Diario Judío México - Diario Judío México-
Tomado de un artikulo del Virtualjerusalem

Esta bivo ! Se yama Kassem Suleimani. Unos lo yaman el Komandante Solombra, otros Noche Oskura ets… Es el astuto Komandante del Las Fuersas QUDS., una Divizion de la Unidad de las Guardas Revolusyonaryas de Iran. Ayatollah Ali Khamenei, el Lider Supremo de Iran lo alavo dizyendo ke es “el martiryo bivo de la Revolusyon Iraniana.”

Soleimani no es un hombre ke le gusta ser enfrente del publiko i fina muevamente no aksepto dinguna entrevista kon la media etranjera. Sin dinguna duvda, es el hombre el mas danjorozo del Oriente Medyo. Era uno de los ofisiales de los terroristos Shiites del Libano kreados por Hezbollah dospues de la primera guerra de los Ochenta kon el Libano.
Esta mizma organizasyon ke, por dezgrasya, menasa oy Israel kon sus 140.000 missilas….

ATROSITADES….


Fue deklarado terroristo en 2011 por los Estados Unidos por su rolo en la trampa para assasinar el Embasador de la Arabia Saudita en los Estados Unidos i, mas tadre, por los krimenes de guerra kometidos en Syria en las batalyas kon los rebeldes.

Soleimani se interesava de serka a kada operasyon de la Syria kon Irak durante las guerras sivilas i fundyo la organizasyon Hashd al-Shaabi ke en realitad era una divizion de milisyas Shiitas ke fueron inkorporados a la Armada del Irak en los empesijos de 2018. Los komandantes del Hashd al-Shaabi resiven los ordenes de Soleimani i no del governo de Irak, i estas milisyas de origen Iranianas eran mas los piones de la guerra ke rezulto en la konkista de los territoryos peryidos a las fuersas del ISIS, el Estado Islamiko. Soleimani fue rekonosido en las batalyas kontra ISIS en Tikrit, Ramadi, Fallujah i Mosul ke ISIS aviya tomado en 2017.

Guay del ken kaye entre sus manos..Barminnam !

El Komandante del Quds estava prezente tambien en la batalya de los rebeldes en Aleppo-Syria i en las operasyones de Qalamoun ande Iran esta dirijando una implanta nuklear debasho de la tierra, serka de la sivdad Qusayr.

Muevamente, Soleimani se emlesko para formar un governo pro-Iraniano en Irak kon Shiites al poder i el lider relijyozo Muktada al-Sadr simpatizante de Iran. Dospues de su enkuentro kon al-Sadr, Soleimani deklaro ke Iran no iva akseptar la formasyon de un blok Shii kontra sus interesos i ke esto era una linya korolada.

En akeyos diyas, Kassem Suleimani empeso a guerreyar kontra los rebeldes en las provinsyas de Daraa i Quneitra al sur de Syria i dyo el orden de attakar ISRAEL kon mas de 30 missilas en el koryente de la noche del 10 de Mayo ! Esto rezulto, komo se save, en la Operasyon AHEDREZ de TSAHAL ke aharvo las basas Iranianas i las fuersas del Quds en Syria. TSAHAL estava bien preparado i la operasyon empeso dospues ke Soleimani fundyo La Brigadya de Liberasyon, una divizion Shiita dirijada por la Milisya Irakiana Hezbollah al-Nujaba.

EL ODYO FINA EL GARON !

A la fin del anyo 2017 Sheikh Akram al-Ka’abi, el lider del Hezbollah al-Najuba disho ke si el governo Syriano lo demanda o lo aksepta, estavan enteramente prontos i preparados para liberar el GOLAN endjuntos kon la Armada Araba Syriana. Al-Ka’abi resive sus ordenes direktamente de Soleimani i disho ke sus Milisyas van a kooperar kon el Hezbollah del Libano ke tiene miles de gueryeros en Syria i estan en kontrol del GOLAN en frente de los kazales Druzes del Magdal Shams en los montes del Golan Israelyano.
“Israel sera destruiyido!” – Sharope : No ayegaran ni eyos ni sus gueysos, mizmo en sus suenyos !- disheron en uno de sus video kuando difuzaron ke fundyeron la “Brigada de la Liberasyon del Golan” !

A la fin de Julyo, Soleimani menaso los Estados Unidos i el Prezidente Donald Trump en prevenyendolos ke si teniyan la intensyon de atakar Iran las Fuersas de Iran los “eskapariya” ! Akuzo Trump de avlar komo en los “casinos” i en los “Night clubs” i disho ke es su dover de soldado de arresponder a las menasas de Trump al Prezidente Rouhani de Iran. Dospues ke Trump le disho a Rouhani “Nunka, nunka mas te atrevas a menasar los Estados Unidos!” el Komandante del Quds disho ke el Prezidente deviya avlarle a el i no a Rouhani….. “Estamos serka de ti ! Tan serka ke ni te lo puedes imajinar ! Ven ! Estamos prontos ! Si empesas una guerra seremos mozotros ke la eskaparemos ! ” . Estas palavras fueron enrejistradas por la Ajensya del Estado Iraniano TASNIM.


Hashd al-Shaabi

Una semana antes MEMRI , el Instituto de Analizas de lo ke se pasa en el Oriente Medyo, revelo ke Soleimani tiene un kuento en el Instagram ke amostra grafikos del Komandante de las Fuersas Quds, uzando un walkie-talkie en tenyendose en frente de la Kaza Blanka ke estava eksplozando !!! Se puediya meldar “Trespizaremos los Estados Unidos debasho de muestros pies” . En el mizmo kuento ay tambien una fotografiya de Soleimani en prevenyendo “el Jugador Trump” de no menasar el puevlo Iraniano. “No menases muestras vidas !! Konoses muestra fuersa i muestras kapabilitades en esta rejyon. Saves kuanto somos poderozos en una guerra assimetrika! ”

MEMRI disho ke Soleimani esta obsessionado kon los Estados Unidos i Trump en partikular : “No pasa noche ke no me ensonye de ti, Mr Trump, el jugador… Te dire… Ke sepas ke estamos a tus lados ! En lugares ke ni te viendran al tino ! No lo puedes ni imajinar ! Somos un puevlo de martirios. Somos la nasyon del Imam Husein. Demanda a los ke saven ! Pasimos munchos momentos duros !”

Estos fueron sus biervos kuando avlo en la sivdad de Hamedan en Iran, en Julyo 26, 2018.

El Sekretaryo del Estado Mike Pompeo dyo a entender el otro mez ke Soleimani deviya ser “likidado”…. “Kassem Soleimani kavza munchas dezgrasyas en Irak i en Syria i devemos augmentar el presyo por su Organizasyon i por el-mizmo !”. Estos fueron sus palavras durante sus vijitas en el Medyo Oryente.

Traduizido i prezentado por
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorNadal, Djokovic y Federer: caminos a recorrer en el US Open
Artículo siguienteEE.UU. cancela ayuda a palestinos por 200 millones de dólares
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.