Diario Judío México - BOLTAN KON RAPIDES LAS OJAS DE LA HISTORIA…..

Estas dos sivilizasyones son muy viejas i muy amigas entre eyas.  Los Assyrianos  (ASUR)  son konosidos por ser un puevlo muy krual i se dize ke son los lordes de la guerra kon sus armadas muy ellaboradas, sus koches de guerra i sus kavayos i por seguro pormodo del entrenimiento i la vayensa de sus soldados.

Meldi un artikolo ke me intereso porke teniya muy pokas nosyones sovre de kualo se tratava…  Era un artikolo de Moses Alaca ke nasyo i fue engrandesido Armeni, i komo lo savesh, los Judyos i los Armenis bivyeron kon lasos muy estrechos en el emperyo Otomano puedeser porko los dos puevlos eran grupos mineritaryos  i eran buenos vizinos.

Asigun Moses, los Assirianos i los Armenis tienen las mizmas orijinas.  Sus kultura asemeja muncho i no solo en sus kuzina guizando  koftes ke son albondigas de karne pikada i las dolmas ke son ojas de vigna inchidas de aroz o de karne komo mozotros, los judyos, los turkos, los gregos etc..  Sus lingua es diferente ma sus relijion es kuaji la mizma sin mensyonar ke bivyeron en las mizmas tierras kon los mizmos monarkos governando sus payis.  Por egzemplo, el Patriarko Armeni de Konstantinopolis, en akeyas epokas, reprezentava tambien las iglesias Syrianas Orthodoksas, Chaldeanas, Nestorianas i Assyrianas, sin olvidar ke fueron los Assurianos ke trusheron el Kristianizmo a los Armenis antes del anyo 301 de muestra era.  Munchos de los santos de los Armenis son Assyrianos i Parthianos i todos los dirigeantes i los grandes del puevlo avlavan i eskrivian en Aramik.

SI mos vamos mas atras en el tiempo, deskuvrimos ke los Armenis i los Assyrianos eran muy liados.   La Dinastia Orantida  (Yervanduni)  ke era de la vanda de Cyrus el Grande de la Persia Archaemenida teniya alliansa kon Assyria.  Ma mizmo antes, en el pasado kon los Urartus, vemos ke Urartu estava estrechamente influensada por los Assyrianos.

En la mitolojia Armeni el prens Ara ke es assosiado al dio Aryano Ar, aziya parte de un trianglo de amor o una historya de amor similar kon la reyna Semiramis (Shamiram)

Los Sassunsi, los vayentes de Sason komo David de Sason, el grande Miher i el chiko Miher eran los bis inyetos de los dos ijos de Dzovinar  : Sanassar i  Balghdassar, los dos mensyonados por Moses de Chorene i en la Biblia komo personas historikas.    Eran los ijos del rey Assyriano Sennacherib.  Assasinaron sus padre i se eskondyeron en las montanyas de Armenia.  Fundyeron la Dinastia Artsruni ke se izo el klan el mas noble de los Armenis i muy probable son los reyes i los vassales de Vaspurakan – de la rejion Van -.

En los tiempos modernos akseptamos ke los Armenis i los Assyrianos,  (los unikos kristyanos de las sivdades komo Diyarbekir, Urfa Antep ets. ) son muy attados entre eyos i esto se entyende porke se kazavan  los unos kon los otros.  Formavan el 40-50 porsien  de la povlasyon de estas sivdades Turkas entre el Tigris i el Euphrates.

Dunke, no es dinguna koinsidensya si se egzaminan los  DNA, de ver ke son muy asemejados.  Lo mizmo por el puevlo Turko en el Este de la Turkia.  Son parte de la mizmo rasa.

VINIMOS A LA KESTION DEL GENOSIDIO ARMENI……. KE AFITO  ?

Por empesar no biviyan milyones de Armenis en el Emperyo Otomano….

Eran 1, 5  Milyon al empesijo de la Primera Guerra Mundial.  En 1923 kuando las guerras para fundar la mueva Republika Turka terminaron, eran al nombre de 800.000 – 900.000  lo mas, refujiados fuera de la Republika Turka i tratando de fundar la mueva Republika de Armenia en la Transcaucasia.

De esto deduktamos ke entre 1914-1923 unos  600.000 – 700.000 Armenis Otomanos se muryeron, lo ke mos da los mizmos shifros informados por el Governo Britanniko antes ke los nasyonalistos Armenis empesen a egzajerar en la kuantitad de muertos.

Kale dizir aki mizmo ke a esta epoka, el  nombre de los Otomanos Muzulmanos ke muryeron, era el mizmo i las prinsipalas razones de tantos muertos en Anatolia era la starvasyon i las epidemias.  Uvyeron masakros de los Armenis ma uvyeron tambien masakros de los Otomanos muzulmanos kavzados por los Armenis.

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anterior« L’Infidèle marocain » dans sa chanson « Le mythe des religions » : Nous naissons libres puis devenons des moutons
Artículo siguiente¡Superando los fracasos!
Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.