Devriya de ser muy interesante de meldar el livro de Rachel Mizrahi porke konta la epoka de muestra chikes i la de los nonos i nonas ke siempre guadramos kon karinyo en un kanton de muestro korason.
Lo mas del tiempo los judyos bivyeron en las grandes sivdades i en los mijores kartyes de estas sivdades…. Antes 100 anyos BALAT i HASKOY en Istanbul eran baryos populares ande los judyos se aviyan installado. Dospues ke se pasaron a GALATA, en los entornos de la KULA ke es la grande torre ka los Genovezes aviyan fraguado Balat i Haskoy eskayeron de los ojos. El sentro del komersyo i por konsekuensya las grandes bankas se avriyeron en la avenida de BANKALAR i en KARAKOY, el grande puerto de Istanbul. Es en Karakoy ke se topavan las kompaniyas de Aseguransya, los negosyos de los grandes merkaderes, importatores, magazenes modernos i la grande patiseriya BAYLAN. Era el inventor de la “PECHE MELBA” un dulse ke se aze kon yelo/ice cream i sheftalis (melocoton/peaches), nata ets… Los chikos adoravamos el shokolad en forma de pishkado, en forma de liras de oro, en forma de chadir (paraguas/paraplui), las mastikas (chewing gum) “kovboy” i “Golden” .
Es de ATLAS ke me merkavan los kalsados a la avyertura de las eskolas. Kalsados kayintikos komo botes kon samara de kodrero aryento… Sintiya buyir mis piezizikos, i entrava kon estos aryento de las aguas de las luvyas ke korriyan entre la kaye i el trotuar/acera/sidewalk. Era el mas grande plazer ke egzistiya i jugavamos kon los amigos a ken iva solevantar la agua en kaminando en los seles/chorros de agua lo mas alto !!! En kaza era la dezgrasya ke mos asperava dospues de este juego porke viniyamos enteros mojados eskuryendo, por seguro, korolados, tosyendo i la nariz komo fuente ! MA valiya la pena ! Ayyyyy komo valiya la pena… Mismo fregar shavon al tablo preto en elkual la profesora eskriviya no era tan divertido. Mos riyivamos kuando el tebeshir/tiza/chalk/craie se le arezvalava i no puediya eskrivir… I otras munchas kozas… Bueno esto todo era fina los 11 anyos !
En frente, en la koshe/eskina, el metro transportava la gente al TUNEL, al empesijo de la Grande Avenida de PERA el baryo el mas luksuozo de Istanbul kon todos los sinemas, retaurantes, teatros, joayeros, grandes magazenes de vistimienta, de tekstiles, de jugetos i de todo lo bueno i lo mijor…
Tadre en los anyos 50-60 los judyos se pasaron a SISLI i a NISANTAS. Era kuando empesaron a ser mas rikos. Los apartamentos se fraguavan kon ornos debasho para kemar el kimur (komur/karvon/charbon) ke kayintava la agua. Los buris (boru/pipe/tuyaux) yevavan la agua kayinte fina kada kamareta en las moradas. El tiempo de las sobas (estuvas, poele) aviya terminado. Ke pekado!
Era otra manera de keyf de vistirse allado de la soba dospues del banyo o kuando viniya a kaza de la kaye, entera entezada porke, al tiempo, los inviernos eran muncho mas yelados!
Andeeeeeeeee me arezvali kon las memoryas de mi chikes ke son tan tan presyozas komo las de todos i todas en estos anyos bendichos tan regretados, de los tiempos kuando puediyamos gozar de los abrasos i de los bezos de muestros paryentes…
Ke tengash todo bueno!
[email protected]
Artículos Relacionados: