Diario Judío México - Eskrivir memoryas, keridos, es si lo akseptamos o no, kerer deshar raises en este mundo dospues de irmos a muestra egzistensya espiritual…

En primero pensamos ke vana ser muestras kreaturas ke seran muestras raises ma dospues pensamos ke es lo ke logramos ! Personas, ke tienen muncho bueno, fundan muzeos, batimientos, grandes tombas, statuas, regalan eskolas, parkes….Dan nombres ets. MA no les basta. Nada de esto les basta para ser rekordados komo lo keren… No se sienten PREZENTES en este mundo para DOSPUES. Savesh kuando se sienten prezentes ?
Kuando KONTINUAN A AVLAR en sus otobiografias !

Esto es konkreto ! Sus vidas i eyos kedan en los defteres o en los livros si se publikaron ! Kon munchas fotos EN EL LIVRO… Porke los otros pueden dezapareser o echarsen.. En el livro keda! Porke kada uno es MUY IMPORTANTE a su ojo ! No embarasa si en realitad dingunos se interesan a el/eya ! Es lo ke tiene en su kavesa ke es importante i kere kontinuar a bivir ! Kere ke sus ijos, sus amigos, la persona ke kere bien, se akodren i nunka se olviden, ke kontinuen a bivir DOSPUES DE LA MUERTE ! Es el dezeo komun de todas las personas ! I…. Deke no ? Keren ser regretados i amados dospues ke no seran mas en este mundo…..

Vos va kontar lo ke me afito… Era el anyo 1997, 2 anyos dospues ke torni de Israel a Istanbul…. I no porke lo kije … Ma esto es una otra istorya !
——————
” Te reingrasyamos Di-o santo, entre innombravles kozas, de kriyar las bizbas ke mos dan el miel para muestra salud, muestra savor de boka i por el menester ke tenemos del dulse, AMEN ” Sharope blanco
——————-

Es una istorya ke yo bivi antes unos 20 anyos. Nunka me olvidare de esto ni de akel tiempo bendicho ke duro approx. 2 mezes en las montanyas, kon mis keridos, la madre i el padre biologiko de mi kerido ijiko Mustafa ke fue miyo des de su 3 er anyo de vida. Lo engrandesi ke ermano de mi proprio ijo. Termino el Lycee de Galatasaray, ke es una de las mijores eskolas de Turkiya. Izo sus estudyos akedemikos en la Universitad de Istanbul, en Beyazid i estudyo Finansas i Ekonomika. Oy es kazado i tiene un ijiko de 22 anyos, Kerem, i una ijika de 15 anyos, Sedef, ke son mis keridos inyetizikos de su parte. Es uno de los direktores de la ARCELIK, una de las mas grandes kompaniyas de Turkiya. Avla perfektamente el Fransez i el Inglez. Mora a 1 km de mi kaza i tenemos las mismas relasyones de una madre i su ijo, en mas mijor ! Ermano mas grande de 4 anyos de mi ijo, se keren i se respektan i son attados de manera inkreyivle. Es justamente ande sus paryentes ke estava en akel enverano del anyo1997. Me aviya fuido por tener el repozo ke nesesitava para eskrivir…

Estava avlando kon los kampesinos mas puros del oro, mas limpyos de las aguas de sus montanyas i mas santas personas de sus tierras….

Ayshe, la ke vendiya el miel de sus bizbas, era una mujer de unos 45 anyos, muy amada i respektada en este puevlo. Aviya engrandesido 7 ijos i no aviya tenido ijikas. Se muriya por tener una ijika. Su marido hazino des de anyos era pastor kuando era mansevo ma agora no saliya kuaji de su kaza. Ayshe teniya toda la karga, las tierras, dunke lo ke deviya produizir para la kuzina, las bizbas, sus ijos, las gaynas, aparejar lo ke komeriyan en invyerno… el pan, vender los gueyvos i el miel en el merkado, kuzir, la limpyeza de la kaza i de los animales, travar la agua del pozo o ir a inchir los kuvos de la fuente del puevlo, la leche, el kezo, la manteka, lo todo kon sorizas i buen humor, una fuersa ekstraordinaryo ke Di-o le aviya regalado por lo ke deviya azer…. A mis ojos, era mas fasil de menayar la montanya ! Solo de pensar ke 9 personas deviyan artarsen kada diya de mis manos, me abastava para tener mareyos i ezmayos !


Un diya me disho :

– Tu eskrives….Sos diferente de mozotros ! Ma sos komo mozotros en mismo tiempo porke sos komo nasites. Komo si no te ambezaron nada i no te fuites a la eskola ! Bives, te vistes, avlas, pensas, komes komo mozotros. Ma saves dizir lo ke kale kuando kale ! Avlas komo mozotros ma sos mas intelijente de muestro Hoca (el ke esta en karga de la meskita) No lo mostras ma mozotros lo vemos. Yo kero ke eskrivas de mi boka lo ke bivi !!! Pasi una vida ke no asemeja a la de dingunos ! Yo te la vo kontar i tu la vas eskrivir !

– Para ke lo keres Ayshe ? No vas a pueder ni meldar lo ke eskriveremos ! No saves meldar ! No es mijor si te ambezo a eskrivir i a meldar ? Ven aprova !

– No no no ! Ya paso de mi ! Yo no lo vo meldar ma mis ijos lo van a meldar i alora van a entender ke madre ke teniyan ! Todo lo ke ize por eyos ! I en este puevlo lo van a meldar i van a oyir mis palavras ! Van a saver lo ke yo valiya ! Sere nombrada por jenerasyones komo “AYSHE DE FERAH KOY – LA KE ENGRANDESYO 7 IJOS KON MIEL”… De vedra vas a ver !
Kale ke eskrivas todo lo ke te vo kontar…. Estas libera agora ? Ven te kontare ! No va tomar muncho tiempo ! Manko de 1 hora.
Tu dospues lo azes livro komo tu saves ! ….

..I se asento kon mi unas 5-6 horas ! Porke estava difisil de meter las kozas en una kronolojiya ! Lo ke kontava era inkoherante lo mas…

Triste, mismo yorando, a vezes riendo, a vezes inyervada i kon las sejas fronsadas, a vezes mirando a los leshos….Un pedaso de su fusta entre sus manos ke arrugava asigun su humor.

Lo mas interesante ke konto fue un mirakolo de vedra… Estava peryendo su sigundo ijo kuando teniya 2 anyos i estava prinyada del treser. Dospues ke el chiko no estava mas respirando i todos aviyan dicho ke se muryo i ke eya estava echando gritos a los sielos yamando Di-o para ke la tome a eya al lugar del chiko, le vino al tino de darle el miel de la Reyna de las bizbas a la bokita del chiko! Ansina ! Sin pensar ! Komo un orden de los Sielos ! Pishin metyo su dedo aryento del miel i dospues el mismo dedo en la boka de su ijo, travandole la lingua afuera i pushando su dedo fina el garon para avrirle los kaminos de la respirasyon,
aremeneyarlo, no desharlo durmir en su dalkavo suenyo, sin saver lo ke estava azyendo, kon el instinkto de una haya ke se kere salvar seya lo ke seya, sakudyendolo, yamandolo por su nombre, gritando su nombre verso los sielos…. I el mirakolo ke la izo la santa del puevlo !! El chiko empeso a respirar i a yorar !

Des de este diya adelantre todos la veneraron. Merkaron komo puediyan su miel ke arrebive las personas, tanto se kreiyan ke de vedra se sanaron personas sin esperansa ! Se kuraron los muy hazinos, mujeres ke no pariyan puedyeron tener kreaturas… Ayshe me sorprendyo ! No porke kreiya yo en mirakolos ma entendi una koza muy importante kon eya… La vedra dos kozas
muy importantes ! La primera koza es la fuersa de la emuna ! “Vouloir c’est pouvoir” dizen los fransezes “Kerer es Pueder”. Todo depende de kuanto se kere ! I la segunda koza era el dezeo
del hombre de kontinuar a bivir en este mundo mizmo dospues de su muerte! Por ser respektado, amado, admirado, porke kuando se melda la vida o los biervos de el ke muryo i se miran a sus fotos es komo si el muerto no se aviya murido !

Sharope blanco
“Los migajos de las Agranadas”

No hay comentarios

Leave a Reply

Artículo anteriorDescanse en paz el Sr. Elías Abuaf Fis Z”L
Artículo siguiente¿Por qué nos debe de llamar la atención que Irán haya atacado a Israel?
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.