La zona otonoma judiya en Rusya
Yo no saviya del todo ke teniyamos una zona otonoma ande s’arapa el guerko!
Vos dire ke se ve munchas eskritos hebreos en las kayes, menoras, Magen David, judyos relijyozos komo si estavash kaminando en las kayes de Yerushalayim. Todo moderno, limpyo..
Kuryozo ! Muy kuryozo ke no tengo oyido de este lugar…Puedeser ke vozotros savesh… Se yama muestro lugariko BIROBIDJAN. Es un payis (!) Ashkenazi i su lingua ofisyal es el Yiddish.
En 1928 Staline propozo de dar una zona nasyonal para los judyos de Rusia. Esta zona se topa al norte de la China, leshos de 8400 km de Moskow. En 1937, 37.000 judyos biviyan ayi. Kuando la Rusya empeso a dezintegrarse en los anyos 1990, munchos emigraron a los Estados Unidos i a Evropa i kedaron solo 5800 almas.
Vash a ver en los slaydes la koleksyon de timbras para los 200.000 soldados ke muryeron en la Segunda Guerra Mundial i las plasas de interes kon sus manyifikas fuentes, los rios Bira i Bidjan ke dan el nombre a su kapital Birabidjan. Es kon un ponte ensima del rio Bira ke se entra a la sivdad i el treno trans-siberiano para ir a Pekin pasa por Birobidjan.
Tiyene ermozo monumentos, i la architektura es moderna. Oteles, kafes, restaurantes, una eglisya ortodoksa moderna kon muncho gusto, fuentes, plasas, teatro, sinemas, parkes, un sentro kultural judyo kon las grandes menoras i el Magen David, sentros komersyales, la biblioteka de siensyas Shalom Aleikhem, una grande estasyon de trenos muy impozante kon la menora en la grande plasa sentral i fuentes muy atraktivas. El muy grande edifisyo munisipal i una manyifika statu de Shalom Aleikhem (1859-1916) ke nasyo en Rusya i empeso a eskrivir des de ke era muy mansevo en lingua Yiddish ke no era del todo una lingua de kultura en esta epoka. Sus ovras fueron traduizidas en mas de 40 linguas.
Mos ambeza ke la riza es la mijor manera de suportar la povredad i las ansyas i ensima de todo la deskriminasyon ke egzistiya tanto en su epoka.
Grandes fiestas se organizaron en 2004 para selebrar sus 70 anyos de egzistensya. Una sinogag se inoguro i Mordochai Sheiner, un israeliano de 33 anyos, kazado kon 5 kreaturas fue embiyado de Israel para este kal.
La sinogoga i la Yeshiva Freud son remarkavles. Se esta lavorando aktuelamente sovre una muy grande koleksyon de dokumentos i objektos judyos ke se toparon resamente.
Kualo ke diga ! Mi boka kedo avyerta…. Ande se arapa el guerko ! Friyo buz ! Estankas deziertas… Ande ni pero grita ni gayo kanta ! Vizinos ? Mih ! No ay !
Abasho abasho jente kon los ojikos estirados… Si les demandas una koza te miran se rien i mas se rien i se aboltan de la otra parte para koryer i alesharsen lo mas presto posivle !
Si…Es un privilegio ser judyo ! Kolakavod a estas personas….
Sharope blanco
kon una mantika ensima…
Estava yeladoooo en Birobidjan !
