Mi Querido,
El tiempo ke yo estare mas aedado,
Y ke me veras la mas parte asentado,
En vezes mal vestido y no arapado,
No te ancieyes de verme en este estado,
Te rogo mira a entenderme.
****
No me critikes si do valor al dinero,
Siempre devo pensar al dia vinidero.
La vida es larga,dinero da coraje
Esperar ayudos es media muerte kaje.
Yo kero asembrar para ke tu recoltes
Por favor,a mis consejos no te revoltes.
Te rogo mira a entenderme.
****
Nunca topes el menster de corijarme
Con ciertas avlas no mires a derrocarme,
Si en mis comeres estare vagaroso,
O si me veras un poco mas angustioso,
En mi cama si esto medio esviyoso
Como si fuera con mi persona rabioso,
Te rogo mira a entenderme.
****
Recorda tu chikes, como me occupava
En tus primeros pasos como te caminava,
Mismo la comida a la boca te dava,
Siempre a tus yoros remedios topava,
En grande a tus estudios te ayudava,
Para ver tu sonrisa kualo no pensava?
Con mis bezos y mis cantes te consolava,
Yo yeno de gozo en los cielos bolava..
****
Si un dia cambiara mi buen destino
No me aleshes de tu alma,de tu tino…
Te rogo no te olvides todas mis penas
Mis deseos qu’esten gravados en tus venas.
En mi dezespero y ennuvlado dia
Tu sonrisa ke seya komo sol ke me bria,
Siempre kero ver akel amor ke yo via
Deseo ser tu orgulio,tu alegria.
****
Fin el dia d’alcavo de mi esparticion,
Te vere con gozo y con mucha affeccion,
Te rogo mira a entenderme.
Artículos Relacionados: