El lechero onesto

En akeyos dias, el lechero no era una persona ke traiya bokales de leche a la puerta, kada demanyana. Era un vendedor ambulante ke vendia leche de dos resipientes ke estavan kargados uno en kada lado de un kavayo. Por kualkera razon, el animal era siempre un kavayo, i no un azniko, ke servia para todo.

Este lechero en partikolar, kada dia anonsava su prezensia en la mahalle (el kuartier) en gritando en boz alta, “I LECHEEE!”. Un dia, un ombre viene kon su djarro para ke se lo incha de leche, komo era su uzo desde munchos anyos; ma esta vez, despues de pagarle, ezito un poko i le demando:

-Dime, deke vas gritando kada vez “i leche” a lugar de solamente “leche’?

Kon un ayre lo ke ay de mas natural, el vendedor le responde:

“De ke? Por ke lo mas es agua, ma kontiene i leche tambien.”