Diario Judío México - Ni ke puediya pensar ke yo komeriya i no solo komeriya ma me tresaleriya de komer komida de apyo !…. Es justo si no me metiya a gritar kuando era chika i mi mamita trayia el grande plato del apyo a la meza ! Penso ke munchas personas no son enkantados de komer el apyo ! Ma esto es diferente…. Veryyyyyyyyyy diferente ! Por empesar no tiene dinguna golor del apyo i la savor tambien es otra koza. Es vedra ke el apyo, muy amigo del ilgado, se puede guizar de muy munchas maneras diferentes. Vos kontare komo ize mi primera komida de apyo ke me reusho tanto….

LO IZE KON NARANDJAS I BIMBRIYO.

Las frutas i la vedrura del apyo i los apyos mizmos se kortan komo la mitad del dedo. Kortar tambien dos sevoyas, una karota i una patata de la izma manera. Azer en el fondo de una kaldera bastante grande una kama kon las sevoyas, las karotas i la patata. Meter ensima los bimbriyos, el apyo, la verdura del apyo finamente kortada, i rondelas de narandjas…. Vazyar medya kupa de azeyte de oliva, sal, pimyenta preta i el sumo de un limon kon una kuchara de supa enteramente inchida de asukar. Una grande kupa de sumo de narandja, una kupa de agua.

La komida esta pronta kuando todo se emleska un poko i se aze blando.

ATTENSYON; Gostar para ver si ay bastante sal, si la komida esta agra-dulse komo kale ke seya, si la agua se entravo kuando kozyo… Es ansina ke deve de ser. Kontrolar si vos gusta el nivel de azeyte de oliva. Puedesh siempre adjustar los ingredientes asigun la savor de vuestro paladar.

La balansa del limon kon el asukar i el sal kon la azeyte es lo mas importante para la savor de la komida ! Si las narandjas estan agras puedeser ke no vash a nesesitar limon…

Las salatas de Apyo son muy savrozas tambien. Kale rayarlas finamente, adjuntar mayonez o yogurt kon un un poko de ajo. Sal i pimienta preta.

Se pueden rayar kon karotas, muez i prishil kon yogurt…

Se pueden rayar i azer una supa kon kaldo de karne en adjuntando un poko de arina + limon i gueyvo bien lavorado, lo ke dizimos “agristada”.

Apyo rayado kon karne tartikada, gueyvos, prishil, patata kozida i rayada .. Azer albondigas, echar a la arine i friyirlas dospues.

Ma a mi me plazen lo mas agra-dulse kon narandjas !
Bon appetit…..

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorMéxico e Israel, ahora más unidos gracias a Oaxaca, Ramat Gan y Andrés Roemer
Artículo siguienteUno más tres ene
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.