En el onze septembre kumplo sus noventa i sinko,
Dizen ke su vista parese a setenta i sinko,
İ sus sentidos son komo los de sinkuenta i sinko,
Kon la enerjiya de akeyos de trenta i sinko.
****
El agradese a su Dio por averle regalado,
Un korason kon buenos sentidos dekorado.
Los gravo en su alma fin al diya de su yida,
Para tener alegrias durante su vida.
****
Leshos de l’ambisyon , de los selos , de los kovdisyos,
Se alesho de los plazeres i de akeyos visyos
Ke derokan la salud i los sentidos humanos,
De amigos, de famiya i mismo de ermanos.
****
Le regalo el gozo, la salud,i la modestiya,
Luzes briyan en sus pensadas todo el diya.
Kon sus sentidos se siente el ombre mas horozo ,
Por esto bendize de alma a su Dio poderozo.
****
En su edad es amorozo de todas las flores,
İ es de korazon yeno kon diferentes amores,
En kada kumpleanyo por su salud da mil lores,
De verse leshos de ancias i de ciertos dolores….
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: