EL DIA DE LOS INNOSENTES
DIA DE SAKRIFIKAR BESTIAS PARA LA RELIJYON ISLAMIKA
Era antes unos kuantos diyas…. Las kalejas boltaron a rios de sangre otra vez. Dia de grande fiesta i alegriyas en el payiz… Durante kuatro diyas se selebro el “Kurban”, i pasaron del kuchiyo milyones de vakas, de gameyos, de ovejas i de kodreros…. Fueron vendidos i yevados de fuersa, unos fuyeron i fueron apanyados kon barbariya i kastigados ! No kero kontarvos las dezgrasyos ke mostraron en la televizyon para interesar la gente ! Yo estuve hazina sin mizmo avrir la TV ! Lo interesante i lo mas horrifiante es ke el korban se “korta” en la prezensya de los chikos al deredor. Estos se ambezan de esta manera la sakrifikasyon por la relijyon, la mankura de piadad, el koraje de matar… Oy kodreros, amanyana personas… i si-mizmos!
Me vash a dizir ke milyones de bestyas son kortadas kada diya i vendidas komo karne en las karnaseriyas. Si ! Esto es una otra dolor de korason ke egziste en todos los lugares i no se puede evitar todo el tiempo ke al humano le plaze komer karne. Es auzado des de su primera chikes… Le prokura la proteina ke nesesita a su puerpo. Por seguro ke egzisten munchos vejetarianos, veganos ke refuzan de komer bestias…. Unos refuzaron la karne dospues ke vyeron lo ke se pasa en los mataderos.
Komo alivyanar el korason ? Kon el presyo de la karne ke asuve kada poko mas i mas personas no estan puedyendo ni aserkarse de la karne. Se konsuma muncho mas poyos i pishkado ande ay mar i rios. Oy se izo mas fasil i por konsekuensya mas barato de merkar poyo i pishkados pomodo de las kompanyias industrializadas ke produizen en massas los poyos, los guevos i los pishkados, alimentos ke deven ser konsumados por el humano.
Ademas se save ke komer karne korolada dospues de una sierta edad no es bueno ni por el korason, ni para las venas, puedyendo kavzar un alto kolesterol. Se save, si, ma no se toma en konsiderasyon ! Savemos ke fumar sigarios tambien es muy danjorozo i kavza el kanser portanto dayinda oy, las fabrikas ke produizen sigarios son entre los ke tienen las mas altas ganansyas. Turkiya es uno de los payizes ke sistematikamente aze todo lo posivle, anti-publisitad i anti-propaganda en la medya, taksas muy altas para los ke merkan sigarios, defensa absoluta de fumar en lugares publikos, restaurantes i mizmo en siertos bares i lugares de divertimiento, todo maraviya maaaaa….. dayinda fuman i fuman ! En la kaye, en sus kaza, i no se mas ande ! No les viene meoyo mizmo en vyendo en la TV lo ke los hazinos sufren en los hospitales atados a los tubes de oksijen i luchando para kada soplo ke toman…. Dezgrasya…. Dezgrasya tambien las drogas ke sirkulan lo mas entre los mansevos malgrado el kontrol i la lucha de las fuersas del orden. Yo no tengo mas ideya de lo ke se puede azer… No ! Los ke les prokuran este tosigo son los mas kruales assassinos a mis ojos…. Son las familyas ke deven tener los ojos avyertos en ventikuatro !!!!
I UNA ANEGDOTA RELATADA AL “KURBAN”
Un hombre entra supito a la meskita a la mano un grande kuchiyo i demanda
– AY entre vozotros uno muzulmano ?
La gente s’espantan i se kedan kayados. Uno de al fondo se mete en pies i dize
– Yo so muzulmano !
El hombre kon el kuchiyo i el viejo salen enjuntos afuera. Mas aya ay vakas i kodreros. El hombre le dize
– Te yami para ayudarme a kortarlos. Yo no puedo solo.
Lavoran (!) un tiempo i el viejo le dize
– Me kansi…. Me vo a mi kaza, topa otro .
El mansevo torna a la meskita kon su kuchiyo en sangre i demanda
– Ay otros muzulmanos aki ?
Todos, pensando ke lo korto pedasos a el ke salyo antes, se kedan kayados i miran delantre de eyos i lo miran al imam de la meskita no savyendo ke azer…
El imam muerto del sar empesa a gritar
– Ke me estash mirando a mi ?!!! Ya me ize muzulmano en azyendovos abokar un poko ?
Era jimnastika !
Dias buenos ke tengash…
Artículos Relacionados: