Los ke mezuran su godror kedan mas chikos de gatikos allado del arvole !
Keridos amigos i mis amigitas…
Si vozotros tambien nunka teniyash oyido del PAN DE MONO o el BAOBAB esto segura ke kedarash kon la boka avyerta komo me afito ami esta demanyana !
Di-o de Maraviyas !!!! Komo kriyo todo justo i mezurado i en este arvole….. Bueno, el Dediko se le fue un poko de lado…… Ma de vedra, una dulsor de arvoliko ke me dyo ganas de karesarlo.
Bive i le gusta kreser en el Madagaskar ke lo bueno miyo! Sesh de sus espesyas aya en esta izla, al fin fondo de Afrika i otra espesya en el kontinente Afrikano kon unos pokos en Australia tambien ma en mas chikos….
Yegan de 5 a 30 metros de altura. Ya son maduros a sus 200 anyos ! Pueden bivir entre 800 a 1000 anyos…. Ayyyyy ke no puedo kreyerlo !!!! Unos de estes arvoles giganteskos bivyeron……shhhhhhhhhh 4000 anyos ! Guadrados de nazar de tempestas, de ayres i de ojo malo…. Va entyende porke Di-o les regalo tantos i tantos anyos i a mozotros unos pokitos 70-80 anyikos ! Me selo !!!! Tengo dayinda tanto de azer. Desha todo i vate al banyo. Perdon
a los oskuros de una tomba….
Lo muy kuryozo es el diametro de su tronko mas de 11 metros ! Kon la forma de una tinaja lo mas, maaaa grandeeeee ! Atyoooo muy muy godro
dezmazalado ! Su lenyo es fibrozo i kon toda esta tripa, kontiene poka agua guaydimi….! Las ojikas se kontentan de bever un poko de agua kuando kaye luvya… Kita florizikas blankas de unos 10 cm.
La fruta asemeja a una muy grande patata.
Las semilyas de esta fruta biven 5 anyos ! Tiene una pulpa de kolor bej klaro
ke puede ser sponjoza o terroza. No me demandesh la savor ! Nunka la gosti !
Ma parese ke komen la pulpa freska i de las semilyas se ekstreye azeyte para kozinar. Ademas las kavretikas se pueden alimentar kon esta fruta. WIKEPEDIA dize ke kuando estan bastante grandes, el arvole se puede kavakar i kontener mas de 6000 litros de agua. Un depot de mil maraviyas !
En un tipo de Babobab la unika flor sale kada 50 anyos… La flor es mas grande ke una persona ! Madre miya bendicha ! Me espantariya aserkarme !
Asperar 50 anyos para ver este mirakulo….
No ay kavo a las maraviyas ke Dio mos regalo…
Sharope blanko
SEFARADIMUESTRO
Artículos Relacionados: