Es mi buen amigo de Sydney Australia ke me embiyo este eskrito ke me izo saltar de mi lugar… So leshos de ser un angelo kon alas i veygo mi sangre buyir kuando se trata del konflikto de Israel kon los Arabos en terminos pasifistos, lograr “shalom” komo sedaka ke se da a un debilitado o mendigo ! Meterse a los rodillas para demonstrar kuanto Israel tiene razon, las maldadas ke le izyeron i las razones ke tiene komo si esto no es savido por el mundo entero ! La persona se kesha al KERIDO MUNDO i yo tengo ganas de…….
Del Jewish News – Australia, por Rabino Raymond A.
Tengo la impressione ke no estas kontente de Israel en este momento. Ay muncha violencia i yamada para meter fin a la okupasyon illegal.
Kerido Mundo el fakto es ke se trata de un pedaso muy chiko de tierra ke fue siempre santo para los Judios. Esta tierra fue prometida a los Judios solamente i los Judios bivieron ayi miles de anyos. Son los solos indigenos. Solamente sus profetas kaminaron en la tierra i los Levites trusheron la orasyon al Templo de Yerushalayim.
Kerido Mundo, fina oy el puevlo historiko era los Judios. Los Arabos Palestinianos nunka reklamaron este nombre. Grupos diferentes de Arabos vinieron ayi del Egipto, la Jordania i otros payizes ke no teniyan la identidad nasyonal i lo ke los uniya era el odyo a Israel.
Kerido Mundo, los judios fueron produktivos i trusheron fertilidad i kultura kon la inspirasyon Tsionista. Los Arabos no tuvieron el mizmo entuziasmo i atakaron los Judios violamente por dekadas. Las Nasyones Unidas rezolvieron el problem en espartyendo la Palestina entre dos puevlos ma los Arabos lo rechesaron en atakando munchas vezes con la ideya de echar los Judios a la mar. En kada guerra Israel gano i estavan, malogrado esto, prontos a kompartir la tierra. Lo ke kerian los Arabos era ke se vaygan de ayi.. Partir ande ? A los payizes ke los eksterminaron ? Teniyan otra patria?
Kerido Mundo, en 1967 Israel les demando de no entrar en guerra i ellos ignoraron este konsejo. Israel gano.
No uvo okupasyon illegala. Guerras ke terminan kon un trokamiento de frontyeras es raro. Asegun la Ley Internasyonal Israel fue la sola nasyon a reklamar legalmente el “West Bank”, ma mizmo en 1967, Israel les ofresyo territoryos por la Paz. La respuesta fue “No paz, no negosyasyones, no rekonoser el Estado de Israel i no azer kompromisos.”
Kerido Mundo, el Konsilyo de Sekuritad no es un buen amigo de Israel. Egipto i Jordania i mismo otros paises Arabos yoran por los Palestinianos i no azen nada para amelyorar sus kondisyones en la edukasyon, por la salud, la ekonomiya, i la kualitad de vida…
Kerido Mundo.munchas vezes Israel izo propozisyones i la repuesta fue la Intifada, bombas de suisidyo, i rocketas. Izyeron grandes danyos a Israel, ma nunka reusheron a romper el espirituo de Israel. Israel va defenderse siempre.
Puedeser ke no es fasil para los Palestinianos. Sus leaderes preferan azerlos sufrir para ganar el suporte del mundo. Sin duda Israel mizmo prefera tener una situasyon en lakuala kreaturas Judias i Arabas jugen enjuntos. Mundo, mira a esta compleksitad i ayuda de manera mas konstructiva. Israel no se va ir a dingun lugar. Tampoko deshara a los enemigos ke maten Judios. Israel puede ser una bendisyon en esta rejyon si los Arabos ven ke es a sus aventaje de ser buenos vizinos….. Tener frontieras aviertas es mijor para todos.
Kerido Mundo,si tu puedes ayudar, azelo de korason.
——————-
Ayyyyyyyyyyy , kerido, mi bueno Shimon,
Me esto komyendo las unyas aki en mi kanton….. Ke pekado ke no esto en Australia para ir al buro de este sinyor i gritarle en la kara ke dayindo no entendyo nada, no konose los arabos, no save nada de lo ke se pasa en Israel, no tiene la minor ideya de la politika del mundo i de los planos de los leaderes…. El hombre es un pato sin meoyo i la bovedad le eskure de sus byervos. Komo sem atreve a eskrivir una enormitad asemejante ! Es pormodo de ansina de kavesas kalavasas ke sufrimos durante toda la historia i dayinda oy en diya !
Este rabino ain sangre en sus venas, otro un poko se va ir a la Katedrala Notre Dame, o a la puerta de la Sagrada Familya o a Buckingham Palace i al Time Square i va tender sus dos manos para demandar sedaka a los ke le echan puntas de pies !!!!! Di-o miyo Todo Poderozo…. Salvamos de estos trololos ke yevan Tu Puevlo a la Peryitad ! Ke no les salga mas palavras de sus bokas i ke sus manos no puedan eskrivir ! Ser, i no benadam, sin dingun orgulyo ! Ser sin savyedura i ke merese de ir al abatoryo al lugar de tomar dos armas en sus manos i ser el kuarto de lo ke los arabos son !
Yo, mujer de mil ermozos anyos me revolto, el, hombre no tiene verguensa i demuestra su debilitad a todos….. NO tiene mizmo palavras para dar koraje, vayensya a muestra mansevos…… Tfuuuuuuuuuuuu !
Mi kerido, demandas “Ke aprendyo el mundo de este artikolo ? ” TE lo dire yo kualo aprendyo ! “KADIMA ERMANOS…. VINO LA HORA DE AZER PROGROMES I MATAR A LOS JUDYOS !”
Bien ke mos mandates este eskrito kerido Shimon. Vemos a lo manko porke estamos en esta situasyon oy ! I dize el sin meoyo “KERIDO MUNDO, EKSKUZAME SI TE ENFADO…..” !!!!!!!!!!
Tengo menester de kolonya i de mi kurika de inyervos !
Karinyo
[email protected]
Artículos Relacionados: