Diario Judío México - No !   No manka injustisya en este mundo  !  Al punto ke el “look masculin”  i los kaveyos  “a la garcon” i vistir pantalones al lugar de las fustikas i los fostanes tan femininos de un tiempo se izo moda solo del dezeyo de las mujeres de ser komo los hombres…  Se selaron !  Se selaron porke la vida del hombre es muncho mas fasil i konveniente i las diferensyas entre los hombres i las mujeres kavzaron la revolta de las mujeres a tal punto ke en munchas famiyas oy,  (en  Europa, porke no se lo ke se pasa en Amerika !)  son las mujeres ke se estan indo al echo i los maridos ke se estan kedando en kaza para mirar las kreaturas, gizar, azer el lavado i el fregado ets…

Estavamos mi amigita i yo en una ekskursyon kon motor, en mar en AYVALIK, a los bodres de la mar Aegee, un paradizo ke empeso a travar los turistos etranjeros tambien.  Las demanyanas, komo en munchos lugares ande la gente se van en enverano o por la enveranada entera, se meten en kamino grandes barkos, motores ke fina la tadre “kaminan”  las personas, se kedan en bodres enkantadores ande la mer es klara klara i un plazer de nadar….

La gente, famiyas komo amigos, no se konosen ma nase una amistad en pasando el diya endjuntos, kantando, nadando, komyendo todos al rededor de una mizma meza…. Es ansina ke konosimos a un couple Aleman kon sus dos kreaturas i kon los kualos simpatizimos.  Avlando de aki i de aya mos kontaron ke komo munchos de sus konosidos en Alemanya solo la mujer lavora afuera i el marido se okupa de las kreaturas i de la kaza…..  Me vino muy ekstranyo de oyer esto porke Turkiya es un payis muy chauvinisto i no egziste una mentalitad asemejante !  Mas tadre oyi munchas mas historyas idantikas de otras personas…. Ni me puedo imajinar la mujer en el salon mirando la TV o meldando la gazeta i el marido aparejando a komer i tratando de dizir a los chikos  “No agash bruido porke mami esta muy kansada i arepozandose agora…”

Ma…. Los mas del tiempo, antes de yegar a estos diyas trololos, ser hombre era la koza la mas fasil del mundo…. Alora ke la mujer lavorava del momento ke avriya los ojos la demanyana fina ke se durmiya dospues del marido !

El hombre se viste de una kamiza blanka bien planchada kon una ermoza kravata,  un pantalon kon una jaketa ke kayen bien endjuntos, kalsas de kolor eskuro i kalsados briyando i esta pronto por todo modo de aktivitad afuera de kaza !  No importa si es su echo, a pasear o ir al balo !  No ay de pensar i partir la kavesa para kualo se vana vistir… kualo ay de azer.  Se arapo i metyo un poko de kolonya ensima… Ya esta preparado por la mujer kon ken va salir o sus amigos kon ken va avlar solo de mujeres…los matches de futbol…de la bursa o de sus hazinuras kuando esta mas aedado ! Lo mas se va al kuafor para ke le korten sus tres pelos i medyo ! Agora ay manikur i mirado por la kara, masajes i munchos tipos de kremas kontra las rigas kontra el akne etc….Deke no ?  Les vieyene konfiyensya en eyos i se sienten pomponados i ermozos. A estos los yaman “metroseksuel”.  A mi me suona komo homoseksuel ma no tiene nada de ver…

El hombre ni tiene ke de pensar tres vezes antes de avrir la boka  al kontraryo de la mujer, ke tiene de saver kualo es politika – i no la de Washington ! – Dizir a vezes kozas ke no pensa, riir kuando tiyene ganas de yorar, azer todo lo posivle para mostrarse ermoza i manseva, mizmo si esto toma horas, kosta los ojos de la kara, es enfasyozo i a vezes endjida !  Estos pelos manko los vere ! Dizen  “El hombre i el lonso mas peludo mas ermozo ! ”  Dezmazaladas de mozotros !

La mujer tiyene ke ser fina !  Kontrolar sus gestos i su  avla…. entravarse komo la bamya ! Mirar ansinaaaaaaa  i una soriza ansinaaaaaaa i asentarse ansinaaaaa i kaminar ansinaaaaaa i por sedaka no ANSINA   i ANSINA    i ANSINA !!!!!   Ya me entendesh bueno lo ke kero dizir !  Barminnam !

El hombre kualo ? Le dize al lenyo “Vate mas aya ! ”  No no….No esto avlando de los janti hombres del Diario Judio !  Por seguro ke no !  Los muestros son todos korasonikos buenos, kultivados, finos, sharopes !  Naaa…. los otros !  Si si  eyos ke no konosemos ma ke son ansina !  Mis palavras van a eyos !  Ke de menester tengo yo de avrir mi boka no se !!!!

No ay fin al las angustyas de la mujer !  I sin avlar de esta koza luzya ke es parir i engrandeser ijos !  Esto es el bonbon de muestra vida !  Todo es ensima de eya …. Lo bueno es naturel….  El kusuriko (an error or a mistake)  se aze una montanya i va dar kuentos komo pekates i en ke infierno vaza ser djuzgada !

Para eyos todo es permetido..para mozotros ???

Oy veeeeee…. Sus palavras son ley de Moshe !  Sus repozos en kaza es sakrado… Aman ke no se kansen i no agan nada!  Se les rompe la unya !

Yo kijyera vinir a este mundo hombre !  Ma los hombres no saven la valor de ser hombres.  Me parese ke ay en una tefila una koza ke los hombres ringrasyan Di-o de no ser vinidos al mundo kome mujer !  Tenemos una relijyon realista !

Kale ezbafar en vezes en kuando !  Ya lo dishe !  Ma para kualo lo dishe ni lo se !!!!  Soy reyna de mi palasyo i no ay dingunos ke me deranjen, ni  una moshka ! (Perdon un moshko !!!)   Ay kozas ke se enklavan de negra manera en la kavesa  parese ….

Ya es puedeser sempatik koza de tener un buen amigo para la vejes i englenarse endjuntos….Ma los pletos i los inyervos…el manko de pasensya, la responsabilitad i el yugo, las ovligasyones i el korrer i enfasyarse…..Vale la pena ? No esto segura del todo !  Me parese ke mas i mas la mujeres independientes, kon karyera i intelijensya vana mirar kon friyo al kazamiyento !  Esto ya esta okuryendo de anyos, ma mas i mas va kedar en la historya !

Bueno ke ay la koza ke se yama  ” I…Ya me auzi ! ”

…I ke van azer los hombres ?   Ohhhhh  siempre va aver tontizikas ke vana servir los hombres…. I yo so una de estas !

Una soriza kayinte kayinte para todos i todas  aki.

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorSaqueo nacional
Artículo siguienteDas Phänomen als das Gesetz
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.