Oy vos kere avlar de EDIRNE en TRAKYA (Thrace), una sivdad en el Nord-Este de la Turkiya a la frontiera de BULGARIA i de GRESYA i ke fue durante 88 anyos la kapital del Emperyo Ottomano, fina la konkista de Istanbul (Konstantiniye) en 1453. Se trata de la ermoza sivdad ke se yamava ADRIANOPOLIS en los tiempos ke Istanbul se yamava KONSTANTINOPOLIS i Izmir era SMYRNA. Era de los Bulgaros i fue konkistada en 1363 por el Sultan Ottomano Murat II
Oy es la kapital de la provinsya de EDIRNE en Trakya, la grande peninsula de los Balkanes (Europa) antes de yegar a Anatolia ke aze partido de Asya. Estos dos kontinentes se separan en Turkiya por el Bosphorus en Istanbul i el estrecho de Canakkale (Dardanelles) entre las mares AEGEE i MARMARA.
Durante su egzilyo en el Emperyo Ottomano el Rey de la Suede Charles XII kedo el anyo entero de 1713 en esta sivdad.
El fundador de la relijyon BAHAI bivyo en Edirne en 1863-1868. Eskrive ke es una sivdad de misteryos. Fue egzilado a Akko.
En 1905 un grande fuego konsumo kuaji la sivdad. Biviyan en Edirne 30.000 Turkos, 22.000 gregos, 12.000 Judyos, 10.000 Bulgaros, 4.000 Ermenis i otros 2.000 sivdadinos de diferentes puevlos, en todo 80.000 personas. Oy en diya unos 400.000 habitantes biven en Edirne. Es un sentro de komersyo de textiles de lana, de seda, de tapetes i de produktos agrikoles.
ARTE I KULTURA EN EDIRNE
Munchos Hanes (fondas, hosteles para las karavanes de al tiempo), mezkitas, merkados fueron fraguados en esta sivdad ke servyo de Kapital para el Emperyo Ottomano. Se pueden vijitar los kompleksos -kulliye-
de Beyazit II i de la MEZKITA SELIMIYE. Estos kontienen Medrese – Universita de al tiempo-, biblioteka, hospital, salas para dar a komer a los povres, fuentes. Se fraguavan al lado mizmo de las meskitas.
LA MEZKITA SELIMIYE
Se puede dizir ke es la mas grande ovra architektural de Turkiya, konstruida por el mas grande architekto de la historia Turka Mimar Sinan en 1569. La eskapo en 6 anyos….INKLUIDO el komplexo. El UNESCO lo aksepto komo erensya de la humanitad en 2011. Tiene 4 minarets kada uno kon tres balkones al deredor.
EL MUEVO PALASYO IMPERYAL
– Yeni Saray- es el palasyo ande biviyan los Sultanes Ottomanos al Ouest del Rio Tundja- Era el mas grande palasyo dospues del palasyo de Topkapi en Istanbul. Se uzo fina el siglo 19. Se metyo fuego al palasyo para ke no kayga en mano de los Rusos en la guerra de 1877-78 entre el Sultan Abdulhamid II i el Tsar de Rusya Alexander II.
Malhorazamente kayo en ruinas i solo una chika fragua kedo de esta grande ovra.
Se topa a las afueras de la sivdad i se espandiya sovre 3 milyones de metros kuadrados kon sus guertas, sus boskes para kazar i varios edifisyos. Oy en diya es el lugar ande se azen las luchas del KIRKPINAR.
La entrada i las kozinas fueron renovadas. Los lavoros se terminaron en 2013. Se estan renovando tambien Los banyos Turkos del KUM KASRI.
El KASTILYO DE LA JUSTISYA ke aze parte del komplexo kedo intakto i se topa al lado del chiko PUENTE DE FATIH ke traversa el rio Tundja.
Otra ovra de architektura es el KOMPLEXO BEYAZIT II de la Universitad de Trakya. El MUZE DE LA SALUD kon munchas annexas ke se uzavan en akeyos tiempos.
EL SOLDADO SIN NOMBRE es un monumento ke reprezenta el soldado Ottomano a la entrada del SIMETARYO en memorya de los ke kayeron en las guerras de los Balkanes i se topa serka del Palasyo de Edirne.
GRANDE SINAGOGA
La GRANDE SINAGOGA se topa al interyor de la FORTERESA. Es la mas grande sinagoga en Turkiya i la tresera grande en Europa. Se restoro durante 5 anyos i se avriyo de muevo dospues de 41 anyo, por la boda de la ija de la d’alkavo novya ke se kazo en la sinagoga de Edirne.
Se topa tambien dentro la forteresa La IGLESYA KATOLIKA de los Italyanos, la IGLESYA SVETI GEORGI de los Bulgaros en Kiyik i la IGLESYA SVETI KONSTANTIN-ELENA de los Bulgaros tambien en Kirishane.
IGLESYA SVETI GEORGI
Edirne tiene tres grandes merkados kuvyertos ke son SELIMIYE, BEDESTEN i ALIPASA.
Edirne era un sentro renomado por sus lavoros de fayansas i de seramika. Se topan en munchos edifisyos i el palasyo era dekorado kon estas. Oy en diya se lavoran los produktos de madera i estos muebles se pintan. Pintores desinan flores, munchos se okupan de agrikultura i ay artistos ke lavoran el marbro para los simetaryos. El artizanato de las eskova kontinua fina oy en diya. Los sabones perfumados son muy en vista tambien.
KIRKPINAR -Oil wrestling-
Edirne es konosido lo mas por los tradisyonales festivales de los luchadores ke vienen de todo el payis para ganar la famoza sintura de oro del championato.
Se visten un pantalon a tres kuartos de largura de kuero i se kovren de azeyte todo el puerpo inkluido el pantalon. Son los Agas ke arresiven la gente i los espektatores. Les prokura kamaretas en los hoteles, organiza festivitades i pransos. Es el ke da a kada uno de los ganadores los premios. Antes del final del Kirkpinar se vota por ken sera el AGA el anyo siguiente. Los ekstranjeros no pueden partisipar a las luchas. Ma munchos vienen komo espektatores.
Timpanos -davul- i karamillos -zurna- akompanyan las luchas…
Sharope Blanco
Artículos Relacionados: