Oy te vide,
Estavas triste
Kayado, kansado,
En tu kanton arimado
A lo vaziyo mirando
No se ke estavas pensando
Tu ventana estava avyerta
Estavas solo en la kamareta.
Te miri de leshos
Kije karesarte kon mis lavios
Meter mi kara a tu espalda
Sin ke me veygas
Sin ke lo sepas
Ke esto kon ti, ayi
Deskalsa, sin nada
Kon mi alma desnuda.
Mi mirada entro en tus ojos
Los tuyos a mitad serrados
Te rovi de ti !
Kije ke pensaras en mi
A los leshos
Ke boles ensima de los riyos
Ke pases montanyas i oseanos
Para yegar a mis lados …
Korason ! Toki tu alma…
Vide tus sentimyentos eskondidos,
La kolor de tus dezeos !
Vide komo me keriyas
Lo muncho ke me amavas…
Tus kadenas frente la imposibilitad
Tu silensyo por muestra amistad
Vide tu kayades i tu sinseritad..
Nadi en lo klaro de tus ojos komo los sielos
I en el oskuro de los misteryozos profundos
Vide danjerozas tempestas i ayres lokos
La serenitad del vedre en los kampos,
De las lagunas blankas en los leshos,
El fuego del amor konsumandomos…
Toki tu alma kon mi mirada !
Yo aki, tu bolando en tus suenyos dayinda…
Artículos Relacionados: