Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Los atelyes de konversasyon de la asosyasyon Vidas Largas se eskaparon kon el del lunes pasado. Empesaran por de muevo, si kyere el Dyo, despues de las vakansas de enverano i las fyestas de Tishri. Vos daré los haberes kuando vendra el tyempo.
Yo mismo vo eskapar mis emisyones kon la del djueves ke vyene 25 de junyo, syendo la venida de las vakansas de enverano en djulyo i agosto. Las empesaré por de muevo, si kyere el Dyo, kon la del djueves 3 de septyembre. Entremyentres, pasaran redifuzyones.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Antes de empesar mi emisyon de oy, vos tengo de akavidar ke el Parlamento espanyol voto el djueves pasado 11 de junyo 2015, myentres ke yo vos estava avlando aki a la radyo sovre los Diez Mandamyentos, la ley prometida sovre el rekonosimyento de la nasyonalidad espanyola para los sefaradim djudeo-espanyoles, ley de la kuala vos aviya avlado aki el 21 de fevrero 2013 kuando dainda era solo un proyekto. Esta vez la ley es una realidad ke va tomar efekto el 1 de oktobre proksimo, i va turar solo tres anyos. Esto asperando ke esta ley sea puvlikada en el Boletin Oficial del Estado para darvos haberes mas presizos sovre eya, puede ser el djueves ke vyene, sino sera en septyembre.
I agora de kualo avlarvos oy. Estos tyempos se avlo de dos ombres, el uno era djudyo, Bernard Natan, produktor de sinema, el otro era de padre djudyo, Jean Zay, ministro del governo de Leon Blum. Los dos fueron matados, Natan en 1942 por los almanes, a kyen aviya sido dado por los fransezes, Jean Zay por los fransezes en 1944, los dos matados komo djudyos. Se avlo estos tyempos de Natan porke salyo el 21 de mayo pasado, en la gazeta Les Echos, un artikolo de Sabine Delanglade : “Bernard Natan, la réhabilitation d’une légende oubliée du cinéma français” (Bernard Natan, la reabilitasyon de una leyenda olvidada del sinema franses).
I se avlo estos diyas de Jean Zay porke el 27 de mayo pasado entro en el Pantheon franses (en mismo tyempo ke tres giborim de la Rezistansya, un ombre, Pierre Brossolette, i dos mujeres, Germaine Tillion i Geneviève de Gaulle).
Empesaremos por avlarvos de Bernard Natan.
La primera koza ke kale saver sovre el, es ke al empesijo no se yamava Bernard Natan: se yamava Natan Tannenzapf (en alman tannenzapf kyere dizir la fruta del pino de montanya) i ke nasyo kon este nombre en Iasi, en Rumania, en 1886.
Asigun lo ke entendi, vino a bivir en Fransya en 1906, dunke kuando teniya solo vente anyos, i topo un lavoro de projeksyonisto de sinema. Vos akodro ke el sinema a sido inventado solo onze anyos antes, en 1895, de tal manera ke estamos dainda al empesijo de esta grande aventura, afillu si es en Fransya ke fue inventado.
Tres anyos despues, a la edad de 23 anyos, funda kon dos otros haverim una sosyeta de produksyon de filmos, Ciné Actualité, i en 1912 una otra sosyeta, Rapid Film.
Vyene la gerra en 1914. Natan no es franses, ama yene se va el 2 de agosto, el diya mismo de la deklarasyon de gerra, a la Mayoriya del 10en arrondissement de Paris para entrar komo veluntaryo en la Légion étrangère (lejyon ajena). Va kombatir durante 21 mezes, asta ke, en 1916, sea gazado i por esto ovligado de kedarse. Asigun Sabine Delanglade en su artikolo, Natan a sido dekorado de la Cruz de Gerra. No pude topar konfirmasyon de esta informasyon sovre Wikipedia, ama se dize aya ke fue sitado al orden de la divizyon, lo ke, por lo ke se, vale mas o menos la mizma koza. Kual ke sea, una koza parese sigura: fue veluntaryo del primer diya de la gerra, gazado, i rekompensado por su koraje.
En 1921 Natan Tannenzapf es naturalizado franses i se troka su nombre en Bernard Natan.
Despues de la gerra, kon su sosyeta Rapid Film, va filmar evenemyentos komo los maches de tennis de Suzanne Lenglen, i se ve seleksyonado para filmar los djugos olimpikos de 1924. Este mizmo anyo, funda una sosyeta de publisitad, Rapid Publicité, i a partir de 1926 va empesar la produksyon de largos filmos, i fraguar dos studyos de sinema rue Francoeur, i ansina se enrikese. En 1929, Rapid Film tyene unas trenta salas, i Natan merka la aksyones de la sosyeta de Charles Pathé, un produktor muy importante: el mismo produziya los filmos (las pelikulas para filmar) en sus fabrikas, i despues los filmos kon aktores en sus studyos. Ama antes ke venga Natan, Pathé a vendido sus fabrikas a Kodak.
Natan da una vigor mueva a la sosyeta de Pathé. Pathé Journal, la gazeta de aktualidades, se aze una de las mas konosidas de Fransya (yo me akodro de Pathé Journal kuando era manseviko, en los anyos sinkuenta: las aktualidades empesavan por un gayo ke kantava).
En mas de esto, Natan produze el primer filmo franses avlante (Les trois masques, las tres karatulas). Los mas grandes i famozos realizadores fransezes azen sus filmos ande sus studyos, produsidos por Pathé-Natan. Entre 1930 i 1935, mas de 60 filmos son produsidos, unas 50 salas avyertas. Los selozos empesan de atakar en las gazetas “el djudyo Natan”. Ama de Amerika ayega la grande krizis. Los bankeros ke ayudavan a Natan se topan en falito i por konsekuensa Natan no puede el mismo pagar a sus kredidores, i la sosyeta de Natan se topa eya misma en falito en 1936.
Bernard Natan es akuzado de malversasyones i echado en prezo en 1939. En 1941, muevo proseso, Natan es filmado komo un bandido, yo vide el filmo de aktualidades, es terrivle.
En vedra los sindikos van a topar en la sosyeta bastante para para kontinuar su komersyo i de esta manera pagar a los kreditores.
Natan sale de prezo en 1942. El diya mismo ande sale de prezo, un dekreto le trava su nasyonalidad franseza, afillu su cruz de gerra komo asker veluntaryo. En 1942, travar la nasyonalidad franseza a un djudyo, es komo kondenarlo a muerte, i esto fue la koza. El diya de despues, es aferrado i embiyado pishin, el 25 de septyembre 1942, a Auschwitz kon el viyaje n° 37, de djudyos rumanos. Se va morir pokas semanas despues de su yegada al kampo.
No solo su puerpo fue matado, ama tambyen su nombre. Durante kaji 70 anyos, todos los istoryanos del sinema, mismo despues de la gerra, van a prezentar a Natan komo un ladron o un pornografo. En 1993, un profesor amerikano de universidad ke no parese mereser su diploma, syendo ke avla del governo de “Gaston Blum”, va kontar ke Natan izo tal i tal filmo pornografiko. Salvo ke no era el…
Agora solo empeso la reabilitasyon de Bernard Natan komo syendo uno de los mas grandes produktores del sinema franses, igual de los famozos amerikanos. Esta reabilitasyon empeso solo en 2013, kon un filmo dokumentaryo irlandes intitolado “Natan”.
Una laja komemorativa a sido apegada en novyembre 2014 sovre la pared de sus studyos de la rue Francoeur. I ay el artikolo ke vos dishe, del 21 de mayo pasado, de Sabine Delanglade. A poko a poko, la memorya de este ombre se ve alimpyada de todas las negriguras dichas i echas kontra el, i lo ke keda es una ovra enorme para el sinema franses entre las dos gerras.
I agora avlaremos de Jean Zay.
Nase en agosto 1904 en Orléans, de un padre djudyo, Léon Zay, nasido el tambyen en Orléans de una famiya orijinarya de Metz. Este Léon Zay es gazetero, direktor de la gazeta radikal-sosyalista Le Progrès du Loiret. La madre de Jean Zay, mujer de Léon, es una maestra protestante. Jean es kriado en la relijyon protestante de su madre, i se kazara despues kon una protestante. Esto dicho, el se syente laiko, ama vamos a ver ke durante toda su vida politika va ser atakado por los nasyonalistos de derecha komo djudyo, lo ke eskapara por kostarle la vida de la misma manera ke Georges Mandel, ke fue ministro en mismo tyempo ke el.
Aze sus estudyos en un liseo de Orleans, i en 1922 obtyene un premyo de franses al Konkurso Jeneral, i en filozofiya el anyo despues.
Despues empesa estudyos de derecho, i en mismo tyempo lavora en la gazeta de su padre. En 1924, eskrive, a la edad de 19 anyos, una poeziya intitolada La bandyera, ande amostra sentimyentos muy fuertes kontra la bandyera. Estamos solo 6 anyos despues de la Grande Gerra, i el eskrive: “Terrivle pedaso de ropa…te aborresko; te aborresko kon fervor. Si, te aborresko en mi alma, te aborresko por todas las mizeryas ke reprezentas…Tu sos para mi de la rasa basha de los “torche-culs” (espondjador de kulo)”
Esta poeziya va ser konosida i puvlikada muncho mas tadre por los nasyonalistos, i nunka le van a pedronar este eskrito de manseves.
Zay, en kuanto a el, entra muy mansevo en politika, en el partido radikal sosyalisto de su padre, i tambyen va entrar en la franka-masoneriya. Sözde djudyo – en vedra no lo es, ama para los antisemites yene lo es – franko-mason i radikal-sosyalisto, aze muncho para un solo, i Zay va ser pishin aborresido por la derecha nasyonalista.
En 1932, a la edad de solo 27 anyos, es elijido deputado del Loiret . En 1935, el aze el raporte del partido suyo (radikal-sosyalisto) ke dechida de azer atadijo kon los sosyalistos en una frente popular.
Sin asperar las eleksyones de 1936, entra en el governo de Albert Sarraut komo sub-sekretaryo de estado a la prezidensya del konsilyo. I komo ya se save, en junyo la frente popular gana las eleksyones, i a la edad de 32 anyos, entra en el governo de Leon Blum, no mas komo subsekretaryo de estado, ama komo ministro, i no de kuaksikyer ministeryo, la Edukasyon nasyonala i los Artes. Va kedar a este posto mas de tres anyos.
Durante este tyempo, se deve a Jean Zay:
– la eskola asta 14 anyos (i no mas solo 13
– meter tres oras de edukasyon fizika en la eskola
– la medikeriya preventiva en la eskola
– la kreasyon del CNRS (sentro nasyonal de la bushkedad syentifika)
– la kreasyon del muzeo del ombre
– la kreasyon del Muzeo de Arte Moderno
– el ayudo a la kreasyon de la sinemateka kon Henri Langlois
– la kreasyon del Festival de Cannes
– la Ekspozisyon Universala de 1937 en Paris
– la renovasyon de la Katedrala de Reims, ke aviya sido muy derrokada por la gerra de 14-18
– la renovasyon del Palasyo de Versailles
– el empesijo de la kreasyon de la Eskola Nasyonala de Administrasyon. La idea es de Jean Zay, ama no va pueder realizarla el mismo. La ENA va ser kreada despues de la gerra.
Esto todo es poko al lado de todo lo ke keriya azer i ke no pudo, frente a las opozisyones de los deputados ke no keriyan nada trokar. En 1937 propozo una reforma kompleta de la Edukasyon, echada a basho por la comisyon del ambezamyento i ke nunka vino delantre los deputados.
Kuando empesa la gerra, el 2 de septyembre 1939, Jean Zay sale del governo i se va en la armada, ande sus kapos militares rekonosen ke fue “veluntaryo para las misyones las mas sekanozas i las mas yuches”. Esto dicho, si no es mas ministro, keda deputado, i kon la permisyon de sus kapos militares, se va en Bordeaux el 19 de junyo 1940 para partisipar a la ultima reunyon del Parlamento.
El 21 de junyo 1940 Camille Chautemps, vice-prezidente del Consilyo, los prezidentes de las dos Kamaras (deputados i Senato), Jean Zay, Pierre Mendès France i unos 25otros parlamentaryos toman un vapor, el Massilia, para ir en el Maroko kontinuar el Parlamento franses.
Ama en Casablanca Zay, komo Mendes France i dos otros, son aferrados por la polisiya franseza komo “dezertadores”. I es vedra ke en mismo tyempo ke eran deputados, eran askeres. Salvo ke eyos se aviyan ido para kontinuar la gerra myentres ke los ke los aferravan aviyan kapitulado. Fueron los kapituladores ke akuzaron estos askeres de dezersyon.
Jean Zay, komo Mendes-France, es yevado en Fransya en la prezo de Clermont-Ferrand.
El 4 de oktovre 1940, Zay es kondenado por dezersyon a la deportasyon a vida. (sera despues reabilitado por la Corte de Riom en 1946, ama ya es muerto). Mendes-France, por su lado, es kondenado a 6 anyos de prezo, ama se va fuir de prezo i irse en Ingletyerra ande va luchar en la armada de los aires durante toda la gerra.
Zay no es finalmente deportado, es guadrado en varyas prezos de Fransya, al kavo la de Riom ande se topa en la mizma “kamareta” ke el haham Edouard Gourevich, kondenado a muerte komo rezistante (Gourevich deve ser fuzilyado el 14 de agosto 1944, ama va ser liberado por la Rezistansya el diya antes, 13 de agosto, kon 113 otros prezoneros. Gourevich va kontinuar la gerra en la Rezistansya. Despues va ser el haham de Neuilly entre 1949 i 1975. Muere en 1999. Syerro la paranteza sovre Edouard Gourevich, el kompanyero de Jean Zay en prezo, ama un diya seriya interesante ke aga una emisyon sovre los hahamim fransezes durante la gerra).
El 20 de junyo 1944, tres milisyanos vyenen a bushkar Jean Zay (komo lo izyeron por Georges Mandel, otro ministro djudyo del govyerno de Leon Blum) sözde para yevarlo en Melun, en vedra para matarlo en una sharra. Despues de tenerlo matado, le kitan sus vestidos, su aliansa al dedo, lo echan en un burako i aya echan granadas para eskonder el puerpo al fondo del burako.
Mas de dos anyos despues, el 22 de septyembre 1946, su puerpo va ser topado kon dos otros, i enterrado sin saver kyen es. Ama la polisiya a topado el milisyano matador en Italia ande se eskondiya. I kon lo ke dize este matador, la polisiya sospecha ke uno de los tres puerpos enterados es el de Jean Zay. Es salido otra vez de tyerra i identifyado grasyas a sus dyentes i sus mensurasyones dadas por su shastre. En 1948 va ser enterado en Orleans, i agora se topa en el Pantheon.
El matador, Charles Develle, va ser kondenado en 1953 a la prezo a vida, i liberado 2 anyos mas despues. Los dos otros milisyanos an sido matados en los kombates de la fin de gerra.
Ya vino el tyempo de eskapar esta emisyon, i vos digo al djueves ke vyene, si kyere el Dyo!
Artículos Relacionados: