Kon la inisiativa del Sentro Ladino al nombre de M.D. Gaon, va tomar lugar (entre 30/7/2015-2/8/2015) en la sivdadika de Ulcinj, Montenegro, un kongreso akademiko importante.
El sujeto de este enkontro es: “Ekos de Shabbetai Sevi en la literatura judia”.
Shabberai nasido en Izmir (en 1626) es gravado en la konsensia nasional komo el gran pseudo-mashiah (mashiah falso).
Kon el apoyo moral del kabbalista Avraham Natan Ashkenazi de Gaza, Shabbetai Sevi se deklaro (en 1665) el Mashiah ke vino a salvar a la nasion. Este anunsio entro en oyidos atentos i en los korasones aviertos: el puevlo estava sediente por la regmision, la Geula prometida.
En Erets Yisrael, una masa de judyos se adjunto en Gaza a ver la kara del mashiah, i se surjio muy presto un grande movimiento de Teshuva ke arrasto tambien a los judios de la Diaspora. Una euforia mesianika se espandio, no solamente en el Imperio Otomano ma en todo el mundo judio.
La mayoria del puevlo kreia en el Mashiah, i tenia grandes esperansas.
Todas estas esperansas se konvertieron a una enorme despesion kuando se supo ke el sultan turko empriziono (en 1666) a Shabbetai Sevi, i lo izo a konvertirse al Islam. En el anyo 1673, Shabbetai Sevi fue deportado a la fortresa ke en la aldea de Ulcinj, Albania (oy Montenegro), ayi murio en 1676. La islamizasion del “Mashiah” estremesio al mundo judio entero. La diziluzion fue grande, i la kriza moral era tan grave ke turo por jenerasiones.
Ma, Shabbetai Sevi no fue el uniko Mashiah en muestra estoria Judia. Josephus Flavius (en el primer siglo) ya mos save kontar en su livro por al menos tres personas (judios) ke pretendian ser el Mashiah. Despues de la destruksion del Bet aMikdash, i durante todo el periodo del Galut savemos sovre varyos kavzos de aparesimiento de otro Mashiah. Figurativamente dizian muestros hahamim, ke “en el dia de la Destruksion del Bet aMikdash, nasio el Mashiah”.
Durante todos anyos de exilo, el puvlo judio no sezo ni un dia a mirar a la direksion de Yerushalayim en la Tierra Prometida. Ma, vos demando, ke mezos tenia este puevlo perseguido, golpeado i abatido, para realizar sus dezeos? Nada!
Despues de la expulsion de Espania, en 1492, se avrio para los judios un pokito de posibilidad a venir i instalarsen en Erets Yisrael (basho el dominio del Imperio Otomano). Savemos por arrebivimiento de komunidades judias en Yerushalayim, Safed, Gaza, Hevron, i mas.
Es interesante a notar, ke afilu Don Isaac Avrabanel, un gran personaje de akea jenerasion, vezir de finansa en los kortes de los reyes de Portugal i Castilia, no topo ke konsejar praktikamente a los expulsados de Espania, mas ke enkorajarlos de no perder esperansa, porke la Geula a venir va.
Don Isaac Avrabanel desho la vida en el anyo 1508, i fue enterrado en Padova (Italia). Ma sus livros, (bien distribuidos en todo el mundo), kon este pensamiento mistiko, an sido un terreno fertil para otro Mashiah mas.
En 1524 aparesio en Venezzia un judio kon el nombre David aReuveni, ke se prezento delantre del Papa Clemente VII komo el delegado militar del rey del trivo de Reuven (uno de los “diez trivos perdidos de Yisrael”). David aReuveni propozo al Papa estableser una aliansa militar entre Judios i Kristianos para luchar djuntos kontra los musulmanos i a konkistar la Tierra de Yisrael de mano del sultan. David aReuveni se enkontro kon el rey de Portugal, i al pareser kon el emperor de Ethipia tambien. ma no reusho a konvenserlos. De toda manera ay de admeter ke David aReuveni tenia una vizion integrada de los fundamentos politikos i mesianikos. La redension del puevlo mezo fuersa politika i militara tomo forma unos sienes de anyos despues. Pero, en el siglo 16, esta fue una idea delirante i komo sin fondamiento.
Entre los judios, David aReuveni gano grande admirasion. Uno de los afisionados era un konverso en Lisbon, Portugal, ke desidio tornarse al judaismo. Lo konosemos kon el nombre Shelomo Molho (1500-1532). El fuyo de Portugal a Salonik, parvino ser rabino, i eskrivio muchos artikolos kabbalistas en el tema de la Geula.
En el anyo 1532 salio djuntos kon David aReuveni a Regensbug kon el buto de enkontrarsen kon el emperador Carl V. Malorozamente, la inkizision apanyo a los dos en yegando a la sivdad. Shelomo Molho, el ex-konverso fue mandado a Mantova (Italia), i su fin fue kemado a la ogera. Por kualker razon, David aReuveni fue yevado delantre del tribunal de la inkizision en Lerina (Espania), i ayi, en el anyo 1538 murio, i el tambien, a la ogera.
La mas praktika de todos los ke avia nombrado arriva era la mujer mas rika en el mundo del siglo 16: Dona Grazia Nassi. Eya, djuntos kon su yerno Don Yosef Nassi, dediko mucho de sus esforsos i dinero para ayudar a los judios. En 1561 se adresaron Dona Grazia i Don Yosef Nassi al sultan Suleyman ke les de en konsesion unas kuantas sivdades en Erets Yisrael, para fraguarlas bien, i instalar en eyas judios de Evropa. El sultan aksepto a darles, en prinsipio la sivdad de Tevaria por 1000 dukados kada anyo. Muchos judios de la Diaspora reaksionaron al apelo de Dona Grazia i vinieron a bivir en Tevaria. Malorozamente, los kaminos en akea epoka eran muy perikolozos, i muchos otros judios murieron al kamino para la Tierra Santa; tambien muchos otros fueron kaptivados por piratas i korsarios.
En kada jenerasion kresieron en el puevlo judios luchadores kon el eskopo de arrekojer al puevlo judio en la Tierra de Yisrael. Entre eyos inkluyo yo a los Masiah- falsos.. En mi opinion, eyos tambien reflektan el desfilo i el dezeo grande del puevlo a toranr a Sion.
En el siglo 19, trezientos anyos despues del proyekto pionieristiko de Dona Grazia, el mundo en jeneral se troko enteramente: Despues de la Revolusion Franses (1789), despues de “la Primavera de las Nasiones” (1848), las kondisiones politikas, i la atmosfera de liberalizmo en el mundo, fasilitaron, “azir azir”, la kreasion del movimiento sionista, sus aktividades i su sukseso.
Artículos Relacionados: