Diario Judío México
EL KEYF DE SER HOMBRE!
FUERON KRIYADOS PRIVILEJYADOS!
PADRES ERMANOS MARIDOS I IJOS….
EYOS SON MUESTROS MUY KERIDOS.
MA, NO ES POR ESTO KE NO MOS SELAMOS!
Mos selamos, normal,
- porke estos no tienen la ovligasyon de pelarsen kon esta pega dezgrasyada los pelos de todo el puerpo! No se ke sadisto ambezo esto a las mujeres!
- Tener mustachos es sus orgulyos! No tienen dinguna verguensa de ESTO!
- Les abasta un sako chiko para meter sus kozas kuando van en vakansyas.
- Tienen la kapasitad de avrir todo modo de bokales, konservas, jarros sin demandar el ayudo de dingunos!
- Alkansas a las alturas en la kozina i en todo modo de almaryos
- No tienen ke pintarsen la kara, la seja, el ojo i la boka kon estas suzyedades chimikas kon kolores violentos i ir al banyo kada poko para metersen mas i mas, pensando ke se efaso!
- Los keridos no los miran kon piadad en sus ojos kuando se engodran un poko…
- No tienen menester de kaminar ensima de los “palos” debasho de los povretikos de los karkanyal komo si fueran azyendo un show en el sirko ! Un otro sadisto ke invento ansina de dezgrasya !
- Sus kalsas nunka se fuyen i dunke no tienen ke echarlas al sierkol muevas muevas…. Todo para ke el fabrikante gane mas i mas… Los van azyendo delgadiiiiiiiiiiitos!
- Penyarse? Segundos! No les importa…. Kon kaveyos tan kurtos no tienen ni de pensar mizmo a esto ! No tienen ni menester de sekarlos, sin avlar del todo de lo ke mozotros azemos por muestros kaveyos ! Ademas, bushkamos las manos
ekspertas de los kuafores, manko los vere! Mos sorven el tiempo, la pasensya, paras, inyervos. AAh ah ! No demandes.. … Bigudis en la kavesa en durmyendo? Eyos se burlan solo de muestra agoniya sin mizmo pensar ke si la mujer se sumete
a esta tortura es para plazerles! Para kualo mas ? No kreyesh a dinguna mujer si dize “Si lo ago es para mi mizma !” Es falso ! Mintiras…..
- El sekso fuerte puede apanyar i kortar el animal ke va komer kuando tiene ambre…
- Tomar una dush i vistirsen les toma 10 minutos! Toman sus jaketa i salen afuera! I… Si tienen de asperarte… La fin del mundo!
- No uzan yevar kon eyos una bolsa yenna de kozas ke no tienen de menester… Tienen aldikeras para meter paras, yaves i a vezes (!) una rida ! Los sharonfonfones te kitan un kalem i un briquet si se nesesita! Papeles i papelikos tambien kaven en esta multitud de aldikeras en sus pantalon i la jaketa!
- Los chamashires ke se visten debasho de sus vistidos en paketos de 5 deyos, kostan el 10 porsyen de un soutien de una mujer! … Ma pezan i toman lugar syen vezes mas!
- Mizmo a 50 anyos, dingunos diran por el ke “kedo en kaza” ! …. Se puede kazar kuando se desida..
- Las kolores de su kara son orijinal ! No “abashan” en la luvya i ensima de las tovajas kuando se lavan la kara! Ma la tovaja ke uzan nunka bien estirada.... echada komo kanyamazo ande les viene !
- Dingunos les van “echar ojos” al pecho o a las piernas kuando avlan kon eyos!
- No tienen el ovligo de trokar de alkunya kuando se kazan!
- Un chiko slip les abasta para ir a nadar.
- No tiyenen ke provar ke tienen los mizmos derritos kon la mujer! Son eyos ke desidan las leyes i siempre son en sus favor..
- No tienen una “tiya” ke los vijita kada mez !!!
- Sus ijos les viene en los brasos echos i prontos sin ke tengan de lavorar i sufrir 9 mezes para azerlos!
NUNKA SE TIENE OYIDO UN DOKTOR POR HAZINURAS DE HOMBRES!!!
No lo tienen de menester…..
- Son “honorados” por ser “Don Juan” i englenarsen kon los sentimientos de las mujeres ! Ven veras ke la mujer perye su “honor” i no tiene dinguna dinyitad i konsiderasyon si aze lo mizmo komo los hombres! Ken invento esto? Por seguro los hombres!
Kon el tiempo ke pasa i el progresso en la vida kultural i
sosyal, se estan trokando las kozas poko a poko, porke
son las mujeres ke no estan “komyendo chanchas” mas !
Ganan sus vida i eskojen sus maridos tambien ! Ma dayinda
ay i siempre avra DIFFERENSYAS ke mos daran selos i
gritaremos “injustiya” ! Komo no?
Eyos fueron kriyados privilejyados!
Ke vuestros ojos briyen siempre de plazer!
