Banyo De La Novia

Por:
- - Visto 342 veces

Vo a partajar kon vosotros algo ke akontesió en el kuartier de Villa Crespo en los anyos 1950, las ijas chikitikas akompanyaban a las madres sin saber kualo era este buto…ama kuando engrandesieron i agora aedadas komprendieron lo akontesido.
Alegría grande tuvimos esa semanada en el kuartier, Camila Alaluf kumbidadora i vizina mui kerida por todos, ke mora en Gurruchaga y Camargo djunto a otras famiyas sefaradíes … ayegó a las kazas de kada una i una a konvidar para el djueves de la semanada enviniente, al banyo de novia de su uniká i kerida ija kalia sintirla kon vos fuerte : “A las de arriba i a las de abasho están konvidadas al banyo de novia de mi ija Rakelika el djueves enviniente a la tadre” … Camila kedó viuvda muy djoven , dunke le apresentaron algunos omvres viuvdos de buena parnasá, nunka akseptó kazarse i engrandecer la famiya, pensó ke es lo ke kere el Dio para kada uno, i komo dize el muestro reflán : eskrito está en la palma lo ke debe sufrir la alma..

Avoltando al buto de oy estábamos mui kontentes las mujeres, a la fin ayegó el dya i una grande alegría para Camila, azía un mes le abíamos ayudado a lavar las ropas del ashugar: la blankería: savanás, tapetes, tovayas i más, todo era alegría ama la seremonia del banyo era algo espesial para mosotras i por este buto mos djuntamos para kuzinar i ansina ayudar en estas labores a Camila, sin mankar un kafisiko mientras kuzinabamos.
Komo toda mujer djudía, el ashugar se preparaba durante anyos i en algunos kasos desde ke era chikitika,

ansina kuando ayegava la ora buena del Dio estaba todo pronto, afilú kon el ashugar se aprontaba: “ el bogo de banyo “, lavrado a mano kon ilos de oro.
La kunyada i ermana de Camila izieron mil i una jadras kon el bogo de banyo, ama de ke tantas jadras?, … para todas en el bogo se mete: chamashir ( ropas de interior para el omvre) de seda blanka brodado a mano, lo mesmo la kamiza ,el tas la taza para etchar el agua, shabuluk pedazo de tovaya kuzida komo guante para shavonarse, shavón de tokador , galechas kon takos i más , todo blanko komo el kunfite.
Savesh? , en Villa Crespo teníamos una grande difikultá, mankava ande azer la tevilá el baño ritual, para esto era de menester ir a la kaleja Larrea i Viamonte del kuartier del Once, ande ay mabulaná de djidiós.
Para esto nos pusimos de akodro en la entrada del subte de Malabia y Corrientes para viajar i ampezar esta alegría djuntas, kalya ver a kada una kon la chanta de dolashear i las kanastas ande yevabamos todo lo de menester i lo ke teníamos aprontado para komer.


Eran pokas estaciones asta el kuartier del Once, ama más kurto se azía el viaje endjuntas. Al abashar en la estación Pasteur el ambiente mos era familiar, munchos de los omvres muestros laboraban en los magazines i afilú de djentes konosidas a la ke saludábamos, ken i ken no merkava lo de menester en estos magazines afilú en el muestro kuartier?, estos saludos yevaban unos minutos i ansina akontesía asta ayegar a la porta de la kaza de banyos.

Entrando la alegría de kada una era mui grande, no solo de estar endjuntas, afilú de ver formar una famiya mueva.

Entre Camila i la koskuegra Djoia Algranati, la vistieron kon la kamiza larga de seda, mientres mosotras mos echamos a las lajas kaentes mientras vino la teleka embaniadora i ampezó a shavonarla se sentían los muestros kantes para este buto : “ Ashugar nuevo”… “ Poko le das a la mi konsuegra” i otros más, este es el punto ke no debo olvidar de nomvrar a mi vizina del kurtijo: Donya Rifkula Dozetas kon su pandero i dumbelek tanya bueno enmientras kantava.

Despúes de shavonarla i komo manda la ley le kortaron las unyas de los pieses i las manos, le kitaron los pelos del puerpo para azer la tevilá i la metimos siete veses al agua mientres resitamos las berajot , después la vistimos… ama la tya Sarota fue la enkargada de romperle la roska kon almendras en la kavesa para desearle todo lo bueno : Blanka i Alegre, pasadía i parnasá buena ke tengash, kon paridura de ijos ….la roska era simán ( senyal) de artura… despúes ke la partió ampezó a dar un pedasiko a kada una mientres kada una le deseaba todo lo bueno del mundo .

Para kortar las unyas de pieses i manos, shavonarla i partir la roska Zimbul i Djoia elijieron komo era la kostumvre mujeres “bien kazadas”, esto kere dizir mujeres ke tenían ijos, marido i buen pasar en la vida deseando lo mesmo para la novia
Ansina ke ansina devino el momento de komer i bever, la mesa estaba yena komo lo bueno del mundo… salado, azitunas, keso, boios, borrekas , roskas , pan blanko djunto a unos buenos refreskos…kuando eskapamos de komer salimos a la otra sala no tan kaente ande mos etchamos a deskansar mientres no deshámos de kantar, en este punto  empezamos a kunvidar los maronchinos i mogadós de almendras, sharope , kunfites de almendra todo blanko komo es kostumvre i deseándole lo mijor de lo mijor en la vida.

Entre tanta alegría mos vistimos, tomamos las chantas i kon sonrisas de oreja a oreja i karas de alegría tornamos a la kaza de la novia, para kontinuar este dya tan alegre i asperado por mosotras akompanyado de kantes , dumbelek i pandero asta ke se izo la notche en ke kada una tornamos a muestras kazas.

Kada una partajamos kon muestros ijos la kostumvre del dya del banyo, ke pasó de abuelas i madres, afilú la alegría de ser kunvidada.

Vos kero komentar, ke enriva de mi kaza morava Donya Rifkula Dozetas i kuando era chikitika la sintía tanyr el dumbelek i el pandero mientres kantava muestros kantes i afilú los de novia, ama yo era chikitika kuando akontesía esto i asta ke engrandesí, no entendí por kualo era yamada a kantar i tanyr el pandero… ama despúes de este dya ke gozí muncho komprendi para kualo era yamada.
.
Arogo al Dió vida i salú larga i ke podamos ver siempre este dya para kontinuar kon la kostumbre del banyo djunto a los muestros kantes .

Nochada buena i semanada buena para todos

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: