El mallogrado mazal de los Djidios de Salonik

Por:
- - Visto 819 veces

La povlasion judiya en los Balkanes empeso al tiempo del Segundo Templo.

Aviyan kazales i barrios jidios, avlavan una lengua miksta kon palabras ebreyas, latinas, i gregas. Estos romaniotes de los premeros tiempos, poko nomerozos, vieron yegar las mushidombras de djidios de Sefarad, a la fin del sieglo XV.

En este tiempo, Gresia i Balkanes eran kayidos basho la dominasion de los Turkos. Una dominasion fuerta i krudela. Los pueblos kristianos basho la dominasion ottomana no tenyan algun derecho de peleyar, kuando el Sultano Bayazit deskojo de yamar djidios de Espania por musafires. Por los Turkos, el provecho fue de puevlar estas tierras nuevas kon djidios, aboresidos de los kristianos, ke no puediyan azer otro modo ke alavar


el poder de los Turkos. Sin la dominasion turka, nunka los pueblos balkanikos i gregos averiyan achetado la venida de djidios. De 1492 a 1912, la vida de los djidios de Salonik fue oroza. En 1912, la Turkia piedriyo la dominasion de estas tierras en Evropa. Se dize ke los djidios yoraron kuando “el Turko” se fue, porke ya saviyan ke el poder kristiano grego iya ser antisemito. Las mas joven de las jenerasiones de djidios de Gresia se izieron “mas gregos ke los Gregos” en asperando ke este ellenizmo los azga achetar.

Ma eran poko los Gregos ke nos aboresiyan los djidios. En 1936, la Gresia kayo al poder de un diktador fashista, Metaxas, ke teniya grande simpatiya por Hitler. En estos tiempos, la Evropa entera se kuvriyo de goviernos fashistas i antisemitos. No se puediya alavar su bandiera sin aboreser los djidios. Era komo una hazinura del meoyo.

La Segunda Gerra Mundiala empeso el 3 Setembre 1939, ma nada akontesio en Balkanes fina 1941.

Mussolini se selava mucho de las viktorias de Hitler contra Polonia i Fransia.

Dechidio, el también, de azer grandes konkistas, en el kampo mediterraneo, para refraguar la Roma antigua. Aviya okupado la chika Albania, sin mucho danios.

Ma, a parte de esta chika konkista, la armada italiana no tuvo ninguna otra viktoria era komo si Mussolini aviya gastado lo poko de su vayansa en Abissiniya i en Espania.

Los Italianos no pudieron envader la Fransia, i se tomaron una dura haftona de los Ingleses a Sidi Barrani en Libiya, a diez kontra uno!. Esto enravio Mussolini.

En 1941, atako la Gresia! I sin avizar su haver Hitler, para lo meter basho el echo kumplido. Barminam! Nunka grande asperanza fue derrokada en tanta grande deziluzyon! Los Italianos fueron vinsidos por los Gregos, se fuyeron en Albania, i los Gregos los kastigaron en Albania! El mundo entero se reyia de las disfatas kipazeliyas de Mussolini. En Fransia (vinsida i okupada por los Almanes) se deziya ke kalia meter una pankarta a la frontera franco-italiana, onde se eskrivariya “BRAVOS GREGOS, KEDESH! AKI EMPESA LA FRANSIA!”. Hitler, para ayudar su amigo rezil, dechidio de mandar su armada en Balkanos, kontra Yougoslavia i Gresia.

La tradjediya yougoslava

En dos meses, abril i mayo, todo fue echo. Los Italianos yegaron Atena, i los Almanes Salonik. Los Almanes entrodusieron en los Balkanes el odio kontra los djidios, en modo rasisto. Antes, el pleyto era solo relijiozo, un djidio se puediya salvar la vida en se aziendo kristiano o muzulmano. Ma por el nazismo, el odio teniya a la raza. Amostraron, “sientifikamente” ke los djidios no eran benadames, eran “untermenschen”(basho-ombres), i kalia matarlos todos komo si eran pulgas o chinchas. Puevlos djidios, ke eran en estos paeses desde sieglos, iyan despareser en un anio!

Yugoslavia fue invadida por Alemania en avril de 1941 para ser desmembrada. Una parte de Yugoslavia estarA kon Italia y la otra parte kon Alemania. La principal razon de estos aliados kon Alemania komo Bulgaria es la posesiOn de la tierra.

Italianos i Almanes tuvieron a sostener une gerriya de partisanos krudela i sin ninguna piyada, de parte i otra.

Los Jidios de Yugoslaviya no eran adjuntados en grandes sivdades. Eran minoritarios, i despardidos en chikos barrios, kalejones i kortijos en kazales. Ajenos en una povlasion ke los aboresiyan. Las tres religiones praktikadas en Yugoslaviya eran todas tres antijudiyas, katolikos, musulmanes, ortodokses. Solo la kuarta relijion, el komunizmo teniya un poko de tolerensia i de piyada por los Jidios. Ma los jidios se akavidaron des estos amigos sin Dio, i los rabinos, fina el kavo, no desharon mansevikos loros ir a se aresentar en la rezistenza.

Los Almanes apodjiyan la Slovenia, i la Kroasia (katolikas), i la Bosnia musulmana. Kuando el govierno (serbo ortodokso) de Belgrade, kijo se defender contra la agresión almana, esta gerra turo poko, i la armada serba fue pichin derrokada. Vino la ora la mas preta por los jidios. No se kijeron adjuntar a los komunistos, i kedaron solos, en frente de las negreguras de las tres religiones, i del nazismo. Fue en mismo tiempo una gerra ajena i una gerra sivil. Los aktos de kruelda i las abominasiones no kedaron fina la liberasion, i mismo un poko dempues.

El kapo de banda Ante Pavelich, kapo de Kroates, resivio un diya un sesto ieno de ojos umanos, arankados a los enemigos por sus Ustashis. Kada kampo desrokava los kuerpos de los prijonieres, deshando pedasos de kuerpo enforkados. Los muzulmanos fraguaron una división de Waffen SS para ayudar la armada almana.

Se toparon mismo gursuzes para enklavar jidios sobra kruses de lenio, todo al longo de una karetera, i los deshar morir enklavados, komo se aviya echo por Jesus. Por los dezmazalados jidios de Yugoslaviya, el jenosidio fue total, a la chika eksepsion de los mansevikos ke se adjuntaron a la rezistenza komunista de Tito.

Los dezmazalados de Salonik.

La okupasion almana empeso el 9 de Avril 1941. Entraron en la sivda, saludados kon mucha amista por los Gregos. Los jidios, enserrados en kaza, supieron presto ke los Almanes no kieriyan kastigar a los jidios. Los jidios se vieron konfiskar las radios, i defender de entrar en bares i otros lugares de plazer. Ma se disho también ke los jidios de Salonik no iyan estar deportados, ke las Leyes de Nuremberg no les konsernavan.

I esto fue todo. Los jidios tuvieron UN ANNIO de segurida.

Los jidios no puediyan saber ke los Almanes, pueblo de Siniores, aviyan resentido un afronte, dal dia de la entrada. Abashados de los tankes, aviyan enkontrado jidios mas grandes ke eyos! Deviyan alevantar la kaveza para avlar a estos ombres, ermozos i grandes. Kontaron a Berlino esta inkredivla sorpresa. Ke deviyan azer contra estos super-jidios, ke puediyan estar peligrosos enemigos? Berlino arespondio. Kalia deskojer estos enemigos potensiales i los matar, antes de todos.

Jimnastik plasa de la Liberta (11.7.42)

El 11 Lulio 1942, salio una ovligasion nueva, todos los jidios ombres deviyan se adjuntar en la plaza de la Liberta(¡), por ke seyan deskojidos “lavoradores”. Los jidios no se akavidaron, porke era la premera negregura de los Almanes. Komo era diya de shabbat, se presentaron, temprano en la maniana, vestidos del mejor vestido, para se enskrivir a los Almanes, antes de ir al kal. Se toparon adjuntados al sol, basho armas i soldados, sin poder se fuyir. Los Almanes defendieron de yevar chapeo o entojos de sol, defendieron de se arensentar al ombra, o de se asentar. Todos kedaron en pies, oras i oras, el dia entero. Sin entender deke los Almanes deskojiyan chikos grupos para “azer jimnastika”, para topar los mejores para el lavoro obligatorio.

Fue un dia de alegriya para todos los antijidios, almanes, gregos, italianos. La jente reyia, i se burlava de los jidios, ke no entendían lo ke akontesiya. La polisia grega era presente, kon soldados i marinos almanes, askieres gregos i italianos. Ninias almanas, ke moravan en las kazas serka, estavan a las ventanas, reyian i tomavan fotos. Este djenem turo fina la tadre. A la tadre, los Almanes teniyan la lista de los “super jidios”, ke fueron mandados en duros lavoros, solo para los azer morir. Los desdishados deviyan romper piedras, forar burakos en la tiera, i después, los reinchir! Siempre al sol, sin agua, i poko kumida. Este infierno turo semanas. Unos kuantos de estos dezmazalados puedrieron atornar a kaza, kuando sus famiyas pagaron para azer liberar el ijo o el marido. Vieron atornar kemados de sol, flakos i hazinos, muertos vivos, piedes nudos, ke no teniyan otro vestido ke pedasos de jornal atados kon kuedra.

En diez semanas, la kestion de los jidios grandes fue reglada.

La estrella amarilla (Feb.43)

El 6 de Febrero 1943, salio la ovligasion para los jidios de yevar la estreya amarilla.

Esta estreya a la grega no teniya la mension JUDE, en alguna lengua. Teniya solo, estampado en preto, el numero de la karta de identida.

Los jidios fueron reunidos a finales de febrero de 1943 en tres getos luego trasladados en un campo de tránsito. Ayí, los trenes de la muerte los esperavan . Para desempeniar su mision, los Almanes se apoyaron en la polisía grega.

Los kolaboradores de los Almanes.

Los Gregos no teniyan alguna simpatiya por los Italianos, ma kieriyan mucho bien a los Almanes. Kavzo uniko el la sekunda gerra mundiala, los Almanes no tomaron prezioneres los soldados gregos, ke fueron dezmobilizados i mandados a kaza.

Idemas, los gregos aboresiyan los jidios, i estavan ienos de akuerdo kon las leyes antijudiyas.

Todos asperavan ke los jidios se vayan, en deshando todas las rikesas, falsas o verdaderas, ke teniyan.

Se toparon tambien kolaboradores jidios, ke esperavan rikesa i segurida en se aziendo haveres kon la Gestapo. No uvo, en Salonik, de polisia judia, kon palos, kasketas i stivales de kuero, komo en Varsovia. Ma uvo mas negro, brigadas de bushkeda, los bandidos de Vidal Hasson,

Ke konesiyan las famiyas rikas, puediyan arovar para sus faldukeras, i para los Almanes.

Estos lokos dezmazalados ke non entendiyan el fanatizmo del odio nazi no entendieron

Ke no puederiyan sobravivir a esta asosiasion kontra natura.

Los jidios de Salonik no toparon alguno ayudo kon el gran rabino Zvi Koretz, ke se metio al servisio de los Almanes, deziendo a los jidios ke se deviyan de no los araviar kon echos de fuyga o de resistenza. Fue mizmo fina amenasar de los denonsar a la Gestapo los resistentes gregos ke venieron le dezir de mandar en la montania los mansevos jidios, para la gerra partijiana.

Banditizmo a la eskala de un kontinente.

Komo lo disho el prokurador Jackson, al Jusgo de Nuremberg, la politika de konkesta de los nazis fue, antes de todo, una suksesion de shantajes, arrevatasiones, i de atakos a manos armadas. Arrovar las rikesas judias fue uno de los objektivos esensiales de el jenosidio.

La totalida de los jidios de Evropa fue konsiderada komo un yasimiento mineral de rikesas ke los super-ombres teniyan derecho de tomar, a kada pozada del jenosidio.

Esto iya del largo kampo de la alta finansa, fina la rekuperasion de sinizas umanas, de oro dentario, o de godrura para azer shavon.

Los Almanes eran jente kudioza, i no ulvidaron nada, piedras de tombas, ropas, kazas, magazenes, ovras de arte, vestimienta de los muertos, kaveyos de mujeres,

Los povres bogos de los muertos de Auschwitz fueron deskojidos, nada se piedriyo.

Los “Siniores” tenian tambien kuidado de deshar a sus mosos, polakos, fransezes, gregos, una parte del provecho, kada paes de Evropa tuvo su parte de vergüenza, kon estos Injustos, mucha mas numerozos ke los Justos.

En el kazo de Salonik, los Almanes mostraron uno strano interes por la vieja kultura sefardia.

Todas las arshivas judias de Salonik fueron arrovadas, i mandadas en Alemania.

Denpues, en 1945, la armada korlada las topo, i las mando en Mosku.

Estan dainda aya, la Rusia nueva nunka las kijo dar atrás, ni a Espania, ni a Gresia, ni a Turkia, ni a Israel.

Sin embargo los istorianos i bushkadores pueden obtener informasiones.

Mejor vale poko ke nada.

Los jidios de Salonik bushkaron mas a merkar la buenda alemana ke a kombater sus negregura. Esto fue el yerro.

No uvo alguna organizasion de fuyga, alguna organizasion de rezistenza, alguna kompra de armas.

La Partensya de los jidios.(15 Marzo 1943)

El 15 de marzo se fue el primer konvoyo. Cada tren se yevavab de 1 000 a 4 000 Jidíos que atravesavan toda la Europa sentral principalmente fina Birkenau. Un konvoyo se fue a Treblinka i es posible que deportasiones para Sobibor se uvieran efectuado, porke se encontraron Jidíos de Salonik en este kampo. La povlasion judía de Salonik era tan numerosa que la deportasion turo muchos mezes para terminarse, el 7 de agosto, En el mizmo konvoyo se encontravan 367 Jidíos protegidos por sus nasionalidades espaniolas que konosieron un destino singular: trasladados desde Bergen-Belsen fina Barcelona i denpues en Marrueko.

Los jidios, viejo pueblo benadam, se aparejaron komo por un longo viaje “normal”, kreyendo ir se por un nuevo egzilo a Babilonia. No uvo ningún pleito, ninguna brutalida de la parte de los Almanes. No era menester.

Teniendo kuento de todas las kovdizias lokalas, averiya estado kolay, portanto, de topar haveres non jidios. Ma los mosos de los Almanes afogaron toda tentativa. Kaliya ke el denero jidio kede en manos almanas, o gregas. Los jidios de Salonik fueron reskatados, komo avian estado los de Tunisi, komo le saran los de Roma.

El diya de la partensya, los jidios eran obligados de dar todas las paras ke los kedavan, en mano de los Alemanes, ke les daban un resibido. En Polonia, los jidios de Cracovie los iyan dar zlotys polakos, basho prezentasion del resebido. Algun de los desdishados no puediya saber ke los jidios de Cracovia no egzistian mas, i de leshos.

A la salida del treno, en Birkenau, se puedia ver dezmazalados selaneklis, ke preguntavan onde i kuando iyan tomar atrás sus paras, en mostrando el resibido. Enganiados fino al kavo.

El denaro arrovado a los Jidios (paras likidas) 280 miliones de drahmes (11.432.926 euros) fue arekojido en una banka grega , i los Almanes se lo yevaron.

Los kampos

En Birkenau, aproximadamente 37 000 Judíos de Salónik fueron kemados imediatamente, sobre todo las mujeres, los ninios y las personas viejas. Serka de un kuarto de las 400 eksperimentasiones kometidas sobre jidíos le fueron sobre jidíos gregos, en particular los de Salónik. Estas eksperiensias incluían la emaskulasión de los mansevikos, la kastrasion de los ombres, la implantación del kanser del kollo de útero sobre las mujeres, la ablasion de pecho. La inmensa mayoría de los jemelos perisieron víktimas de krímenes atroses.
Otros Jidíos devieron lasdrar en los campos. En los anios 1943-1944, representavan una parte importante de la mano de ovra de Birkenau: eran aproksimadamente 11 000. Los jidíos fueron enviados a numero para alimpiar los escombros del geto de Varsovia en agosto de 1943 kon el fin de konstruir ayí un campo. Fueron deskojidos, por estar no-yiddisch avlantes, i ke no puediyan komunikar kon alguno.
Entre los 1 000 Judíos empleyados a esta tarea, una pekenia veintena yegó a eskaparse del geto por las alkantaryas y a reunir la resistensia polaka.

KONKLUZION

Al fin de la Segunda Guerra mundial, una gerra violenta y sivil prorrumpió en Grecia.

Los supervivientes selaneklis de los campos, 1950 en todo, algunos eskogieron no regresar en Grecia y emigraron a Europa occidental, a América o a Palestina mandatario y otros tomaron el kamino de la vuelta. Estuvieron totalmente konfrontados kon grandes dificultades para sobrevivir y yegar a kavo su proyeckto tanto Europa del inmediato después de gerra estava en un estado kaótiko. Sufrieron por otro lado de diskriminasión. Por los Gregos, tanto poko ke seyan, estavan demaziados en la vida de Salonik.

La konstruksión de un monumento que simboliza la deportasión de los Judíos tadró mucho tiempo a venir, es sólo en 1997 que la munisipalida desidió azer fraguar un memorial en leshano suburbio i no en sentro de la siudad como esto avía sido sugerido. En 1998, el rey Juan Carlos de Espania fue a Salónik, ónde rindió omenaje a los Judíos. Esta visita era la kontinuasión de la que aabía emprendido a la sinagoga de Madrid en 1992 para la konmemorasión de la ekspulsión de 1492 kon okasión de la kual avía echo la krítica del dekreto de ekspulsión. Mejor vale tadre ke nunka.

Hoy 1 300 Judíos viven en Tesalónika (eran 56 000) lo ke aze esta komunida la segunda de Gresia después de Atenas.

Los Gregos mantuvieron una pesgada ley del silensio, para azer olvidar estos kinientos anios de ko-abitasion kon los jidios aboresidos, trayidos por los Turkos.

Una istoriana judiya mos konto la sorpresa de los estudiantes gregos de Salonik, en la universidad Aristote, fraguada sobra el lugar del grande simitero judío. “Ma de kuales Jidios estash avlando? Nunka uvo Jidios aki!”

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: