La importante kontribusion de los Djudios de Espanya al dezvelopamiento de la kultura espanyola ya es un fakto akseptado i rekonosido oy dia por todos los ekspertos ke se okupan del estudio i investigasion de estos temas. Lo ke no es tan bien konosido i admetido es ke los djudios djugaron un rolo de grande importansia en numerozos otros kampos tambien de la vida – komo por enshemplo el kampo de la navigasion i sovre todo de la eksplorasion maritima ke permetio a los navigadores de Espanya i de Portugal de deskuvrir nuevas tierras i kontinentes.
Una de las figuras las mas importantes i interesantes de este punto de vista es siguramente el astronomo Avraam Ben Shemuel Zacuto ke sus alkanses en el kampo de la navigasion ayudaron muncho a Cristobal Colon en su deskuvierta de la Amerika i a Vasco de Gama en su deskuvierta de la posibilidad de yegar a las Indias por via de mar.
Avraam Zacuto nasio en Espanya en el anyo 1452. Despues de aver resivido la tradisional edukasion djudia en los kampos de la Biblia i del Talmud, el estudio astronomia i astrolojia en la Universidad de Salamanca, de la kuala salio komo profesor en estos kampos. El se distingio bien presto por sus anchos konosimientos i su kapachidad intelektual ke se reflektan en los importantes livros ke eskrivio. El empeso kon el livro ” ‘Hahibur ‘hagadol” ke kompleto en el anyo 1473, en lo ke era aedado de 21 anyo solo, i kontinuo kon dos otros livros del mizmo kampo: El uno yamado “Tratado Breve en las Influencias del Sielo” i el sigundo, “De las Eklipsas del Sol i de la Luna.”
Kuando los djudios fueron ekspulsados de Espanya, en 1492, Zacuto emigro a Portugal onde entro al servisio del rey Joao II. En el tiempo del rey Manuel el Primo, el astronomo djudio tuvo la okazion de djugar un rolo istoriko kuando, sovre la demanda del rey, embezo a los marineros de Vasco de Gama, ke estava aprontando su ekspedision a las Indias, komo servirse de los instrumentos de navigasion ke avia dezvelopado el mizmo. El les dio tambien las tablas astronomikas ke avia aprontado i ke permetian de saver kuala era la pozision de las estreyas en kada dia del anyo – lo ke es de muy grande importansia para la posibilidad de navigar en mares deskonosidas. Vasco de Gama el mizmo se enkontro kon Zacuto en Lisbon, en 1496, antes de salir al kamino para las Indias.
Las tablas astronomikas aprontadas por Avraam Zacuto fueron empleadas en realidad por todos los grandes navigadores del mundo. Estas tablas djugaron un rolo desizivo en la deskuvierta de Amerika, siendo ke permetieron a Colom de traversar el Oseano Atlantiko malgrado ke este era kaje totalmente deskonosido asta entonses. Las tablas astronomikas de Zacuto ayudaron al selebre eksplorador espanyol no solo en el kampo de la navigasion, sino ke a lo menos en otra koza tambien.
Segun se konta, en efekto, kuando Cristobal Colom i sus marineros se toparon una vez en una situasion bien kritika, amenazados por indianos ke kerian matarlos, el reusho a salvar en akodrandose ke segun los kuentos de Zacuto, akel dia mizmo devia tener lugar una eklipsa de la luna. Adresandose entonses a los indianos, el les deklaro ke tenia en su poder de azer despareser la luna i el sol i ke komo akavidamiento, aria despareser la luna dientro poko tiempo. I si este akavidamiento no bastaria, amenazo el, su sigiente paso seria de azer despareser al sol tambien, deshandolos en la eskuridad.
Ya se puede imajinar kual fue el espanto de los indianos al empesar la eklipsa i komo eyos trokaron bien presto sus aktitud enverso Colon i sus marineros ke konsideraron komo seres supernaturales. Todo esto grasias, entre otras, a las tablas astronomikas de Avraam Zacuto…
Artículos Relacionados: