos de enkorajar muestros diplomatos i darles el apoyo nesesaryo para ke el Ladino finalmete aga parte del patrimonio mundial de las linguas.
Keridos prezentes,
Este dia del Ladino viene selebrado no solo en Israel, ma en munchas partes del mundo, en partikular en Espanya, en las Amerikas del Norte komo del Sud, grasias a personas komo Matilda i Rachel Barnatan, Rachel Bortnick i Liliana i Marcelo Benveniste, ke sin dingun apoyo material, organizan munchisimas aktividades konsernando muestra lengua i su kultura. Es largo de mensyonar aki sus lavoros, ma kreyeme para mozotros son djente irremplasavle i yo les oguro muncho sukseso.
A la fin vos dire ke este dia mos ayudara a demonstrar ke kon lavoro i amista podremos alkansar a muestros objektivos: el kerer guadrar muestra identidad i muestras raizes sefaradis. Oguro muncho sukseso a los organizadores i muncha alegria i plazer a todos vosotros.
Selim Salti
Artículos Relacionados: