Yo no konosia la revista yamada “Reorient magazine” asta ke un amigo me mando el enlase a este artikolo:
Trata un poko de la muzika de las minoridades en Turkia, ma mas muncho de la sefaradi, i mos da a konoser Janet i Jak Esim (marido i mujer ke los konosko bien i los admiro muncho) ke kantan una maraviya los kantes sefaradis, i tienen, asegun el artikolo, el mas grande archivo de musika sefaradi en el mundo. Eyos avlaron el ladino en kaza, i kijyeron mantener la lingua atraverso la muzika.
Tambien konta por Sami Levi, el mansevo ke era el soloisto del grupo Sefarad (kon gitaristo Ceki Benshushan, i kontrabasisto Cemi Stamati) un grupo ke adjunto la muzika sefaradi kon la muzika “pop” turka, i entre los anyos 2002 i 2007 fue muy popular en Turkia, ansi ke entre los turkos afuera de Turkiya. (Yo merki sus CDs del aeroporto en New York!) Sami se ambezo las kantikas sefaradis de los Esim, i tambien de Los Pasharos Sefaradis de Estambol, ma el no avla la lingua, i no tenia el buto de sovreguardar la lingua, solo de azerse famozo. I se izo.
Janet i Jak fueron rekonosidos por sus maestria i la ermozura de sus kantes, i siempre kon ekselente isntrumentalistos, ma sus reushita fue mas muncho afuera de Turkia.
El artikolo tambien trata de la desparision de las linguas minoritarias, sovre todo del djudeoespanyol, en la Republika turka. Verash ayi, entre las ilustrasiones, una oja del jurnal “La Boz de Turkiye” (Turkiye’nin Sesi) ke trata del przidente Ismet Inonu. Vash a remarkar la ortografia ispanizada del djudeoespanyol. ( El fondador i editor de este jurnal, Albert Cohen, era el padre de Sami Kohen, famozo jurnalisto en Turkiya oy.)
Kreygo ke mirar los videos en el artikolo vale la pena tambien. El primer video es de la TV turka, TRT, ande entrevistaron a Janet i Jak Esim, ma empesando al minuto 1:40 Janet mos kanta “Yo era Ninya” kon su dulse boz.
El otro video una de las mas konosidas kantikas del grupo Sefarad, ande Sami Levi kanta Osman Aga”. Tambien podesh sintir en Youtube el grupo ande Sami kanta “Bre Sarika Bre.”
Artículos Relacionados: