El esuenyo yega komo un regalo a mis ojos….
A ken avrire mi korason i vazyare sus pezgos ?
Traduizire mis sufriensyas i mis penas kon biervos ?
Mi korason bate komo las olas ke chaftan a las rokas
Enterrarse en kazas es mas negro de estar en tombas
No tener por kompanyia ke su propria kansada miente
Bever las lagrimas del vino dulse ke te mira de enfrente
I aogar avagar avagar el nombre ke se deryite…
Kualo era el amor ? Komo un pilishko en mis entranyas
Su boz yamando el no estando, i yo sintyendo sus karesyas !
Kualo era el amor kon las sinizas kuvijando las brazas
Un grito arazga la noche, la borraches de misas paganas.
So deskonosida en estos lugares, de ande vengo ?
Bushko mis espasyos, mi intimitad, lo dulse i lo amargo
Mis kantones goliendo el klaven, la kanela i la menta
Las golores i las savores de mis diyas de primavera
Oy no tengo salida, no tengo esperansa ni mizmo dezeyo
Prefero la oskuritad a la klaritad, el grizo ke kovre todo
No me interesa la gloria..No la kero ! Mi alma la rechessa !
Me yama el silensyo, las estreyas i el vaziyo ke mos abrasa…
Artículos Relacionados: