Diario Judío México-

El lo saviya i se lo aviya ambezado a presyo de la sangre de los mansevos judyos ke teniyan una sola ideya en sus kavesas.... Salvar la Medina ! Salvar sus medina por no tener otra, kon un punyado de sus kompanyeros, mas kon sus fe ke kon armas.... Los gueryeros de las Tierras Santas ke defiavan la muerte para arrebivir el hogar judyo dospues de dos milenaryos ! Las Tierras ke Di-o aviya apprometido a sus Padres.

El lo saviya ! I es ansina ke disho ke "El destino de Israel va depender de su fuersa, de su rektitud i de su integritad"

El no teniya repozo, no saviya lo ke es divertirse... Teniya la mission de realizar su projekto, el de su nasyon, siempre pensando kualo se puediya azer, komo topar solusyones a las miles de diffikultades ke enfrentava i komo assegurar un futura a su puevlo..... Se demandava si era un buen egzemplo, si dava todo lo ke puediya de si-mizmo. Pensava ke kaliya ke todos partisipen a esta misyon porke no kedava mas otro remedyo ! Kaliya meter fin a las atrositades ke los judyos aviyan sufriyido, ser fuertes i vayentes para enfrentar los ke los odyavan sin razon ! Deviyan guerreyar por el derecho de bivir i siguir ser judyos.

David nasyo en un kazal serka de Warsova 1886. Eran los Rusos ke kontrolavan la rejyon. Miles de judyos se aviyan fuyido a este lugar para salvarsen de los progromes. Avlavan Hebreo en kaza. Era un ijiko timido, kon kompleksos, una grande kavesa kon munchos kaveyos largos, kurtiko i flako... Sus amigos lo yaman Doushka...A penas muevo mansevo, un diya enkuentra Theodore Herzl ke aviya yegado al kazal, enteramente d'ariva abasho dospues de ser testigo a lo ke le aviya afitado a Dreyfus en Paris.... Herzl para David fue el Maschiah ! Es alora ke empeso su mission ! Konkistar el dezyerto de sus ansestros ! Esta utopia se vera realizada kon Herzl a sus lados ! I su famoza dicha "im tirsu eyn zu agada" "Si lo keresh, esto no sera una koza imposivle de lograr"

Su padre era membro de un serklo tsionisto. David konosyo los kompanyeros de su padre i melda muncho. Tolstoi, Dostoyevski, Abraham Mapu son sus preferidos. Se impresiona muncho por "la Kabana del Tio Tom" i lo espedasa la sufriensya de los esklavos.... Se akodra de Moshe Rabenu ke fue el primer hombre en la Historya ke salvo esklavos, los judyos de Egypto.

Un diya le disho a su padre ke no kreyia mas en Di-o lo ke enlokesyo su padre ke lo embiyo pishin a los estudyos de la Tora i del Talmud. Le disho ke para ser un gran lider no deviya de ser diferente de sus kompanyeros i deviya obedeser a las tradisyones i a las Leyes Judiyas. Mas tadre ambezo el Hebreo a sus studentes en un sentro ke yamo "Ezra", al nombre del profeto Babyloniano ke yego a Yerushalayim para fraguar el Templo destruido por Nabuchodonozor.

La Biblia para el era un livro ke relata la historya de los judyos a loskuales apartenese. Pensa ke no es un Livro Santo o Relijyozo. Aksepta lo ke esta eskrito sin dingun komentaryo. No es "kreyente". Ma.... konose kada verseto de la Tora de kavesa. Por anyos va eskrivir sus penseryos sovre las Eskrituras de una manera muy orijinal.

David amo i estimo profundamente su madre Sheindal. Komo el es menuda i flaka. Tuvo 11 kreaturas ma 6 deyos muryeron kurto tiempo dospues ke nasyeron. Eya, tambien, kijyera ke su ijo seya un gran rabino ma se muere la madre adorado de David Gryn (antes ke tome el nombre de Ben Gurion) kuando estava trayendo al mundo otra una kretura. David teniya 11 anyos i estava dezesperado ! Fue un shok desgrasyado para el... Aviya peryido su angelo, la dulsor, la buendad, el karinyo, la noblessa humana i la abnegasyon egzemplarya. Kere estar solo i esta melankoliko. Pasa su tiempo a meditar i meldar los filozofos gregos Platon i Aristo. Se interesa al Budizmo i al Zen.

David en su kazal de Plonsk, se siente amargo i de mas en mas kompleksado. Se va a enregistrar en la Akademia Teknologika de Warsova malgrado su padre. Su manko de konfiensya en su aparensya fizika lo dezrepoza... Aze yoga... Dospues de pratikar 60 anyos i azer lavorar kada muskulo de su chiko puerpo, parviene a entrar su kavesa en sus ombros i dublar sus piernas i sus brasos komo se les indika !!!! Se meskla a unas kestyones illegalas, le toman sus dokumentos, i se ve en prizyon en Siberia... Su suenyo tsionosto esta en perilo, ma los rabinos azen todo para ke se salve de la prizyon, dan 1000 Rublas i David, afuera, se mete en kamino para la Palestina..... Enfin !

En 1906, kon un viejo vapor de karga Ruso i dospues de 14 diyas, yega al Puerto de Yaffo. Tiene 20 anyos. La mitad de la Palestina es un dezyerto seko, governado por el Emperyo Otomano i muy muy prove. Lo mas de la povlasyon son nomados... Kale empesar de zero i fraguar un payis sin nada. David i el Movimiento Tsiyonisto no keren kayer en el dezespero i empesa una lucha inhumana para reushir ! Se establese en Petah Tiqva (La Puerta de la Esperanza). Le manka todo.... Esta en la mizerya total... Kome pita kon unas kuantas azeytunas... Lo mas se echa sin komer nada i ve suenyos de poyos al orno ! Kaye hazino.... Es la malaria... El Mediko le dize de tornar a kaza, su padre le eskrive de tornar immediatamente ma David eskrive una letra a su padre dizyendelo ke vino para kedar i kumplir se misyon de Tsionisto. Esto sera difisil i tomara muncho tiempo ma van a reushir ! Grasyas por los Rublos ma ke no los puede akseptar !....

Un anyo mas tadre David torna ande su padre i aze su servisyo militaryo para salvar su padre de la prizyon i pagar un grande montante ! Dospues de unos mezes se fuye de la armada del Tsar, torna a la Palestina i se installa en la Galilea. Esta saludozo i horozo...

David Gryn se mete a eskrivir en la gazeta Poaley Tsion. Kere tener un nombre Israeliano i opta por Ben-Gurion ke sinyifika un chiko leon en Hebreo. Era tambien el nombre del komandante de los judyos durante la revolta kontra Roma en el anyo 66. Se aze membro de la Komita Central i parte a Vienna por un kongreso mundial. Se ambeza el Turko en Salonika para ser arresivido en la Fakulta de Derecho en Konstantinopla. La Primera Guerra Mundial empesa un anyo dospues... se ve rechesado de Istanbul i se le refuza la entrada a Palestina ! Se va refujyar en los Estados Unidos. Es aya ke se aze el lider del Movimiento Sionisto. Eskoje 2 mansevos judyos para immigrar a Palestina i kombatir el Emperyo Otomano en los rangos de la Armada Britanika.

El 5 Desembre 1917 David se kaza kon Paulina (Paula) Monbaz ke kedara su kerida espoza, su amiga i su konfidante fina ke la muerte los separe. Tuvyeron 3 kreaturas.

El 9 Desembre 1917 el General Allenby entra a Yerushalayim kon sus guerreros judyos. Es el primer diya de Hanuka... Una mueva oja se avre en la historya del Medyo Oryente.... Es la fin del Emperyo Otomano dospues de 4 siglos en poder en Palestina. El Reynado Unido da por la primera vez un hogar nasyonal al puevlo judyo. Es la viktorya de los tsionistos dospues de 30 anyos del primer Kongreso de Bale en 1897 arekojido por Theodore Herzl. se aprovecha del derrito politiko ke se le dyo kon la Deklarasyon de Balfour i lansa una yamada al mundo entero para el establesemyento de un muevo estado judyo. Es la primera persona ke se da kuento de la importansya al pasar de la aktivitad tsionista en la diaspora a la realitad tsionista en los territoryos de Israel. Sera la viktorya de la klasa de los lavorantes ke emigraron al payis. Estos son los pioneros ke eksperyensaron la diaspora, el egzilio, los ghettos i todos los sufrimyentos.. kere dar a su puevlo su glorya en sus proprios territoryos....
Muevos emigrantres yegan en miles... Portanto los Britanikos no estan trankilos porke se espantan de la reaksyon de los nasyonalistos arabos... Por esto limitan la emigrasyon... Meten restriksyones... Ma nada puede impedir la emigrasyon Judiya. Vienen de todas las partes, klandestinamente, kon peligro, kon difikultades... Entran a Israel. Los arabos se revoltan en 1929. Korre muncha sangre.

Europa en estos tiempos es el inferno para los Judyos. Milyones de judyos estan eksterminados en los kampos de la muerte ! Es una dezgrasya ke nunka okuryo antes en la historia. La tentativa de assasinar un puevlo entero !. El Mandato Britaniko serra las puertas de la Palestina a los Judyos. Ni ke se avla de la Deklarasyon de Balfour mas... Los judyos estan frustrados i no pueden akseptar esta situasyon. Estan dezesperados. Azen todo lo posivle para romper el blokus i dar a entrar a los emigrantes de todas las maneras. Los Inglezes los apanyan i los embiyan en los kampos de konsentrasyon en Chypra.... Kon la famoza nave EXODUS se yega al punto kulminante de la emigrasyon klandestina a la Palestina. solevanta el puevlo para kombatir en todas las linyas. Los judyos kombaten komo partizanos kontra Hitler. Kombaten en Israel los Arabos i el Mandato Britaniko.

En akel tiempo egziste dos movimientos tsionistos.. El "Etsel" dirijado por Menahem Begin i la "Haganah" dirijado por Ben Gurion . Begin es un guerrero i ataka los Inglezes todo lo ke puede... Es su echo tambien el attentado del Hotel King David en Yerushalayim. En 1947, Los Britanikos desidan de allesharsen del problem de la Palestina !

Los Estados Unidos debaten la kestion de Israel durante 9 mezes i prezentan un akordo por dos estados, el uno arabo i el otro judyo. El 29 de Noviembre 1947 el ONU da su akuerdo para esta solusyon. En Israel es una alegriya total ke nunka se tiene visto o oyido.... Todos kantan i baylan en las kayes. En los bodres de la Mar Muerta, esta espandido en su kama kon su pijama bleu.... Detiene su kavesa entre sus manos. Viene de entregarse del voto de los payizes ma no puede allegrarse... Empesa a eskrivir.... Save ke los aspera una grande guerra... Komo ser kontente i allegre... Va kostar la sangre de los mansevos... Un diya dospues del voto historiko empesa una guerra dezgrasyada en todos los frontes... Va durar munchos mezes. Es la Guerra de la Independensya de los Judyos...
El 15 de Mayo 1948 el d'alkavo soldado Britaniko parte de Palestina.. Pormodo del diya de Shabat, yama el Konsilyo del Governo provizaryo un diya antes, el Viernes, el 5 del mes de Iyar del kalenderyo hebraiko, para adoptar el teksto de la Proklamasyon de la Independensya. El Konsilyo se arekoje en la grande sala del muzeo de Tel Aviv. yega en una limuzina preta, vistido de un kostum i kravata, saluda komo un militaryo los jurnalistos i los fotografos i entra kon prestor en la sala.

El Padre de la Nasyon avre la seansa en dando dadas a la meza kon su martiyo. Empesan a kantar todos enjuntos la TIKVA - la Esperansa... kita de su aldikera 3 ojas daktilografiadas. Se siente el pezgo de la humanitad en sus ombros. De una boz klara ma espedasada melda solanelmente la Deklarasyon de la Independensya. Le toma 14 minutos de meldar lo todo. 979 biervos... Pezgados por sus konsekuensyas historikas. Un Rabino se alevanta por la benediksyon: "BENDICHO SEYAS ADONAY MUESTRO DI-O. REY DEL UNIVERSO KE MOS MANTUVO EN VIDA, MOS DYO LA FUERSA DE SUPORTAR I YEGAR A ESTOS DIYAS. AMEN".. Dospues de las orasyones el Estado de Israel se kriyo kon lagrimas de alegriya i de esperansa. La oja abolto i el suenyo i el dezeo se realizaron.

Portanto.... Fuegos i flamas no desharon repozo a los Judyos. Guerras empesaron de muevo. kere restorar la demokrasiya ma nada parese posivle.... Prepara el puevlo a una guerra final. De otra parte ay espanto de una guerra sivil entre los ermanos. El ALTALENA es una katastrofa nasyonal. Es la nave ke Begin aziya vinir a Israel kargado de amunisyon i armas kon miliuna difikultad i ke dyo el orden de hundir !!! Uvyeron 16 muertos i mas de 30 firyidos. Era un negro sinyo para una guerra sivil ! Grasyas al Di-o no uvo mas insidentes de este nivel i los muevos lideres entendyeron ke el kampo de batalya era afuera i no en la patria mizma ! Kaliya rechesar las fuersas enemigas del payis. Keriyan i keren dayinda la destruksyon del payis kon todos los judyos enjuntos.....

mete en pies la armada de defensya de Israel, el TSAHAL para ke seya en mizmo tiempo una eskola ande se ambeza el Hebreo, el amor por el payis i la lealtad por el puevlo. Se forman komandantes i soldados elitos. Son vayentes. David los ama i resapekta los ofisiales ke dan a sus soldados el egzemplo de komo ser.... Kontrola todas las operasyones a los ofisiales en el Estado Major i demanda ke lo informen de todo modo de detalyos komo de kuantos hombres dispozan, en ke estado esta la rezerva de las amunisyones, kuantas armas tienen ets... Las armadas arabas tienen armas modernas i muncha eksperyensa. Los Israelianos no tienen ni un solo tank i por seguro no dingun avion ! El puevlo se demanda komo este politiko de 60 anyos va pueder enfrentar una guerra tan seryoza.. esta fermamente desidido de ganar seya lo ke seya... Empesa a arekojer fundos para merkar armas, topar ekspertos de stratejiya de guerra, melda muncho. Kon un lavoro i una voluntad de fierra ganan la guerra i aneantisa los enimigos. El 20 de Julio 1949 todas las hostilitades terminan en el total de las frontieras israelo-arabas.

Los Israelianos tomaron el ouest de la Palestina fina la Mar Mediterranea, la Gallilea i el Neguev fina Elat. Gaza keda de los Egyptianos. Jerusalem esta kortada en dos. La guerra mato 4000 soldados Israelianos i 2000 siviles, en todo el 1 porsien de la poblasyon. Ma no se logro la paz... Ni una semeja de paz ! Por muncho tiempo las hostilitades kontinuan. Es difisil para el mueva estado tan frajil de guardar tantas frontieras. Kale assegurar muncha fuersa militar i esfuersarse demasyado ekonomikamente i ni se pueden komparar kon los medyos de los Arabos ! Los problemes no mankan tambien en el payis a parte de lo ke tienen de enfrentar kon los payizes vizinos.... La integrasyon de los muevos vinidos tiene prioritad. Muevas sivdades, muevos kibbutzes, sentros agrikoles -moshavim- se vana fraguar. el mizmo se instala en su kibbutz Sdey Boker en medyo del dezierto para dar un buen egzemplo. Krea eskolas publikas laikas i sentros ande se ambeza la relijyon. Kita una ley para ke kada judyo pueda ser sivdadano Israelyano en immigrando a Israel. El 5 de Desembre 1949 deklara Yerushalayim la Kapital de Israel por siempre. Rechesa kon fuersa las kondanasyones de la ONU i de las embasadas i instala todos los ministeryos i el Parlemento -la Knesset- a Yerushalayim. kere indemnitad de la Alemanya para los ke sufriyeron del nazizmo ma la Knesset refuza de tener algun kontakto kon los Alemanes ! defende la mueva Alemanya del Chancelier Adenauer i dize ke no tiene mas nada de la Alemanya de Hitler.. Dize ke no kere del todo ke los Alemanes seyan erederos de los bienes de los judyos i deven ser kastigados por lo ke izyeron ! I...lo logra.

En November 1953 demisyona i se instala a Sdey Boker. Moshe Sharet, el chefe de la diplomasiya lo va remplasar. Un anyo mas tadre spiyas israelyanos son apanyados en Egypto... Es un skandalo i el partido en el poder, el Mapai se retira, Pinhas Lavon, el ministro de la defensa demisyona.

torna al poder. La situasyon politika i militaria esta muy negra. Aktos terroristos se multiplikan. Los Rusos dezikilibran el Medyo Oryente en vendyendo armas modernas i apoyando materyalmente los Arabos. guadra la sangre fria. Pensa.... Desida de ganar muevos amigos. Se torna a Fransa. En Paris empesa una luna de miel que va kontinuar fina la Guerra de Sesh Diyas.

Nasser nasyonaliza el Kanal de Suez en 1956 i la fragua del baraj de Assouan por los Russos enflama la situasyon. Alora ke Moskova esta okupada kon las revoltas en Polonya i en Hongaria, negosya en Sevres i prepara sekratamente una operasyon djuntos kon los Fransezes i los Inglezes. Parallelamente, sinya un akuerdo kon el governo de Guy Mollet para la fragua de una sentral nuklear debasho de la tierra en Dimona, en el Dezyerto del Neguev.

El 29 de Oktubre 1956 a las 7 la demanyana, los parachutistos del Tsahal se echan al Sinai. No les kale mas de 5 diyas para assegurar el kontrol de la Peninsula. Edl Sinken diya parachutistos Inglezes i Fransezes son lansados al Egypto.

Ma.... El governo Sovyetiko esta furyozo. El Marechal Boulganine muy okupado kon los evenimientos en Budapest amenasa de intervenir kon la arma nuklear ! Immediatamente la kriza del Oriente Medyo se transforma en una kriza mundial. Eisenhower demanda de terminar la guerra immediatamente i ke las fuersas se retiran a sus payizes. La operasyon "Musketaryo" ke teniya por motivo el kontrol del Kanal de Suez es un frakaso para la Fransa i la Inglaterra en esta partida del mundo ande estavan implantadas des de la fin de la Primera Guerra Mudial.

No es lo mizmo para Ben Gurion. El se felisita de aver logrado una grande viktorya i de ser de akel tiempo en delentra un grande poder militar en el Medyo Oryente en solo 8 anyos ! La fragua de la Sentral Nuklear tambien va assegurar la defensa de Israel por munchos anyos a vinir... El Padre de la Nasyon toma un largo reflo. No tiene mas espantos. Ma... No ay kalmo ! Se estan espedasando en la Knesset entre ermanos. En 1957 un loko, Moshe Doweik, echa una bomba en medyo de la sala del Knessetf ! Munchos Ministros estan firyidos. Ben Gurion i Golda Meir son poko tokados.


Tres diyas dospues, alora ke Ben Gurion esta dayinda al hospital se informa ke su sekretaryo militar, el kolonel Nehemia Argov se suisido ! Unos avlaron de un echo de espiyonaj por el kuento de los Rusos.. En realitad Argov se suisido porke mato en un aksidente un muevo emigrado del Marok. Estava konduizendo kuando una bizba lo piko en la kara. Peryo kontrol de su koche serka de Ramle i kavzo sin kererlo la muerte de David Kadosh, ke estava indo kon su bisikleta.... Esto le vino demazyado fuerte. No lo puido suportar i se mato kon una bala en la kavesa. Desho todos sus bienes a la famiya del defunto. Konto su historya en una letra a Ben Gurion dizyendole ke se estava indo a vijiarlo al hospital kuando el aksidente okuryo i ke no puediya suportar la konsekuensya trajika del aksidente ke kavzo. Ben Gurion se emosyono muncho i saluo otra vez este hombre kon tanta dignitad de 43 anyos i ke fue su konfidente, amigo intimo des de ke fue el Prezidente del Konsilyo.

Ben Gurion kontinuo kon sus echos en el Estado kon muncha determinasyon. Lansa las Fuersas sekretas para topar los kriminales Nazi. En 1960, el Mossad apanya a Adolf Eichmann, la miente i el egzekutor de la "solusyon final" en Argentina i lo traye klandestinamente a Yerushalayim. Lo juzgan de manerfa spektakular i simbolikamente en la kapital del Estado Judyo i el mundo entera sigue lo ke se pasa...

Ben Gurion demisyona de muevo porke se alarga el echo de Pinhas Lavon ke fue un skandalo politiko... Krea un muevo partido el Rafi kon unos de sus amigos del Mapai. Perye las eleksyones de 1965 i se alesha de la politika por siempre en Sdey Boker ande melda, aze Yoga, se interesa a las plantas i eskrivfe sus memoryas en meditando sovre el Estado de Israel i el Destino del Puevlo Judyo.

Un diya viene a vijitarlo Kirk Douglas ke estava tornando un filmo en el Neguev. "Vos akodrash de mi ? Tuve el rolo del Alouf Michael Stone en el filmo 'La Solombra de un Gigante" kon Frank Sinatra i Yull Bryner." "No se de kualo estas avlando ! No me vo nunka al sinema, no tengo tiempo para esto !" Ben Gurion era un hombre realisto. Las salas oskuras i los filmos eran para el el fiktivo, una halusinasyon de kurto tiempo.... Nada de ver kon la realitad... No lo interesavan las relasyones publikas i los grandes shows de Hollywood.


La muerte de Paula, su mujer es una dezgrasya para el. Siempre pensava ke se iva murir antes de eya. Empesa para el una vida de soledad un su kazika muy modesta. Nunka se kesha i no demanda la buendad de dingunos. Se eskriven muncho kon De Gaulle... Estas letras son la Historya mizma...

Era un adepto de los filozofos gregos, idealisto i demokrato en su alma. Fue un grande hombre de Estado, i una importante guia spiritual. Su puevlo kedo guerfano kuanda dezaparesyo un mez dospues de la guerra de Kipur en Desembre 1, 1973. No uvo ken no lo yoro...

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorTel Aviv será esta semana la sede de un festival único de innovación
Artículo siguienteLos Vinos Mexicanos son Premiados en Concurso Internacional
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.