La divinasion del futuro, fue de syempre un motivo kardinal ke oriento las tradisiones okultas. En este konteksto, la eksplorasion de un uzo singular entre los djudyos de Saloniki, sovre la divinasion del sekso de una kreyatura ke nasera, mos insita a investigar sus raizes, i las posibles sirkonstensias de su aparision.
Asigun Mihael Molho, para saver el sekso de una kreyatura ka va naser, se metia la bolsa de safra del ligado de un gayo sovre la tripa de una mujer prinyada. Si esta bolsa se eklatava kuando la kemavan, esto era siman ke va naser un ijo. Si la bolsa se kemava sin azer bruido, esto era siman ke va naser una ija.(*)
Apersivo istoriko
En Babilonia, ansi ke en munchas kulturas en el Mediano Oriente se kreia ke los dios (dioses) i espiritos kontrolavan i desidian los evenemientos. De mizmo, ke konosian el pasado, el futuro i lo ke esta para akonteser. Lo ke avia susitado el motivo de interpretar la signifikasion de sus omenos para devinar el futuro. Konosida komo ‘aruspisio,‘ la inspeksion del ligado de un kodrero sakrifiado en este buto avia konstituado un uzo komuno en la prediksion del futuro imediato o serkano.
En el mundo antiguo, el ligado fue konsiderado komo el sitio de la aksion, desidiendo del komporto de la persona. En Babilon, el ligado fue konsiderado komo la fuente de la sangre i entonses la baza de la vida mizma. De estas kreyensias, nasio en Mezopotamia, la tradision de observar el ligado del kodrero para deskuvrir la voluntad de los divinidades. El arte de la evaluasion a traverso el aruspisio, implikava la konosensia de la voluntad de las divinidades reflektandose en las partikularidades de los animales sakrifiados en este buto.
El aruspisio fue probablamente, durante una syerta perioda, la forma prensipala de devinasion en las kulturas klasikas. En este konteksto, fueron establisidos ritos similares uzando los viseros, i en fabrikando reseplaktos modelados para inspektar el ligado del kodrero. Es akseptado ke esta tradision orijino entre los asirianos, los babileos, los hitites i los kanaanitos en repandiendose en el Serkano Oriente, i ke en segito, aparesio entre los etruskos i fue adoptado por los romanos.
De mizmo, modeles de ligado de kodrero ekskavakados en Bogazkeuy – Anatolia, Mari – Mezopotamia, i en Hazor – Alta Galilea, sugjeran ke los raizes de esta tradision se retrasan asta la vispera del treser milenium antes de muestra era, i posiblamente a tiempos mas antiguos.
De otra parte, egzisten munchos rejistros de diferentes pueblos ke uzavan el ligado i el bazo de los animales para pronostikar el klimato. Ay syenes objektos arkeololojikos i labirentos formados de piedras en los payizes del Norte, ke son konsiderados komo un modelo de los intestinos de un animal sakrifiado en el buto de la endivinasion. Lo ke sugjera ke el estudio de los viseros internos de un animal, konstitue un arketipo de endivinasion non limitado spesifikamente a syertas rejiones.
Babilon
En Babilon, un sasordeto konosido komo baru, fue espesialmente edukado para aklarar los sinyales del ligado. El ligado fue divizado en seksiones, ke kada una de estas reprezentava una deidad separada.
Tekstos deskuvridos en la biblioteka de Ninova rekordan mas de una dozena de terminos relasionados kon el ligado. De mizmo, indisios de la egzistensia del aruspisio en Babilonia fue rejistrada en la Biblia. Se pensa ke un modelo babileo en arjilio del ligado de kodrero evaluado datando de 2050-1750 AE, fue uzado komo fuente de prezajio en la medesina mezopotamika, para endivinar el developamiento de la hazinura. Klavos en lenyo fueron enserrados en los burakos del modelo para rejistrar las partikularidades ke fueron observados en el ligado del animal sakrifiado. El saserdote o el endevino uzavan estas partikularidades para predizir el korso de la hazinura.
El animal eskojido para el sakrifisio fue identifikado con el dio al ken fue ofrisido. Se kreiya ke la alma del animal seando fuzionada kon la alma de la divinidad, en el momento de su tramsmision a la muerte, el espirito de esta divinidad se aklarava en el ligado, i ansi era posible de deskuvrir el futuro a traverso los sinyales del ligado.
El ligado del kodrero fue inspektada antes de empesar una ekspedision militar, dar la batalia, en kavzos de revoltas i antes de inisiar una fragua de importansa. De mizmo ke, antes de desidar konventos, antes de mandar emisarios, antes de nominar funksionarios a postos importantes, ansi ke en kavzo de una malatia del rey o de un miembro de la famiya reala. Esta tradision egzistio kuaji non interuptida de la perioda asiriana asta la fin de la monarkia neo-babilea.
Aparte del ligado mizmo, la forma, la direksion, la konsistensia i otras pekularidades de la bolsa de safra fueron konsideradas ser el prezaje de la divinasion – partikularmente sovre el destino de una batalia.
Aruspisio greko-etrusko-romano
Los etruskos tambien uzaron la endivinasion a traverso la inspeksion de los viseros de kodreros. Una eskulptura de bronzo del ligado, konosida komo “Ligado de Piacenza” fue deskuvierta serka de la provinsia de Piacenza en el Norte de la Italia. Evaluada datando de los siglos 2-3 AE, este objeto ke akodra el modelo babileo, es gravado kon eskrituria etruska i depikta rejiones del ligado relasionados kon varios dios (dioses) etruskos.
En kavzos de desiziones importantes o situasones kritikas – el endevino etrusko, yamado haruspex, si es un ombre, o yamada nethra, si es una mujer – sakrifiava un kodrero en observando rituales estriktos. Despues de aver egzaminado sus entralias, desinava una karta en la superfisia del ligado, ande eran markadas seksiones del syelo, relasionadas kon las divinidadas etruskas.
Para ser rekonosido en el Imperio romano komo endevino, doz kondisiones paresen aver sido importantes:
– el kandidato devia de tener algun tipo de tradision de endevinasion en su famiya;
– su famiya devia ser bastante riko para mandar el kandidato lesho a Caere, ande devia bivir en la kaza de una famiya etruska para estudiar la syensya i kos rituales etruskos durante un par de anyos, i aboltar a Roma i egzersar su karyera sasedotala.
Los endivinos etruskos se distengavan del resto del puevlo kon sus vistimiento partikular. Yevavan un manto kurto brodado kon franjes, similario al kuero del animal sakrifiado, serrado por una fibula en el nivel del garon, ansi ke un sombrero apuntado kon bodres anchos. Tenian kon eyos el livro del tratado de sus ofisio.
Endivinos etruskos fueron konsultados por los romanos durante siglos. Manuales relijiozos etruskos fueron uzados por los romanos asta 408 DE.
El Senato konsiderava kon grande estimo la pensada etruska i uzava a konsultar los endevinos antes de tomar una desizion. El Imperor Claudius estudio la lingua etruska i fondo una universitad del aruspisio. El obispo kristiano Innocento I, aun ke retisiente, se submetio a akseptar el uzo del aruspisio, durante el siejo de Roma por los gotos, a la kondision ke este akto se mentiene en sekreto. Pliny en su ovra Naturalis Historia, publikada en 77-79 DE, ansi ke Suetenius en su ovra De vita Caesarum,publikada en 121 DE, reportan el rolo importante del aruspisio en la sivilizasion romana. Ansi se eksprime Pliny:
“… En el primer diya ke Augustus estava en el poder, los ligados de sesh viktimas fueron topados en el fondo de sus tejido dublado al interior, i esto fue interpretado ke iva doblar su poder en un anyo.”
Los romanos yegaron a la konkluzion ke prezajios atestaron a la muerte del Konsul Marco Marcelo en el anyo 208 AE, mientras ke estava luchando kontra Hannibal, achakes ke a un animal de sakrifisio le faltava el ligado. Serka de su muerte i el diya de su muerta en la batalia, se avia enkontrado un doble ligado en el proksimo sakrifisio de los animales.
Suetenio nota ke prezajios makabros fueron revelados al deredor de la muerte de Caligula en 41 DE, por la disparision de los ligados, ansi ke en el kavzo de la muerte de Claudio en 54 DE.
El aruspisio no fue limitado al kodrero. Otros animales komo el puerko, el toro, el buey, la vaka i el gayo fueron uzados para la prediksion. La karne del animal abatido, fue asada i repartida durante un banketo entre los partisipantes a la seremonia, los organos internos kozidos fueron arrondjados al fuego en la chimenea de la oferta a los dios (dioses).
Tekstos gregos se referan de mizmo, a la endivinasion a traverso los viseros de los animales sakrifiados, en sulinyando prinsipalmente el rolo del ligado. En grego, el termino hiereia – en el sensio de la “partes sakras” – es uzado para los viseros uzados en este buto, en konsentrandose sovre los sinyales del ligado. Lo ke sugjera un orijen etimolojiko komun kon aruspisio. Ansi, Euripides nota en Elektra ke, kuando fue surprendido por Orestes, Egisto estava egzaminando el igado de un buey, sakrifiado en una okazion festiva. Deteniendo el ligado en su mano, Egisto observa ke no avia dingun lobulo i ke la entrada del ligado estava tapada i ke la bolsa de safra predizia mala suerte.
En la Iliada, despues del maskro de su ijo Hektor por Akiles, Hekuba, la madre de Hektor, aspira a komer el ligado de Akiles:
“Me gustaria enklavar mis dientes en el medio de su ligado.
Para vengarme de lo ke izo a mi ijo …”
Problamente, este dezeo derivo de la kreyensiake el ligado es el maz import
Djudaismo
Asigun ke fue notado ariva, la inspeksion del ligado, komo medio de endivinasion, era repandida en Mezopotamia, en la tierra de Kanaan, i entre los hitites. Maz tadre, fue tambien uzado por los arabos.
Un modelo de arjilio del ligado, inskrito en akadio, ke fue topado en una pila de eskombro durante las ekskavasiones en Hatzor, konstitue una evidensia del uzo del aruspisio en Kanaan. Situada en la Alta Galilea, Hatzor era una grande sivdad kanaanita i israelita. Dominava en la antikidad los prinsipales ramos de la Vía Maris –Kamino Maritimo – ke konektava Ejipto a Mezopotamia, Siria i Anatolia.
La Biblia se refera direktamente al rolo de Hatzor en la konkesta de Kanaan por Yoshua. Yabin, el Rey de Hatzor, komanda a una aliansa de varias sivdades kanaanitas kontra los ebreos, en la batalia en las aguas de Merom: “I volviendo Yoshua en akel tiempo, i tomo Hatzor, i aharvo a su rey kon la espada, porke Hatzor avia sido la kavesa de todos estos reynados… i kemo Hatzor kon fuego…” Hatzor, en tanto ke una sivdad kanaanita es i mensionado en los tekstos ejipsianos. Es tambien la unika sivdad palestiniana mensionada kon Laish en los dokumentos de Mari, ande aparese komo un sentro komersial importante de la Kresiente Fertila, achakes de las karavanas ke viajavan entre Hatzor i Babilonia.
De otra parte, el uzo del ligado en el eskopo de la endivinasion es mensionado solo una vez en la Biblia. I esto, komo un kostumbre ajeno, en atadijo kon el Rey Nabukodonozor durante la konkesta de Yerushalayim: “Porke el Rey de Babilonia se avia detenido en la partision en doz de su kamino, uzo la endivinasion: izo briyar sus fleshas, konsulto los idolos, miro el ligado.” (Ezekiel XXI:21)
Los ebreos aun ke supieron ke el uzo del aruspisio egzistia i fue populare entre los puevlos kon loskualos fueron en kontakto, este uzo no fue integrado en sus tradision i se abstenieron de uzarlo.
L a aparision en Saloniki
El aruspisio arivo probablamente a Etruria – payis de los etruskos – a traverso los hitites, posiblamente achakes ke los etruskos se orijinaron en la Asia Minor. Herodotus nota la leyenda sovre la apartenensia de los etruskos a Lidia en la Asia Minor.
De otra parte, los gregos i los romanos se sintieron liberos de adoptar la tradision de interpretar el ligado en el eskopo de la divinasion. Un rito emprestado es siempre suseptible a ser modifiado. Aun ke fue mentenido, esta tradision fue adaptada a las partikulirades i inklinasiones de su muevo environmmente. Ansi, los animales sakrifiados no fueron limitados al kodrero, en ekstendiendosen al toro, puerko i a otros animales, inkluido el gayo. Todo kon esto el ligado kontinuo a ser el prinsipal visero inspektado.
El uzo del gayo por los djudyos de Saloniki – i posiblamente por los djudyos de Gresia i de la Masedonia – fue probablamente determinado por el fondo greko-romano del environmente, ansi ke su posible transmision por la komunidad romaniota otoktona.
El artikolo de Molho no presiza si el gayo fue espesialmente abatido en el eskopo del motivo del ritual. Portanto, syertos aspektos komo el motivo, el lugar de suzo i el estado del ligado paresen ser relevantes:
– El motivo del ritual fue substituado por la deskuvierta del sekso de la kreyatura ke nasera, en prezervando su importansa. Molho en su artikolo presiza ke el nasimiento de un ijo de sekso maskulino era el dezeo de sus jenitores, porke kuando engrandeseria iva ser el braso derecho de su padre, (i puedera konribuir al mantenimiento de la famiya).
Esto era eksprimido en el proverbo: “Ken ninyo kriya, oro fila. Ken ninya kriya, lana fila. A la fin de anyo, o puliada, o pudrida.”
– El ritual era observado en el lugar ande el oguro estava ekspektado, enriva de la tripa de la mujer prenyada.
– Asigun la tradision, el estado del ligado desidava de la realizasion del motivo, su sanedad apuntando a un oguro pozitivo – en este kavzo el nasimiento de una kreyatura de sekso maskulino. Esta norma topa su ekspresion – asigun las leyes de fizika – en el eklatamiento de la bolsa de safra, ke se realiza en la kondision ke estaria kompleta i non mutilada.
La adopsion de la tradision del aruspisio por los djudyos de Saloniki, konstitue un egzemplo konkreto, de la subsistensia de las kreensyas majikas, de sus transmision de una kultura a una otra, ansi ke la substitusion de sus motivos i rituales, en el korso de la istoria, i asigun la sikonstensias i las nesesidades de sus environmente.
——————————————————————————————–
(*)Molho, Mihael. Leyda ve Leydot (Paridura i Pariduras), Saloniki Ir veAm beIsrael (Saloniko
Sivdad-Madre en Israel), Jerusalem- Tel Aviv, 1967, pp. 188-194.
De otra parte, tekstos etruskos ansi ke romanos se referan a las tradisiones gregas del aruspisio a traverso la inspeksion del ligado. Virjil en la Eneida, nota ke los viseros de una vaka son konsultados en el eskopo de la endivinasion, en presizando ke sus viseros ainda estan fremisando durante sus inpeksion. Lo ke sugjera ke el ogurio akontese en el estado de la tranzision del animal, de la vida a la muerte iminente.
Qué esto, ladino?