Pasavas por muestra kazika, una chosa de tavlas
I yo te seguiya komo tu solombra de mis miradas
Kuando kaminavas para dezapareser en tornando
Ya asperava tu vinida las tadres dospues del echo.
Teniyamos una terasa serrada ande uzava eskrivir
Amava el repozo del divan i espandirme sin durmir
Era kuvyerto de tapetes morados, de kolores bivos
Echos por mis aguelas kon kavesalikos brodados.
Si solo sus paredes de madera puediyan kontar
La kolor de mis noches blankas sin pueder sonyar…..
Un diya de automno de demanyana muy demprano
Las flamas abrazaron mi nido, se kemo tremblando…
Oyi los lamentos de mi aguelo del sielo nuvlado
Las memorias se eskondyeron en las sinizas embasho
Kedi entezada, friyos en mi espalda i en mi ombro
Los anyos bolaron, el destino te rovo leshos de mi lado
Me akodro solo de mi arvole de Judea i de akel gatiko
Se parava de roza moreyada el tiempo de las bodas
Inklinando sus ramas pezgadas de sus flores perfumadas
Arvole mejestuozo ! Ke gloryoza esplandor en tus ramas !
Me arimava amoroza a tu tronko segura ke me amavas
Te kontava mis tormentas i mis alegriyas i te emosyonavas
Eras mi uniko amigo en elkual me konfiava i me enkantavas…
Sharope Blanco
[email protected]
Traduizido i adaptado de
mi Poeziya en Turko
ERGUVAN AGACI
Artículos Relacionados: