O’hel Moshe es uno de los sinko kuartieres de Yerushalayim ke yevan el nombre del filantropo sefaradi Moshe Montefiori; los otros 4 son Yemin Moshe, Mazkeret Moshe, Zihron Moshe i Kiriat Moshe. Este es uno de los mas importantes kuartieres ke fueron fraguados en Yerushalayim verso la fin del siglo 19, kuando empeso el proseso de salida de los djudios afuera de las murayas de la vieja sivdad. Aun ke el primer kuartier fraguado en la mueva sivdad fue Mishkenot Shaananim, yamado mas despues Yemin Moshe, lo ke karakteriza O’hel Moshe fue de ser el primer kuartier yerushalmita povlado enteramente por sefaradis.
La konstruksion de O’hel Moshe pudo ser realizada grasias al Fondo Mazkeret Moshe kreado en Londra en 1874, por los shefes del “Komite de los Shelihim (embiados) de las komunidades en Ingletierra’ kon okazion del kumplimiento de los 90 anyos de Sir Moshe Montefiori. Los djudios en el mundo fueron yamados a azer donos a este fondo i un anyo i medio despues de su fondasion ya se avia arekojido la suma de serka de 9000 liras sterling. Los dirijentes del fondo desidieron de merkar en Erets Israel terrenos para menesteres agrikolos ma de konsentrar sus aktividades en la fragua de muevos kuartieres, prinsipalmente en Yerushalayim. El primer a ser konstruido fue el kuartier de Mishkenot Israel ke mas despues su nombre fue trokado al de Mazkeret Moshe i ke era povlado en su mayoria por eshkenazis.
En 1880 los shefes de la komunidad sefaradi en Yerushalayim i entre eyos el rav Yaakov Shaul Elyashar konosido tambien kon el nombre de “Yisa Braha”, ke mas tadre fue elijido al posto de Rishon Letsion; el rav Yosef Uziel, ke kumplio entre otras el posto de Av Bet ‘Hadin i era uno de los lideres de la komunidad sefaradi; el bankero Haim Aaron Valero i Shmuel Baruh, una de las mas importantes figuras al seno de la komunidad, se adresaron al reprezentante del fondo en Erets Israel, Yehiel Mihal Pines, demandole de fraguar, para la povlasion sefaradi, un kuartier semejante al de Mazkeret Moshe.
Aun ke al prinsipio esta demanda fue rempushada, por razones finansiarias, en fin la komunidad sefaradi reusho a lograr un akordo ke fue firmado, en 1882, entre la Asosiasion O ‘hel Moshe i el Fondo Mazkeret Moshe. La asosiasion resivio un terreno de 19.600 metros kuadrados sovre el kual, segun el plano orijinal, devian ser fraguadas 80 kazas, aun ke en fin de kuento fueron fraguadas 60 solamente, para deshar, a la vista, un espasio entre una kaza i la otra. La konstruksion se empeso en 1883 i se termino dos anyos mas tadre.
Referandose a la konstruksion de los dos muevos kuartieres yerushalmitas, el editor i redaktor del jurnal “‘Hatsvi”, Eliezer Ben Yeuda avia eskrito en uno de sus artikolos:
“Esta semana se termino la fragua de las kazas de los eshkenazis en el kuartier Mazkeret Moshe, i en serka se terminara la fragua de la parte sefaradi tambien. Este lugar ke solamente tres anyos atras era un kampo asolado se transformara en una grande i ermoza sivdad. Ayi seran ensembrados arvoles i flores i el sera la gloria de Yerushalayim….”
Tomando komo modelo a los kuartieres fraguados anterioramente en Yerushalayim, O’hel Moshe tambien fue konstruido en forma kuadrada, kon a su sentro un grande kortijo ande tenian lugar las aktividades sosiales de akeyos dias, i las moradas a su deredor. Los pozos en medio del kortijo rezolvian, en parte, el duro problema de agua ke avia en akeyos dias en Yerushalayim.
Jeneralmente las kazas tenian dos kamaretas: la una a la entrada ke servia de kuzina tambien i la otra al fondo ke servia de “salon”durante el dia i de kamareta de echar las noches. Algunas de las kazas tenian bodegas.
En 1887 fue plasada sovre la entrada prinsipal del kuartier una tabela para la perpetuasion del nombre de Moshe Montefiori segun se avia engajado la Asosiasion O ‘hel Moshe delantre del Fondo Mazkeret Moshe. Esta tabela pueder ser vista asta oy dia en la entrada de O’hel Moshe, en la kaye Agripas, al lado del Merkado Mahane Yeuda.
En su livro “Yaldut beYerushalayim” (Chikez en Yerushalayim), el eskritor sefaradi Yaakov Yeoshua eskrivio entre otras:
“Al deredor del kuartier avia kampos muy grandes. Los ayres ke asoplavan arefreskavan los dias kaentes del enverano. Sus abitantes bivian en paz i armonia, kada uno basho su techo. En oras de tadre, kitavan las banketikas al portal de kaza i se asentavan a konversar, a “echar lashon”, las mujeres de una parte i los ombres de la otra. Los arvoles ensembrados en el sentro del kortijo davan al kuartier un atmosfera de kalmo. En mizmo tiempo las kreaturas djugavan en el kortijo basho las miradas alegres de sus djenitores”.
El primer kal sefaradi fraguado en O’hel Moshe es el “Kal Grande” ke durante largos anyos dio sus servisios a los fideles sefaradis afuera de las murayas de la vieja sivdad. El kal fue inaugurado en el mez de Enero de 1887, ochen dia de Hanuka. El jurnal “Havatselet” ke aparesia en akeyos dias deskrivio la aviertura del kal diziendo:
“Muestros ermanos sefaradis, abitantes de las muevas kazas ke fueron fraguadas kon la moneda de los miembros del fondo O’hel Moshe i los emprestimos ke resivieron del fondo Mazkeret Moshe, en Londra, selebraron la fiesta de Hanuka en el muevo kal . En este dia se arekojeron ayi las personas mas eminentes de la komunidad sefaradi. El Rishon Letsion, el rav Meir Panidjel avrio las puertas del Aron Akodesh, i el gevir Aaron Haim Valero metio a su interior los Sifrei Tora. En fin el hazan meldo la orasion de “Mi shebireh” rengrasiando a kada uno i uno de los ke ayudaron i kontribuyeron a la fragua del kal.’
En segito a los terretemblos ke tuvieron lugar en Yerushalayim en 1927 i 1928 fueron kavzados seriozos danyos al edifisio. En los lavoros de restorasion fue desidido de adjustar otrun etaj para la ezrat nashim, la galeria de las mujeres, ke azia falta a esta grande sinagoga, ansi ke fue ancheada la superfisia del edifisio. Al Kal Grande ke es ainda aktivo i esta manteniendo su ermozura i esplandor vinian a azer sus orasiones los gevirim del kuartier, los notables i los rikos de la komunidad sefaradi.
YomTov Ben Efraim Taranto, komo vertud para el nasimiento de ijos varones ke nunka tuvo la suerte de traer al mundo. Los yehidim de este kal, ke sus puertas eran aviertas 24 oras al dia, yamado el kal Taranto eran djente mas simple, ke se alevantavan de madrugada para ir a sus lavoro.
En desparte de dos de los shefes de la Asosiasion O ‘hel Moshe, Haim Valero i Shmuel Baruh, moraron ayi rabinos sefaradis de los mas eminentes ke kumplieron tambien postos importantes al seno de la komunidad.
Ma no ay duda ke una de las figuras mas importantes i konosidas de los moradores de O’hel Moshe es el Sr. Yitzhak Navon, V Prezidente del estado de Israel, ke paso ayi una parte de si chikez. El konta a kada okazion sovre la vida en este kuartier, las bozes ke se oyian del kal, las golores del hamin ke las amas de kaza embiavan dia de viernes al uniko orno ke existia ayi, la serenidad i amistad entre el vizindado, i los tiestos de ruda i yasmin, ke se puedian ver en kada ventana i portal de kaza.
Aprovechandose de estos rekuerdos de su chikez el Sr. Yitzhak Navon eskrivo en los anyos 70 la famoza piesa de teatro “Bustan Sefaradi” ke tuvo grande sukseso i fue prezentada mas de 300 vezes. Eya fue metida en shena, por segunda vez, pokos anyos atras, otra vez kon grande reushidad.
Yitshak Levi z”l es una otra de las figuras bien konosidas de entre de los sefaradis ke moraron ayi. El, kon su ermoza boz de bariton enfichizava a los abitantes del kuartier. Kon el tiempo el yego a ser direktor de la Emision Djueo-espanyola i Direktor del Departamento de Folklor de Kol Israel. Es grasias a Yitshak Levi, ke kon su perseveransia i su duro lavoro reusho a arekojer sienes de kantigas i romansas djudeo-espanyolas i a publikar sus tekstos i melodias en los 4 volumes de su livro “Chants judeo-espagnols”, ke estos kantes pudieron ser salvados del ulvido i son interpretados en Israel ansi ke en diversos paizes del mundo.
En los ultimos anyos se empeso en un proyekto de restorasion de este kuartier dirijido por la “Min’helet Lev ‘Hair” (Asosiasion del Korason de la sivdad). Segun el direktor de esta administrasion el Sr. Moni Ermoza, en el kuadro de este proyekto ya fueron restoradas las kazas i el kortijo del kuartier, fue avierto un sentro komunitario ke da sus servisios a los abitantes, muy diferentes agora de los ke bivieron ayi en el pasado, son organizadas aktividades sosiales i kulturales, sin olvidar el Koro Lev ‘Hair ke tiene un ancho repertuar de kantes djudeo-espanyoles. El Sr. Ermoza mos konto de mas ke durante el mez de Elul vienen al Kal grandes grupos de elevos i de turistas ansi ke personas de todas las partes del paiz para dizir los Selihot.
O’hel Moshe, de los primeros kuartieres de la mueva Yerushalayim, es una ermoza piedra mas en este mozaiko ke konta la istoria de los yerushalmitas en jeneral i de los sefaradis mas partikularmente.
Artículos Relacionados: