Komo ya lo savesh por siguro, los payises ande se avlo lo mas el djudeo espanyol eran akeyos payizes ke se topavan en los teritorios del Imperio Ottoman. Es este imperio ke mos avriyo sus puertas kuando muestros aguelos fueron ekspulsados de
Espanya i ay mas de 500 anyos ke bivimos en estas tierras sin konoser, bendicho el Di-o, todas las desgrasyas ke afitaron a muestro puevlo en los payizses de Europa i mizmo en los payizes arabos.
Kuando el Imperio Otomano se dezazyo, los djudios ke biviyan en payizes ajenos agora, komo la Gresya, Bulgaria, Macedonia etc…, konosyeron malorozamente la mizma suerte ke muestros ermanos de Europa.
Esto para dizirte ke no es posivle, de dinguna manera, ke personas ke biven lado kon lado kon el puevlo de los payizes ajenos ande son minoritarios, no apanyen, no empleyen siertos biervos del payis. Kon sienes de anyos de uzo, estos biervos azen partida de la lingua i de dinguna manera nos son mas biervos turkos o zurzuvis ! Son halis djudeo espanyol. I no importa la rais, la kolor o la relijyon de estos biervos ! No egziste djudyo sefaradi ke nos los empleye…
Agora… Ken son estos djudyos sefaradis ? Esto es otra lakerda ! No kero irme mas aya… Para mi el djudyo sefaradi es madam Luiza ke mora en la koshe.. el musyu Tazartes de Shishli…. Roza de Goztepe.. Entenditesh lo ke kero dizir ? Madam Ester de Izmir o Janet de Alsancak… Mi gente en Turkiya !
Los ke moran en los Estados Unidos, en la Amerika Latina en Fransya i en Inglaterra son i eyos djudyos sefaradis ke se fueron a estos payises de las tierras Otomanas i saven egzaktamente ke
kero dizir kuando digo ” ya me alishtireyi ” (ya me auzi) “reelamente” (en verdad) “me ezvacheyi” (no lo kero mas malgrado ke lo keriya antes – to give up) chekinear (yo lo kijiera ma no se si se puede, es ermozo, es permetido, kaye bien etc.) achiliyar el korason ( ekspresyon ke kere dizir ke la persona se siente alivyanada i feliz supito)…. “Dospues” es la palavra djusta para dizir “later” en inglez ..
Komo lo dishe antes, puedesh siempre demandar la sinyifikasyon de los biervos ke no konosesh, los puedesh notar i ambezarvos porke lo meldaran, o lo oyiran siempre de la boka de avlantes del judeo-espanyol. Por la simple razon ke ES muestra lingua des de sientos de anyos ya. I sin eyos no tiyene savor muestra lingua i NO ES muestra lingua.
Por sierto ke ay biervos ke no konosko yo porke son uzados por los sefaradis de otros payises komo “ozadiya ” “brajones” “almuerzo” ke los konosko AGORA por ver los uzados… Es fasil de entender kualo son i no parto la berendjena en 120 pedasos …Aksepto los de los otros ! Porke ke no akseptan lo de mozotros? El djudeo espanyol HALIS de Estambol ? (Halis kijyendo dizir puro)
Mis biervos no son para dingunos espesyalmente ma para todos ke azen una istorya por biervos en djudeo espanyol ke mos vinyeron de otras linguas.
Mijores saludos
sharope@[email protected]
Artículos Relacionados: