El rezultado de mi bushkida la veresh abasho:
Kon kada anyo ke pasa, mos azemos mas aedados. Por mode de esto, te arogo Dio mio, Grande i Poderozo, de ensenyarme el arte de envejeserme de manera onoravle i de amostrarme la valor de los dias ke tengo de bivir.
Ambezame komo no tener iluzyones ke los anyos me izieron mas meoyuda, ke me kuadra mucho, ma so demesmo palavradji.
No me permetas de tomar la palavra a toda okazión, i toda vez de enkapricharme i de no menearme de mi opinion. Kitame mi dezeo profundo de ensenyar a la djente komo se bive, de kerer perfeksionarlos, i de enfasyarlos kon mis konsejos… Ambezame komo dar i tomar i siempre no bushkar la alguja en la paja.
Ayudame de no bozear la gana de la djente, de achetar la opinión de los otros, de no mesklarme kuando los otros avlan, i de echar el kalpak en kada konversasion kuando prime i no prime. Permeteme de aretar mis palavras i no me agas avlar, ke la palavra es de plata i la kayades es de oro.
Permeteme de konservar un meoyo klaro i no pedrer el tiempo en repetando los detalyos ke no primen. Mas bueno englutirlos i non afedentar los amigos.
Dame fuersa i sanedad de tenerme kayada, de no estirar la lista de mis dolores o dolorikas, malgrado ke es mi plazer de avlar sovre eyos, por modo ke eyos engrandesen de anyo para anyo. Dame kon onor i pasensya de eskuchar las dolores i sufriensas de la otra djente, no takilearme de eyos i no darles a entender ke son minores. Akavidame de non aparejar a darles mis kuras o embiyarlos ande mis doktores.
Ensenyame no solo de ver las faltas de los otros, porke yo en vezes me yerro tambien en aziendo i avlando bavajadas grandes, i me komporto feyo. El ke mucho save mucho se yerra. No me agas un tentenometokes. Ambezame de ver en la djente las kozas ermozas i las buendades, de respektarlos i tambien de amostrarlos ke los apresio.
Te arogo, amostrame komo puedo aprovecharme de la eksperiensa, la konosensia i la grasia ke rekoji i de no echarlos kon kolaylik. Amostrame komo en mi vesjes devo de komportarme kon takto…
Resientemente meldi en el Internet un anónimo poema yamado “Bivir una vida ke importa.”
Me siento mucho más inklinada a demander ke es lo ke realmente importa.
Importante seria de aprovecharme komo egzemplo para kada echa miya de Amistad, saviduria i voluntad de ayudar a otras djentes en mi alrededor .
I lo mas importante, Dio mio, no me permetas ke me tomen komo meze, de reirsen de mi o de burlarsen de mi. Dio Grande, tengo menester de tener amigos en los dias de alkavo de mi vida. No es importante si eras seheluda o konosida ma kuantas djentes dainda bushkan tu kompanyia. Kero ke se akodren de mi, pormodo ke se ke algun diya mi vida va yegar a su fin.
Para mí, bivir una vida ke importa es 95 anyos de edad, kon un solo ijo ke espero un día se verá reflektado en sus kreaturas komo ijo i padre, komo alguno ke bivió una vida ke importa.
Rivka Abiry
Artículos Relacionados: