Del Me'am Loez de Ruth Refael Y. Benveniste, Saloniko 1882.

...i aki traygo un akontesimiento tan maraviyozo ke lo eskrive Rabbi Israel Yosef Benyamin en su livro de viaje ke el izo, ke se yama Masae Israel. Va kontando por muestros ermanos djidios ke los ke moran en la tierra de Maroko de las munchas angustias i sodjeftos ke eyos tienen; el dito viajador dize: Te vo akontar porke tomes por enshemplo una de mil de las angustias i las kanserias ke somportan en dito estado los ke son de otra emuna. Vo akontar en oyidos de los meldadores el akontesimiento ke akontesio en una mosika djudia, i este akontesimiento ke te vo akontar es una grande testimonyansa ke ainda se topa dientro de un puevlo el kual es majado i afriido, mujeres virtudozas i buenas, yenas de mitsvat ma'asim tovim, las kualas non son mankas de akeas mujeres antiguas, Hulda 'Hanevia i Debora 'Hanevia, komo ansi tambien van a ver ke kantidad de grande fuersa estraordinaria esta plantando en el korason de muestros ermanos djidios los ke moran en la tierra de Maroko en perat de la temor del Dio. De esta mosika pueden tomar un sinyal i amostransa las mosas de muestro puevlo las kualas son chivilizadas i
entendidas.

En la sivdad de Tanza en la tierra de Maroko avia un djidio ke su nombre Shelomo Haguel (Hachwel), el kual tuvo una mujer virtudoza ke le pario munchas ijas ermozas i grasiozas. Ma una de eyas pasava a todas en la ermozura i en el meoyo, ke aparte ke su padre i madre le tenian muncho amor, ansi tambien fayava grasia en ojos de todo el ke la via. Esta ijika su nombre ke se yamava era Solika i era de edad de 12 anyos en anyo 5591 en el tiempo ke akontesio este akontesiomiento ke te vo akontar.

Esta mosika era ermoza de forma i ermoza de vista muncho. El Dio le dio a eya mas parte de grasia i ermozura apunyados, muncho mas de todas las mosas de la Afrika. Puja de la ermozura era la fragua de su puerpo, la grasia la ermoza la kuala pasava enriva de la ermozura de sus karas, los kaveyos de su kavesa muy ermozos enkadenados, sus ojos travados arodeados kon sejas pretas muy ermozas. La puja de todo esto mas i mas era en entendimiento i meoyo, i todos los kaminos kon ermozura i grasia. Todas estas kozas despertaron un aire grande de selo en korason de los musulmanes los kualos eran vizinos de su kaza. I disheron entre eyos: en verdad ke es un gran pekado ke una djolya komo esta mosika ke sea djudia. I komo se tiene ke gozar djidio a ke la tome a eya! Pekado i revilyo sera kontado a mozotros si desharemos una djoya komo esta en sus manos! I por azer sus penserios ke eyos pensaron kitaron un pregon por las moradas de los musulmanes, i alevantaron shaites (edim) falsos ke dieran edut ke oyeron de boka de la muchacha ke su veluntad de eya es ke kere trokar su ley i aboltarse i kreer en la ley de eyos. Kon este indjenyo entraron en la kaza de esta mosa ermoza i la aferraron kon muncha fortaleza i se la yevaron a la sivdad de Fes la kuala es la kapitala de Maroko ke en eya es el estado del reynado, i se la entregaron en poder del ijo del rey
de Maroko el kual tenia ke eredar la korona del reynado, porke iziera en eya sigun su veluntad.

Sigun la vido el ijo del rey a la mosika fayo grasia i mersed en sus ojos i le entro el amor en su korason mas de kualunke mosa, i le demando redja a la muchacha a ke este amor ke sea para el, i el la tenia ke tomar por mujer, ma kon kondision ke troke la ley ke eya kree en eya i ke krea en la ley de eyos.

Ma en baldes fue todas las avlas i las redjas de todos los grandes i los redjales del reynado ke avlaron i rogaron a eya a ke le iziera el kyef i la veluntad del ijo del rey. Eya respondia kon sus avlas diziendo: todo modo de aver i rikeza del mundo i su inchimiento son komo nada i komo estierkol kontado enfrente del Dio de la verdad i su ley santa. El krio a los sielos i a la tierra, el tiene la fuersa i la barragania, i el es el ke podesta sovre todos los afigurados i kriados del mundo i su inchimiento. En su mano estan las almas de los bivos i los muertos. El es el ke kito a muestros padres de Mitsraim i les dio a eyos su ley la santa en la montanya de Sinai. Kon esta ley nasi i kon eya me tengo ke murir. Kon muncho korason alegre i kon muncha veluntad de korason yo esto pronta i aparejada por ayegar mis vidas por korban a el Dio delantre de la ara de la verdad. Tambien si me daresh i me enkoronaresh kon todas las djoyas de este mundo i todo lo bueno o mijor de esta tierra en mi mano entregaresh, non tengo ke mankar ni echar enbasho ninguna koza de todo lo ke yo vos avli i vos dishi. Yo so djudia! Yo esto en vuestras manos, aziendo en mi sigun vos plaze....

...El inat de la muchacha le izo suvir la ravia del ijo del rey fina ke non se topo milizina para amaharle su ravia, i enkomendo ke le kortaran la kavesa de la senyora ermoza. Devista la kitaron a la muchacha al kampo de matansa. Se entiende ke modo de yoro i lemunyo fue akel dia a muestros ermanos los djidios de ver esta ermozura ke va akaer en un punto. Todos los korasones se apretaron por este negro malogramiento. Eya dizia por el kamino ansi la plazio al Dio Baruh U i yo resivo su setensia kon muncha alegria, komo si fuera ke me vo a ir asentar en el talamo. La alegria entera ke tomo es ke vo arestar en la emuna del Dio Baruh U, i su ley la santa la kuala la dio por mano de Moshe rabbenu non la deshi.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorMemorias bundistas en Yiddish
Artículo siguienteJavier Camarena Regresa al Met de Nueva York, y Podrá Disfrutarse “En Vivo en el Auditorio Nacional”, el Sábado 10 de Marzo
Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.