Bankeres i ombres de finansas djudios en el Imperio Otomano del siglo XVI

Por:
- - Visto 591 veces

La ekspulsion de los djudios de Espanya i de Portugal, en 1492 i 1497 respektivamente, marko la fin de lo ke fue la komunidad djudia ekonomikamente i kulturalmente mas adelantada de entre las komunidades djudias en el mundo oksidental. Munchos djudios de la Peninsula Iberika emigraron al Imperio Otomano del Sultan Beyazid II ke los permetio de aresentarsen en sus teritorios. Las relasiones entre los djudios i los otomanos fueron enfluensadas en una muy grande mizura por el echo ke el Islam aksepto a los djudios komo parte del “Puevlo de Livro.” Komo tal, los djudios i los kristianos en los paizes muzulmanos eran konsiderados Dimmi, o sea “los protejados.” Eyos eran tolerados, sometidos, es verdad, a siertas restriksiones ma eran libres de pratikar sus relijion i lavorar en sus ofisios.

Esta aktitud ke prevalio en la Espanya muzulmana tambien, permetio el enfloresimiento de las komunidades djudias en este paiz. Los djudios en el Imperio Otomano gozaron de un estatuto semejante ke permetio el renovamiento i enfloresimiento de las komunidades sefaradis en el muevo paiz onde resivieron azilo. Los djudios gozaron de una seguridad i prosperidad ke pueden ser komparadas solo kon las ke existieron en el kalifato de Cordova durante la Epoka de Oro del djudaizmo de Espanya. Grasias a la libertad de komersio, los merkaderes djudios del Imperio Otomano krearon una red komersiala de finansas i komersio, bazada sovre las relasiones familialas ke tenian kon djudios en otros paizes. Esta red, de bankeres, merkaderes i ombres de finansas se espandio a los prinsipales sentros de Evropa, kon ekselentes rezultados para los djudios ansi ke para los paizes onde bivian.

Ainda antes de esto, la estruktura sosiala i ekonomika de los djudios ke bivian en el Imperio Otomano, ya avia kreado kondisiones favorables al aresentamiento de los sefaradis. De entre los faktores mas importantes en este kampo kale mensionar al sistema de Millet, el dezvelopamiento de la agrikultura i despues del komersio, i en fin, la desizion de kovrar taksas.


Segun el sistema de Millet, las minorias relijiozas en el Imperio Otomano eran organizadas en forma de komunidades autonomas, lo ke permetio a los djudios de organizarsen en keilot, kada una de las kualas tenia un lider relijiozo enkargado de los menesteres rituales de la komunidad i del kovramiento de las taksas.

Antes del arivo de los sefaradis, los djudios del Imperio Otomano se mantenian prinsipalmente de agrikultura, ma kon la konkista de muevos paizes, la ekspansion del Imperio i la puja de la povlasion, los djudios empesaron a dedikarsen a aktividades finansiarias i ekonomikas. El arivo de los sefaradis ayudo a dezvelopar esta tendensia ainda mas siendo ke grasias a sus konosensia de las lenguas evropeas, sus eksperiensa en el kampo del komersio i sovretodo, las relasiones familiales ke tenian kon djudios de otros paizes, les ayudaron a dezvelopar muy presto una intensa aktividad ekonomika i komersiala.

En el kampo de las finansas, la mayoria de los bankeres djudios tenian eksperiensa en Evropa. Eyos eran aktivos tambien en el kampo del kovramiento de taksas, remplasando a los bankeres gregos ke avian kontrolado este ramo en el siglo XV. Operasiones bankarias muy importantes eran parte de las aktividades de la “Kaza Mendes”, en la kapitala otomana en esta epoka, djuntos kon relasiones komersiales por medio de la red de adjentes ke tenian en los prinsipales sentros de Evropa.

La famiya Mendes kontrolava una grande parte del komersio internasional ke konsistia prinsiplamente en el interkambio de ropas de lana de Evropa, en kontraparte a trigo, pimienta i lana. La aktividad bankaria fue dezvelopada prinsipalmente por Don Yosef Nasi ke uzava emprestar grandes sumas a los reyes i a la nobleza de Evropa. El primo de Don Yosef, Alvaro Mendez, era el tambien uno de los merkaderes djudios mas importantes en la korte de Selim II.

Podemos sitar, en konkluzion, al istoriador djudio Salo Baron, segun el kual, grasias a la estabilidad del Imperio Otomano en el siglo XVI i a la libertad de movimiento de la kuala gozavan los djudios, “el adelantamiento i splendor del djudaizmo otomano no tuvo paralelo en este siglo, permetiendo de deskrivir al siglo XVI komo una otra “Epoka de Oro” de los sefaradis.

Aun ke mantuvieron un sistema sosial i kultural ke les era propio, los djudios kedaron parte aktiva de la sosiedad otomana urbana yegando a ser una minoria influente ke kontribuyo al dezvelopamiento komersial, profesional i finansial del imperio.

Haham i merkader alegria de la mujer
Ken lazdro nunka dezeo
A ken madruga el Dio le ayuda

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: