….I no esto avlando de las fraguas trololos ke los architektos de oy desinan a ken mas i mas tuguerto, mas fanatiko, mas monstruozo, mas alto i mas “no de esta planeta” ! Todo modo de hoteles, edifisyos komersyales i mizmo de morar ke mos dan mareyos i no mos kuadran komo kedan en pies i komo se fraguaron !
Ay tambien deformasyones de las linguas ke kon el tiempo entran a las orejas komo el “sharanfonfon” (luksuozo, riko, estimado ets.) i el “chornishar” (yorar i mayuyar) miyo…. Ademas de los biervos de las linguas avladas en los payizes de la diaspora. En el judeo espanyol por egzemplo no ay otro biervo ke el “defter” para avlar del “kuaderno” i del “kalem” para dizir “lapiz” ! Biervos Turkos i otros en fransez i en Inglez ke oy azen partido del judeo espanyol.
Deformasyon profesional es lo ke me rendi kuento en la attitud de mi ijo regalado ke me disho ke peryo la sensibilitad ke teniya kuando era chiko a fuersas de ver la sufriensya i las dezgrasyas en sus pasyentes i a vezes no pueder ayudar ! Es vedra ke el korason de la persona se endurese i piedre lo mijor ke el humano tiene… su humanitad, porke si no se endurese el mizmo se ariya hazino i no seriya kapache de ayudar o kurar del todo…. No es ke mi ijiko es duro kon mi ! Hasvehalila…..Es un korasoniko ! Ma mis esperansas no tienen limitos a vezes i yo mizma so tan “kreatura” ke el dezmazalado de mi ijiko tiene de ser mi “ermano grande” kuando peryo el kamino !
No es para kontar vos esto ke empesi a eskrivir….Las deformasyones lejitimas me trusho al meoyo otra manera de situasyon !
El mansevo ve una ijika ke le plaze muncho…. Sus kaveyos largos en la espalda, una talya fina ke puede entornar kon un braso, ojos a la mirada de seda, un puerpiziko ke salyo muevo de su chikez, brasos ansina… piernas ansina… mushos ansina…. lo todo una koza de salir loko ! I sale loko ! La kere i punto la kere ! Esta i no otra ! Sino esta, la muerte ! Presto parientes, chokolates, rozas, regalos, i ya viene el dia del espozoryo ! Estan orozos, bolando de keyf, baylando i kantando kon los amigos, mismo las esuegras les viene sempatik i kerensyozas ! Aniyos, bombones fiestas mas fiestas i se aparejan al kazamiento. Unos dos kuatro diskusiones… No es la fin del mundo, ay amor i s’esta aparejando la boda…..Uvo el espozoryo ! No se esparte el benadam porke uvo unas kuantas diskusyones sin importansya ! Es lejitimo…
El dia del kazamiento.. No siempre todo es kaymak i miel ! Ay apuntamientos mas o menos entre las famiyas…Ideas ke no siempre s’asemejan… Bueno… Afita ! Es lejitimo…
I…Ya se kazaron ! La kazika mueva, todo djusto porke se kitaron la alma los paryentes ! Una vida mueva empesa i todo s’aresenta ! El problem empesa kuando todo s’aresenta ! Al amor le plaze kozas “solevantadas” i nunka “aresentadas” !
Tuhaf (ekstranya) koza este amor ! I mas s’aresentan las kozas mas no le plaze al amor fina ke se enfasya bueno bueno en esta kaza “muy aresentada” i se bola para “enlokeser” otros mansevos !
Kuando se fuyo el amor i keda la amistad, el respekto, la responsabilitad etc… empesan LAS DEFORMASYONES LEJITIMAS !
Se puede engodrar la persona…. Puede estar kansada i desganada….Puede tener echos fina las oras muy tadres i empesar a “ver” amigos de “siempre”… puede no tener ganas de vistirse ermozo kuando estan solos… pueden empesar a meldar “livros enteresantes”, ver “el sport” mirar programos de televizyon kada uno en “su” televizyon. Las kreaturas.. Los inyetizikos… Las hazinuras…. Los hobbies.. Ken disho ke todo esto es una razon de espartirse ?
Es lejitimo i punto !
Artículos Relacionados: