Dos ekosezos (nombrados por sus eskasuras mas de ser borrachos todos !) desidyeron de montar un teatro en el kampo para ganar moneda en los mezes de enverano. Una piyesa de vedra muy savroza.
Lavoraron, sudaron, se ambezaron maraviya i kuando fueron prontos izyeron rpublisitad en todo los lugares para ke vengan gente a ver la piyesa en el teatro.
Nada… nadika… Dingunos no vinyeron ! Eskasos pinya ! No keren gastar grosh !
Muestros amigos asperaron asperaron i viyendo ke no estan reushendo pensaron a una ideya ekstraordinarya !
Akeya semana izyeron pankartas en todos los lugares
” REPREZENTASYON DEBALDES NOCHE DE SHABAT EN MUESTRO TEATRO ”
DEBALDES ! Fue el biervo majiko i una jentorya inkreivle se metyo en la kola para pueder entrar al teatro. Gritando, pushando tratando de pasar adelantre de espanto ke no los van mas tomar
kon toda esta jente. Se incho fina jente en piyes !
Diyeron la piyesa i todos aplodisaron.. Les plazyo muy muncho.. Mas aplodisaron i vino el momento de salir i tornar a kaza.
KUALO ES ESTO !!!!! Las puertas estan serradas kon yave ! Chaftan chaftan MIH ! NO SE ESTA PUEDIYENDO salir afuera! Grita una persona : La salida kosta 10 Luras Inglezas….
No diyeron otra reprezentasyon ma ya les abastava por este anyo i el otro !
Alegriyas ke tengash siempre….
Artículos Relacionados: